រាជធានីភ្នំពេញ ៖ នៅកម្ពុជាមានក្រុមហ៊ុនបារាំងជាង ៤០០ បានកំពុងធ្វើអាជីវកម្ម ។ ក្រុមហ៊ុនទាំងនោះបានសាទរចំពោះការបើកដំណើរការសេដ្ឋកិច្ច សង្គមឡើងវិញរបស់កម្ពុជា ។ ក្នុងជំនួបសម្តែងការគួរសមជាមួយសម្តេចនាយករដ្ឋមន្ត្រី នៅថ្ងៃទី ២៤វិច្ឆិកា លោក ហ្សាក់ ប៉ីឡេ ឯកអគ្គរដ្ឋទូតថ្មីប្រទេសបារាំងប្រចាំនៅកម្ពុជាបានលើកឡើងថា ក្រុមហ៊ុនបារាំងប្រមាណ ៤០០ នោះ ពិតជាមានសេចក្ដីរីករាយយ៉ាងខ្លាំង ចំពោះជោគជ័យនៃការចាក់ស្រោចវ៉ាក់សាំង ការបើកដំណើរការប្រទេសឲ្យមានលំហូរឡើងវិញ ទាំងការហោះហើរ ទាំងសេដ្ឋកិច្ច ទាំងដំណើរការពាណិជ្ជកម្ម ។
លោកទូតថ្មីរបស់បារាំងថែមទាំងសន្សាជាមួយសម្តេចតេជោ ហ៊ុន សែន ថានឹងជំរុញពង្រឹងកិច្ចសហប្រតិបត្តិការរវាងប្រទេសទាំងពីរផង រវាងអាស៊ាន និងអឺរ៉ុបផង ស្របពេលកម្ពុជា នឹងធ្វើជាប្រធានប្តូរវេនអាស៊ាន ធ្វើយ៉ាងណាឲ្យកិច្ចសហប្រតិបតិ្តការរវាងតំបន់ទាំងពីរ ជាកិច្ចសហប្រតិបត្តិការដែលគ្មានការប្រឈម ផ្ទុយទៅវិញ គឺកិច្ចសហប្រតិបត្តិការប្រកបដោយបរិយាបន្ន និងស្ថិរភាព ។
សម្តេចតេជោ បានយល់ស្របជាមួយលោក ហ្សាក់ ប៉ឺឡេ ចំពោះកិច្ចសហប្រតិបត្តិការទាំងទ្វេភាគី ទាំងពហុភាគី ។ ក្នុងនោះកិច្ចសហប្រតិបត្តិការទ្វេភាគី កម្ពុជានិងបារាំង គប្បីធ្វើយ៉ាងណាជំរុញកិច្ចសហប្រតិបត្តិការឱ្យកាន់តែស៊ីជម្រៅថែមទៀតលើគ្រប់វិស័យ ដែលអាចធ្វើទៅបាន រួមទាំងកិច្ចសហប្រតិបត្តិការនៅក្នុងក្របខណ្ឌក្រោមឆ័ត្រអន្តរជាតិផងដែរ ។ ពាក់ព័ន្ធនឹងកិច្ចសហប្រតិបត្តិការរវាងអាស៊ាន និង E.U សម្ដេចតេជោ បានយល់ស្របនឹងឧត្ដមពេលេ គឺអាស៊ាន និង E.U គប្បីណាសហការគ្នា ជំរុញកិច្ចសហប្រតិបត្តិការលើវិស័យផ្សេងៗឲ្យបានប្រកបដោយបរិយ៉ាប័ន និងដោយស្ថិរភាព ។
ជាការកត់សម្គាល់ទោះក្នុងបរិបទជំងឺកូវីដ-១៩ បារាំងនៅតែបន្តជាទីផ្សារនាំចេញទំនិញដ៏សំខាន់មួយរបស់កម្ពុជា ដែលក្នុងនោះទំហំពាណិជ្ជកម្មកម្ពុជា-បារាំងនៅឆ្នាំ ២០២០ សម្រេចបានចំនួន ៤៥៦ លានដុល្លារអាមេរិក និងគិតត្រឹមខែមេសា ឆ្នាំ ២០២១ មានចំនួន ១៥៧ លានដុល្លារអាមេរិក ៕
ចែករំលែកព័តមាននេះ