សារព័ត៌មានបរទេសផ្សាយថា ក្រុមតារាសាស្ត្រដឹកនាំដោយលោក Michael Gillon ពីមហាវិទ្យាល័យ Liege ប្រទេសបែលហ្សុិក កាលពីថ្ងៃទី១ ឧសភា ២០១៦ ចេញផ្សាយលទ្ធផលស្រាវជ្រាវ ក្នុងឯកសារវិទ្យាសាស្ត្រ «Nature» ថាបានរកឃើញផ្កាយព្រះគ្រោះចំនួន៣ដួង ។
ផ្កាយព្រះគ្រោះទាំង៣ដួងនោះ គោចរនៅជុំវិញផ្កាយមេ (TRAPPIST-1) ជាផ្កាយក្រិនមានសីតុណ្ហភាពទាប (Ultra-Cool dwart) ស្ថិតនៅឆ្ងាយពីផែនដីត្រឹមតែ៤០ឆ្នាំពន្លឺប៉ុណ្ណោះ ។ ក្រុមផ្កាយនោះ គឺជាកត្តាតម្រូវឱ្យអ្នកវិទ្យាសាស្ត្រមានសង្ឃឹមយ៉ាងមុតមាំលើការសិក្សាស្រាវជ្រាវពីវត្ថុមានជីវិតនៅក្រៅភព ។ ផ្កាយដែលស្ថិតនៅក្បែរផែនដីនេះបានទទួលកំដៅគ្រប់គ្រាន់ ធ្វើឱ្យមានទឹកសម្រាប់ប្រើប្រាស់ ។
លទ្ធផលបានពីការសង្កេតការណ៍របស់មា៉ស៊ីនថតទូរទស្សន៍ នៃប៉មសង្កេតការណ៍ប៉ូលខាងត្បូងនៅតំបន់អឺរ៉ុប (ESO) បង្ហាញឱ្យឃើញពីបម្រែបម្រួលបរិមាណពន្លឺរបស់ផ្កាយមេ ។
ជាលើកដំបូងហើយដែលរកឃើញផ្កាយព្រះគ្រោះគោចរនៅជុំវិញផ្កាយមេ ឬផ្កាយដែលមានសីតុណ្ហភាពទាប ។ ផ្កាយមេមួយដួងនោះ មានទំហំប្រហែល ៨% នៃព្រះអាទិត្យ និងមានពន្លឺភ្លឺមិនដល់ពាក់កណ្តាលនៃព្រះអាទិត្យទេ ៕
ចែករំលែកព័តមាននេះ