រាជធានីភ្នំពេញ ៖ ការបើកប្រទេសឡើងវិញបង្កលក្ខណៈងាយស្រូលដល់ការរកទទួលទានរបស់ពលរដ្ឋ អ្នកប្រកបរបរសេដ្ឋកិច្ចក្រៅប្រព័ន្ធ ពិសេសអ្នករត់ម៉ូតូកង់បីជាដើមនោះ បានផ្តើមរកចំណូលចិញ្ចឹមជីវិតបានបណ្តើរៗឡើងវិញ ។ អ្នកប្រកបរបរសេដ្ឋកិច្ចក្រៅប្រព័ន្ធបានរង់ចាំវត្តមានភ្ញៀវទេសចរបរទេសចូលស្រុកឡើងវិញ ។ អ្នកទេសចរបរទេស ជាប្រភពចំណូលដែលអាចចិញ្ចឹមជីវិតបាន ជាធម្មតារបស់ពួកគាត់ឡើងវិញ ដូចមុនកាលមិនទាន់ផ្ទុះកូវីដ ១៩ ។
លោក ឯ សំភាស់ ប្រធានសមាគមម៉ូតូកង់បីបានឱ្យដឹងថា អ្នកប្រកបរបររត់ម៉ូតូកង់បីនៅពេលមិនទាន់មានផ្ទុះជំងឺកូវីដ ១៩ អាចប្រាក់ចំណូលគិតជាមធ្យមបានពី ១៥ ទៅ ២០ ដុល្លារអាមេរិកក្នុងមួយថ្ងៃ តែមកដល់មានការបិទខ្ទប់ ពួកគាត់អាចរកចំណូលបានជាង ៥ ដុល្លារតែប៉ុណ្ណោះ ។ ប៉ុន្តែនៅពេលដែលរាជរដ្ឋាភិបាលបើកដំណើរការប្រទេស និងសេដ្ឋកិច្ចឡើងវិញបានមួយរយៈនេះ ពួកគាត់បានចេញរកទទួលទានសឹងគ្រប់គ្នា និងអាចរកប្រាក់បានពី ៣០.០០០ រៀលទៅ ៤០.០០០ រៀលក្នុងមួយថ្ងៃ ។
លោកបន្តថា យើងរំពឹងថា នៅពេលរាជរដ្ឋាភិបាលប្រកាសអនុញ្ញាតឱ្យភ្ញៀវទេសចរដែលចូលមកកម្ពុជាដោយមិនចាំបាច់ធ្វើចត្តាឡីស័កឱ្យតែចាក់វ៉ាក់សាំងគ្រប់គ្រាន់ អាចនឹងធ្វើឱ្យចំនួនភ្ញៀវទេសចរអន្តរជាតិកើនឡើងសន្សឹមៗ ខណៈដែលការរកចំណូលរបស់អ្នកប្រកបមុខរបររត់ម៉ូតូកង់បីសព្វថ្ងៃនេះបានប្រមាណពី ៤០% ទៅ ៥០% បើប្រៀបធៀបទៅនិងប្រាក់ចំណូលដែលរកបានកាលពីពេលមុន ។
តាមប្រធានសមាគមម៉ូតូកង់បី នៅបំណាច់ឆ្នាំ ២០២១ ឬ ចូលឆ្នាំសកលខាងមុខនេះ រំពឹងថា លំហូរភ្ញៀវទេសចរចូលមកអាចធ្វើឱ្យអ្នករត់ម៉ូតូកង់បីរកប្រាក់ចំណូលបានជាមធ្យម ៦០% នៃចំណូលដែលគាត់ធ្លាប់ទទួលបានកន្លងមក ។ តែជាយ៉ាងនេះក្តី អ្នកប្រកបមុខរបររត់ម៉ូតូកង់សព្វថ្ងៃត្រូវការចំណាយខ្ពស់ទៅលើប្រេងសាំង សម្ភារប្រើប្រាស់មួយចំនួនផ្សេងទៀតឡើងថ្លៃ ។
កម្ពុជាបើកទទួលអ្នកទេសចរបរទេសដែលចាក់វ៉ាក់សាំងហើយឲ្យទៅកម្សាន្តនៅខេត្តព្រះសីហនុ និងខេត្តកោះកុង នាចុងខែវិច្ឆិកានេះ ចំណែកនៅដើមឆ្នាំ ២០២២ គ្រោងបើកដល់សៀមរាប ដែលជាបេះដូងទេសចរណ៍កម្ពុជាតែម្តង ៕
ចែករំលែកព័តមាននេះ