រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា មានគ្រោះថ្នាក់ចរាចរណ៍បានកើតឡើង ខណៈបុរសម្នាក់បានជិះម៉ូតូដួលខ្លួនឯងធ្វើឱ្យរងរបួសធ្ងន់ ស្រាប់តែរថយន្តសង្គ្រោះរបស់គ្លីនិកឯកជនចំនួន២គ្រឿង បានឈ្លោះប្រកែកគ្នាដើម្បីដណ្ដើមដឹកជនរងគ្រោះ ដោយមិនគិតពីអាយុជីវិតរបស់អ្នករបួសឡើយ បង្កឱ្យការភ្ញាក់ផ្អើលនៅវេលាម៉ោង៩និង៣០នាទីយប់ ថ្ងៃទី២៤ ខែវិច្ឆិកា ឆ្នាំ២០២១ នៅចំណុចផ្លូវបេតុងក្រោយរោងចក្រដើមពោធិ៍ ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ ។
តាមប្រភពព័ត៌មានពីបងប្អូនប្រជាពលរដ្ឋដែលនៅកន្លែងកើតហេតុ បានអោយដឹងថា មុនពេលកើតហេតុ គេបានឃើញបុរសម្នាក់បានជិះម៉ូតូម៉ាកហុងដាឌ្រីម ស៊េរីឆ្នាំ២០២០ ពណ៌ខ្មៅ ពាក់ស្លាកលេខ កំពង់ចាម 1X9657 ធ្វើដំណើរតាមបណ្ដោយផ្លូវបេតុងអត់លេខ ខាងក្រោយរោងចក្រដើមពោធិ៍ ទិសដៅពីត្បូងទៅជើង ក្នុងល្បឿនលឿន លុះមកដល់ចំណុចកើតហេតុ ស្រាប់តែផ្លូវមានទួលបន្តិច បណ្ដាលឲ្យម៉ូតូជនរងគ្រោះហោះផ្លោងដួលអូសជាច្រើនម៉ែត្រ ព្រមទាំងធ្វើឲ្យអ្នកបើកម៉ូតូរងរបួសបែកមុខ បែកមាត់សន្លប់បាត់បង់ស្មារតី ហើយត្រូវការរថយន្តសង្គ្រោះមកដឹកយកជនរងគ្រោះយកទៅព្យាបាល។
ប្រភពដដែលបន្តថា ប៉ុន្តែតែពេលនោះ ក៏ស្រាប់តែមានរថយន្តសង្គ្រោះមួយគ្រឿងរបស់គ្លីនិកឯកជន យីហោ «សង្គ័ម៉ារី» មានទីតាំងនៅម្តុំមុខព្រលានយន្តហោះអន្តរជាតិ ក្នុងខណ្ឌពោធិ៍សែនជ័យ បានទៅដល់មុនគេ ហើយបំរុងលើកជនរងគ្រោះយកទៅ តែត្រូវបានសមត្ថកិច្ចមូលដ្ឋានមិនអោយលើកនោះទេដោយរង់ចាំរថយន្ដសង្គ្រោះមួយគ្រឿងទៀត យីហោ «សម្ភពសែនជ័យ» ដែលមានទីតាំងនៅជិតស្ពានអាកាសផ្សារដីហុយ ក្នុងខណ្ឌសែនសុខ អោយមកទទួល ព្រោះសមត្ថកិច្ចអះអាងថា រថយន្តសង្គ្រោះនៅគ្លីនិកក្នុងខណ្ឌសែនសុខ ស្រួលពឹងពាក់ ព្រោះថាពេលជនអនាថាមានបញ្ហាគ្រោះថ្នាក់ចរាចរណ៍ ឬដេកស្លា.ប់ គឺគ្មានរថយន្តសង្គ្រោះណាមួយចេញមុខមកដឹកទេ គឺមានតែរថយន្ដគ្លីនិកឯកជនសម្ភពសែនជ័យ នៅខណ្ឌសែនសុខ តែងតែជួយសម្របសម្រួល ជួយដឹករហូត។
ដោយសារតែមានការឃាត់ពីសមត្ថកិច្ច លុះពេលរថយន្តសង្គ្រោះទាំងពីរគ្រឿងមកដល់ គិតតែពីជជែកទាមទារដណ្តើមគ្នាដឹកយកជនរងគ្រោះ ដោយមិនគិតពីអាយុជីវិតអ្នករបួសដែលកំពុងត្រូវការសង្គ្រោះភ្លាមៗនោះទេ លុះរហូតទាល់តែមានរថយន្តសង្គ្រោះឯកជនទី៣ យីហោ «សួគា៍» មានទីតាំងនៅជិតស្ពានដែកចំការដូង ហើយនៅជិតកន្លែងកើតហេតុទៀត បានមកដឹកជនរងគ្រោះយកទៅសង្គ្រោះបាត់តែម្តងទៅ។
ក្រោយពេលដែលរថយន្តសង្គ្រោះឯកជនទី៣ បានដឹកជនរងគ្រោះយកទៅសង្គ្រោះហើយ ស្រាប់តែរថយន្តសង្គ្រោះទាំង២គ្រឿងដែលដណ្តើមគ្នាដឹកជនរងគ្រោះនោះ បាននាំគ្នាទៅតាមឌឺដងដាក់គ្នាដល់មុខគ្លីនិក «សួគា៍» ដែលនៅជិតស្ពានដែកថែមទៀតផង ។
ពាក់ព័ន្ធករណីគ្រោះថ្នាក់ចរាចរណ៍ខាងលើនេះ មានការបញ្ចេញមតិពីបងប្អូនប្រជាពលរដ្ឋខុសពីសមត្ថកិច្ច ដោយពួកគាត់បានលើកឡើងថា ការងាររកស៊ីរបស់រថយន្តសង្គ្រោះគាត់មិនថាទេ តែរាល់ពេលមានហេតុការណ៍ អ្នកណាទៅដល់មុនអោយគេដឹកយកទៅ ព្រោះប្រញាប់សង្គ្រោះជីវិតមនុស្ស បើរវល់តែឈ្លោះប្រកែកដណ្តើមគ្នា អ្នកជំងឺល្មមៗមិនដាច់ខ្យល់ស្លា.ប់បាត់ទៅហើយ ។
ដោយឡែកសមត្ថកិច្ចមូលដ្ឋាន គាត់មានយោបល់ថា រឿងរថយន្ដសង្គ្រោះឯកជនមួយចំនួន គឺប្រកាន់អ្នកជំងឺ ជាពិសេសគឺជនអនាថា អោយតែលឺថាជនអនាថា គឺគ្មានរថយន្តសង្គ្រោះណាពឹងពាក់បានទេ គឺមានតែគ្លីនិកមួយនៅខណ្ឌសែនសុខ ដែលអាចពឹងពាក់បានក្នុងការដឹក ហើយជួយសង្គ្រោះ ។
ក្រោយពេលកើតហេតុ ក្នុងហេតុការណ៍ខាងលើនេះ នៅសល់តែម៉ូតូ ហើយត្រូវបានសមត្ថកិច្ចមូលដ្ឋានប្រគល់អោយសាច់ញាតិជនរងគ្រោះយកទៅរក្សាទុកផងដែរ ៕
ចែករំលែកព័តមាននេះ