ប្រទេសថៃ ៖ លោកនាយករដ្ឋមន្ត្រីថៃ ប្រាយុទ្ធ ចាន់អូចា កាលពីថ្ងៃចន្ទកន្លងមកនេះ បានគាំទ្រដល់ការវិនិយោគរបស់ជប៉ុន លើការអភិវឌ្ឍគម្រោងផ្លូវរថភ្លើង ។ ការគាំទ្រនេះធ្វើឡើងនៅក្នុងជំនួបពិភាក្សាជាមួយរដ្ឋមន្ត្រីការបរទេសជប៉ុន លោក Fumio Kishida ។
អ្នកនាំពាក្យរបស់រដ្ឋាភិបាលថៃ លោក Athisit Chainuwat បានឱ្យដឹងបន្ទាប់ពីកិច្ចប្រជុំថា ៖ « រដ្ឋាភិបាលថៃនៅតែមានជំនឿចិត្តទៅលើគុណភាព និងសុវត្ថិភាពស្តង់ដានៃបច្ចេកវិទ្យារថភ្លើងរបស់ជប៉ុន » ។
ប្រទេសទាំងពីរបានយល់ព្រមវិនិយោគរួមគ្នាទៅលើគម្រោងបង្កើតខ្សែបណ្តាញរថភ្លើងល្បឿនលឿនពីក្រុងបាងកក ទៅឈៀងម៉ៃ និងចាប់ពី Kanchanaburi ទៅ Laem Chabang និង Aranyaprathet ។ ប៉ុន្តែគម្រោងទាំងនេះមានដំណើរការយឺតយ៉ាវនៅឡើយ ។
ប្រទេសជប៉ុនកំពុងតែប្រកួតប្រជែងជាមួយចិន ក្នុងការវិនិយោគផ្លូវរថភ្លើងនៅប្រទេសថៃ។ គម្រោងផ្លូវរថភ្លើងទាំងអស់របស់ចិនត្រូវបានពន្យារពេល បន្ទាប់ពីមានការចរចា៣-៤លើករួចមក ។
« លោក Gen Prayut និងមន្ត្រីផ្សេងទៀតបានសន្យាថា នឹងបន្តគាំទ្រគម្រោងឧស្សាហកម្ម Dawei នៅក្នុងប្រទេសមីយ៉ាន់ម៉ាផងដែរ ខណៈវាមានអត្ថប្រយោជន៍ដល់ប្រទេសថៃ ជប៉ុន និងមីយ៉ាន់ម៉ា ព្រមទាំងប្រទេសផ្សេងទៀតនៅក្នុងអនុតំបន់មេគង្គ » ។ នេះបើតាមអ្នកនាំពាក្យបានឱ្យដឹង ។
គួរបញ្ជាក់ថា រដ្ឋមន្ត្រីជប៉ុនបានជួបជាមួយរដ្ឋមន្ត្រីបរទេស Don Pramudwinai កាលពីថ្ងៃអាទិត្យកន្លងមក ព្រមទាំងធ្វើទស្សនកិច្ចទៅកាន់ប្រទេសមួយចំនួនទៀតក្នុងតំបន់ផងដែរ រួមមាន មីយ៉ាន់ម៉ា ឡាវ និងវៀតណាម ៕
ចែករំលែកព័តមាននេះ