ភ្នំពេញ៖ ជនសង្ស័យ ជាមុខសញ្ញាឆក់សកម្ម ចំនួនពីរនាក់ បានធ្វើសកម្មភាពឆក់កាបូបស្ពាយចំហៀង ពីស្ត្រីម្នាក់បានសម្រេច តែទាក់ដៃចង្កូតគ្នា ជាមួយម៉ូតូរងគ្រោះ បណ្តាលអោយដួលទាំងពីរគ្រឿង ក៏ ត្រូវបានប្រជាពលរដ្ឋ ដេញប្រផាប់ចាប់ប្រផិញ បានម្នាក់ និងម្នាក់ទៀត រត់គេចខ្លួនចោរម៉ូតូបាត់ស្រមោល ដោយយកកាបូបលុយជនរងគ្រោះទៅផង។
ហេតុការណ៍ភ្ញាក់ផ្អើលនេះ បានកើតឡើង កាលពីវេលាម៉ោង ៥ភ្លឺ ថ្ងៃទី២៥ ខែវិច្ឆិកា ឆ្នាំ២០២១ នៅគល់ស្ពានជ្រោយចង្វារ ត្រើយខាងលិច ជាប់រង្វង់មូលគួចកាណុង ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
ជនសង្ស័យដែលប្រជាពលរដ្ឋឃាត់ខ្លួន ប្រគល់អោយសមត្ថកិច្ចនោះ មានឈ្មោះ ទឹម រ៉ូមែន ហៅ ចិន អាយុ ១៩ឆ្នាំ មុខរបរមិនពិតប្រាកដ ស្នាក់នៅផ្ទះជួល សង្កាត់បឹងសាឡាង ខណ្ឌទួលគោក មានស្រុកកំណើត នៅខេត្តព្រៃវែង ជិះម៉ូតូមួយគ្រឿងម៉ាកហុងដាឌ្រីមសង់ ស៊េរីឆ្នាំ២០២១ ពណ៌ខ្មៅ ពាក់ស្លាកភ្នំពេញ 1IG-1244។
ស្ត្រីរងគ្រោះ សុំមិនប្រាប់អត្តសញ្ញាណ បានអោយដឹងថា មុនពេលកើតហេតុ គាត់បើកម៉ូតូហុងដា ស្កុបពី តែម្នាក់ឯង ធ្វើដំណើរពីសង្កាត់ជ្រោយចង្វារ គោលបំណង ទៅផ្សារដើមគ ទិញបន្លែ ហើយកាបូបលុយគាត់ដាក់នៅក្នុងឃ្លុបម៉ូតូ ខាងមុខ។
ប្រភពដដែល បានបន្តទៀតថា ខណៈគាត់ធ្វើដំណើរមកដល់ចំនុចរង្វង់ព្រហ្មមុខបួន គល់ស្ពានជ្រោយចង្វារខាងកើត ក៏មានជនសង្ស័យចំនួន ២នាក់ ជិះម៉ូតូតាមគាត់ពីក្រោយ គាត់សង្ស័យ ក៏លួចមើលតាមកញ្ចក់ម៉ូតូ ឃើញជនសង្ស័យចំនួន ២នាក់ ពាក់អាវខ្មៅទាំងពីរ ហើយជនសង្ស័យនោះ បានជិះវ៉ាគាត់ ទៅឈប់លើពាក់កណ្ដាលស្ពាន ហើយឈប់ម៉ូតូ ធ្វើជាឈរលេងមើលទេសភាព។ គាត់មិនបានចាប់អារម្មណ៍ ក៏បន្តដំណើរទៅមុខជាធម្មតា។
ស្ត្រីរងគ្រោះ បន្តថា ខណ:គាត់ធ្វើដំណើរមកដល់គល់ស្ពានជ្រោយចង្វារខាងលិច ស្រាប់តែជនសង្ស័យទាំងពីរនាក់នោះ ជិះតាមគាត់ពីក្រោយមក ក្នុងល្បឿនលឿន និង បានធ្វើសកម្មភាពឆក់កាបូបលុយគាត់ បានសម្រេច តែក៏ទាក់ដៃចង្កូតម៉ូតូគ្នា បណ្តាលអោយដួលទាំងពីរគ្រឿង។
ភ្លាមៗ ជនសង្ស័យ បានព្យាយាមលើកម៉ូតូបើករត់គេចខ្លួន ទាំងភ័យស្លន់ស្លោ ទៅប៉ះម៉ូតូកង់បី ហើយខ្ទាត ទៅបុកខឿនសួនរង្វង់មូលគួចកាណុង បណ្តាលអោយម៉ូតូដួល ទៅមុខលែងរួច ក៏ត្រូវប្រជាពលរដ្ឋឃើញហេតុការណ៍ នាំគ្នា ជួយដេញប្រផាប់ ចាប់ប្រផិញ បានជនសង្ស័យម្នាក់ ជាអ្នកបើកម៉ូតូ។ ចំណែកបក្សពួកម្នាក់ទៀត រត់គេចខ្លួនបាត់ស្រមោល ជាមួយនឹងកាបូបលុយជនរងគ្រោះ នៅក្នុងនោះ មានប្រាក់ចំនួន ២៧ម៉ឺនរៀល។
ក្រោយកើតហេតុជនសង្ស័យ រួមទាំងម៉ូតូជាមធ្យោបាយធ្វើសកម្មភាព ត្រូវបានសមត្ថកិច្ច នាំទៅកាន់ប៉ុស្តិ៍នគរបាលស្រះចក ចាត់ការបន្តតាមនីតិវិធីច្បាប់៕
ចែករំលែកព័តមាននេះ