រាជធានីភ្នំពេញ ៖ កំលុងពេលជួបវិបត្តិជំងឺកូវីដ ១៩ ជិត ២ ឆ្នាំកន្លងមកនេះ រាជរដ្ឋាភិបាលបានលើកទឹកចិត្តផ្នែកពន្ធទៅដល់បណ្តាវិស័យដែលរងផលប៉ះពាល់ធ្ងន់ធ្ងរតួយ៉ាងវិស័យទេសចរណ៍ ។ ការលើកទឹកចិត្តនេះត្រូវបានបន្តរយៈពេល…
រាជធានីភ្នំពេញ ៖ កំលុងពេលជួបវិបត្តិជំងឺកូវីដ ១៩ ជិត ២ ឆ្នាំកន្លងមកនេះ រាជរដ្ឋាភិបាលបានលើកទឹកចិត្តផ្នែកពន្ធទៅដល់បណ្តាវិស័យដែលរងផលប៉ះពាល់ធ្ងន់ធ្ងរតួយ៉ាងវិស័យទេសចរណ៍ ។ ការលើកទឹកចិត្តនេះត្រូវបានបន្តរយៈពេល ៦ ខែ ថែមទៀតចាប់ពីដើមឆ្នាំ ២០២២ ប៉ុន្តែអ្នករកទទួលទានក្នុងវិស័យនេះ ទទួចសូមឲ្យរដ្ឋាភិបាលបន្តជួយពេញមួយឆ្នាំ ២០២២ តែម្តង ។
ប្រធានសមាគមទេសចរណ៍កម្ពុជា លើកឡើងថា ការលើកទឹកចិត្តរបស់រាជរដ្ឋាភិបាលដល់វិស័យដែលរងផលប៉ះពាល់ធ្ងន់ធ្ងរដោយសារតែជំងឺកូវីដ ១៩ បានធ្វើឱ្យពួកគាត់កាត់បន្ថយបានការចំណាយបានមួយចំនួន និងធ្វើឱ្យម្ចាស់អាជីវកម្មអាចស្តារមុខរបររបស់ខ្លួនឡើងវិញបានបន្តិចម្តងៗ ។ តែបើសិនអត់មានការលើកទឹកចិត្តពីរាជរដ្ឋាភិបាលនោះទេ នឹងធ្វើឱ្យអ្នកប្រកបរបរក្នុងវិស័យទេសចរណ៍មានបន្ទុកចំណាយកាន់តែធំ ។
លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជាបន្ថែមថា បើសិនមានការលើកទឹកចិត្តពីរាជរដ្ឋាភិបាល បានពេញមួយឆ្នាំដល់វិស័យដែលរងផលប៉ះពាល់ធ្ងន់ធ្ងរពិតជាល្អដែលនឹងធ្វើឱ្យម្ចាស់អាជីវកម្មទាំងអស់ បើកអាជីវកម្មឡើងវិញ ។ ប៉ុន្តែបើសិនរាជរដ្ឋាភិបាលបញ្ចប់ការជួយលើកទឹកចិត្តត្រឹមរយៈពេល ៦ ខែក្នុងឆ្នាំ ២០២២ នោះ ម្ចាស់អាជីវកម្មត្រូវប្រឈមមុខទៅនឹងការចំណាយច្រើន ។ លោកស្រីបញ្ជាក់ថា ជូនកាលការបញ្ចប់ជំនួយពីរដ្ឋអាចធ្វើឱ្យម្ចាស់អាជីវកម្មមានការបាក់ទឹកចិត្ត ព្រោះវិបត្តិកូវីដ ដែលបានរងផលប៉ះពាល់កន្លងមកនេះមានរយៈពេលជិត ២ ឆ្នាំមកហើយ ។
លោក ឌិន សុមេធារិទ្ធ ប្រធានសមាគមសណ្ឋាគារកម្ពុជា បានឱ្យដឹងថា រាជរដ្ឋាភិបាលបន្តលើកទឹកចិត្តដល់វិស័យដែលរងផលប៉ះពាល់ដោយសារជំងឺកូវីដ ១៩ នេះជារឿងមួយដ៏ល្អព្រោះខាងអ្នករកស៊ីនៅក្នុងរយៈពេល ២ ឆ្នាំមកនេះខាតបង់ប្រាក់គ្រប់គ្នា ។
«បច្ចុប្បន្ននេះ សម្រាប់សណ្ឋាគារ ជាម្ចាស់អគារផ្ទាល់ខ្លួន គាត់ត្រៀមបើកអាជីវកម្មឡើងវិញ ។ តែបើគាត់ជួលអគារគេរកស៊ី បើបិទ គឺបិទហើយព្រោះអត់លុយបង់ទៅឱ្យម្ចាស់អគារ ដូចនេះត្រូវបង្ខំចិត្តបិទ ។ ចំណែកសណ្ឋាគារធំៗដូចនៅខាងសៀមរាប មិនចេះតែប្រកាសបើក ឬបិទបានដូចសណ្ឋាគារខ្នាតតូចបានទេ បើគាត់ប្រកាសថា បើកឡើងវិញទាល់តែមានការសិក្សាច្បាស់លាស់ថា មានភ្ញៀវចូលមកទើបបើក» នេះជាការបញ្ជាក់របស់លោក ឌិន សុមេធារិទ្ធ ។
ប្រតិបត្តិករទេសចរណ៍បានលើកឡើងថា បន្ទាប់ពីរាជរដ្ឋាភិបាលបើកប្រទេសឡើងវិញបានមួយរយៈពេលខ្លីកន្លមកនេះ សម្រាប់អ្នករកស៊ីក្នុងវិស័យទេសចរណ៍នេះមិនទាន់ទទួលបានផលប្រយោជន៍ពីការធ្វើអាជីវកម្មរបស់ខ្លួនឡើយនោះទេ ដោយសារចំនួនភ្ញៀវទេសចរចូលមកកាន់កម្ពុជានៅមានចំនួនតិចតួចនៅឡើយ និងម្យ៉ាងទៀតម្ចាស់អាជីវកម្មត្រូវកាពេលវេលាវែងនៅក្នុងការស្តារមុខរបរឡើងវិញផងដែរ ៕
ចែករំលែកព័តមាននេះ