ខេត្តបន្ទាយមានជ័យ ៖ ប្រតិភូកម្ពុជា-ថៃខេត្តជាប់ព្រំដែន បានជួបប្រជុំពិភាក្សាគ្នាពង្រឹងសម្ព័ន្ធមេត្រីភាព រវាងខេត្តបន្ទាយមានជ័យ និងខេត្តបាត់ដំបង កម្ពុជា និងខេត្តស្រះកែវ ប្រទេសថៃ កាលពីរសៀលថ្ងៃទី២៥…
ខេត្តបន្ទាយមានជ័យ ៖ ប្រតិភូកម្ពុជា-ថៃខេត្តជាប់ព្រំដែន បានជួបប្រជុំពិភាក្សាគ្នាពង្រឹងសម្ព័ន្ធមេត្រីភាព រវាងខេត្តបន្ទាយមានជ័យ និងខេត្តបាត់ដំបង កម្ពុជា និងខេត្តស្រះកែវ ប្រទេសថៃ កាលពីរសៀលថ្ងៃទី២៥ ខែវិច្ឆិកា ឆ្នាំ២០២១ នៅស្នាក់ការអន្តរជាតិខ្លងលឹក ស្រុកអារញ្ញ ខេត្តស្រះកែវ ប្រទេសថៃ ។ ប្រតិភូកម្ពុជាមានឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងឯកឧត្តម សុខ លូ អភិបាលខេត្តបាត់ដំបង ។ ចំណែកភាគីថៃមានឯកឧត្តម បរិនបញ្ញា ភោធិសាធ អភិបាលខេត្តស្រះកែវ និងមន្ត្រីរាជការ កងកម្លាំប្រដាប់អាវុធ ជាច្រើនរូបទៀត ។
កិច្ចប្រជុំពិភាក្សារវាងប្រតិភូកម្ពុជា-ថៃខេត្តជាប់ព្រំដែននេះ គឺពិនិត្យលើការបើកច្រកអន្តរជាតិ និងច្រកតំបន់ ក្នុងភូមិសាស្គ្រខេត្តបន្ទាយមានជ័យ និងខេត្តបាត់ដំបង ដែលមានព្រំប្រទល់ជាប់ជាមួយខេត្តស្រះកែវ ។ ការពិភាក្សាបើកច្រកព្រំដែនខេត្តបន្ទាយមានជ័យ មានច្រកអន្តរជាតិប៉ោយប៉ែត ច្រកតំបន់ម៉ាឡៃ និងច្រកបឹងត្រកួន ឯខេត្តបាត់ដំបង មានច្រកអន្តរជាតិគីឡូ១៣ ស្រុកសំពៅលូន ឈមនឹងច្រកខៅឌិន ស្រុកខ្លងហាត ខេត្តស្រះកែវ ។
ភាគីកម្ពុជា បានស្នើឱ្យមានការអនុញ្ញាតចេញចូល១ថ្ងៃចំនួន៣.០០០នាក់ គឺចេញចូលពីម៉ោង៦ព្រឹកដល់ម៉ោង១០យប់ អ្នកអូសរទេះ១ថ្ងៃអនុញ្ញាត៣០០ជើង ក្នុង១រទេះអនុញ្ញាត៦នាក់ តែត្រូវអនុវត្តតាមការណែនាំរបស់ក្រសួងសុខាភិបាល ។ ចំពោះពលករដែលមានបណ្ណឆ្លងដែនត្រូវអនុញ្ញាតរយៈពេល៣ខែ គឺចំនួន៩០ថ្ងៃ សម្រាប់អ្នកធ្វើកសិកម្មតាមបន្ទាត់ព្រំដែន ។ ក្នុងកិច្ចប្រជុំពិភាក្សានេះ ភាគីថៃ អភិបាលខេត្តស្រះកែវ បានទទួលយកសំណើដើម្បីស្នើសុំទៅរាជរដ្ឋាភិបាលថៃសម្រេច ហើយការព្រមព្រៀងកម្រិតណានឹងជម្រាបជូននៅពេលក្រោយ ។
ព្រំដែនកម្ពុជា-ថៃ បានបិទដោយភាគីថៃផងនិងខ្មែរផងអស់រយៈពេលជិត២ឆ្នាំហើយ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ។ ប៉ុន្តែទោះបីមានការបិទច្រកព្រំដែនក្តី សម្រាប់ច្រកទ្វារអន្តរជាតិប៉ោយប៉ែត នៅតែបើកឱ្យរថយន្តដឹកទំនិញថៃចូលរាប់សិបគ្រឿងក្នុង១ថ្ងៃៗ ។ ការធ្វើចរាចរណ៍រថយន្តដឹកទំនិញថៃ ក៏ត្រូវបានយកសំណាកដើម្បីបង្ការកូវីដ-១៩នៅនឹងកន្លែងដែរ ។ ក្រៅពីបង្កើនការប្រុងប្រយ័ត្នលើមុខទំនិញ អាជ្ញាធរខេត្តក៏ត្រៀមទទួលយកពលករខ្មែរធ្វើដំណើរមកពីប្រទេសថៃដែរ ជា
មួយនឹងការត្រៀមរួចជាស្រេចនូវមណ្ឌលចត្តាឡីស័កជាង៣០កន្លែង ។ ទោះបីជាបែបណា ការប៉ះពាល់ធ្ងន់ធ្ងរនោះគឺកម្មករក្រីក្រអូសរទេះដែលប្រឈមមុខនឹងការលំបាកជាពន់ពេក ។
ប្រសិទ្ធភាពក្នុងការគ្រប់គ្រងហានិភ័យនៃការឆ្លងរាលដាលទ្រង់ទ្រាយធំក្នុងសហគមន៍នៃមេរោគកូវីដ-១៩ ក្រោយវិធានការបិទខ្ទប់បណ្ដាខេត្តជាប់ព្រំដែនកម្ពុជា-ថៃនោះឃើញថាយុទ្ធនា ការពង្រឹងវិធានការប្រយុទ្ធនិងទប់ស្កាត់ការឆ្លងរាលដាលនៃជំងឺកូវី-១៩ សម្រាប់កម្ពុជាបានឈានដល់ការធូរស្រាលច្រើនហើយ បើប្រៀបធៀបទៅនឹងប្រទេសថៃដែលការឆ្លងនៅមានចំនួនច្រើន ។ សម្តេចតេជោ បានមានប្រសាសន៍រួចហើយថា ការបិទប្រទេសមិនមានទៀតឡើយ ខណៈពលរដ្ឋកម្ពុជាចេះរស់នៅជាមួយកូវីដ-១៩បានយ៉ាងល្អ និងមិនមានការឆ្លងធ្ងន់ធ្ងរទៀតនោះទេ ទោះបីមិនទាន់អាចលុបបំបាត់មេរោគនេះបានក្តី ៕
ចែករំលែកព័តមាននេះ