រាជធានីភ្នំពេញ ៖ មានហេតុការណ៏ភ្ញាក់ផ្អើលមួយ បានកើតឡើងបន្ទាប់ពីម៉ូតូចំនួន៧គ្រឿង ដែលទុកនៅក្នុងទីតាំងឃ្លាំងតែមួយ ត្រូវបានចោរ១ក្រុមធ្វើសកម្មភាពកាត់សោ
រាជធានីភ្នំពេញ ៖ មានហេតុការណ៏ភ្ញាក់ផ្អើលមួយ បានកើតឡើងបន្ទាប់ពីម៉ូតូចំនួន៧គ្រឿង ដែលទុកនៅក្នុងទីតាំងឃ្លាំងតែមួយ ត្រូវបានចោរ១ក្រុមធ្វើសកម្មភាពកាត់សោ ចូលទៅលួច យកអស់គ្មានសល់ ក្នុងខណៈពេលដែលម្ចាស់រវល់ដេកលង់លក់ ដោយមិនដឹងខ្លួន ហើយក្រោយពេលដឹងបាត់ ម្នាក់ៗបានត្រឹមតែសម្ដែងការហួសចិត្តគ្រប់ៗគ្នាប៉ុណ្ណោះ ព្រោះម៉ូតូទាំងអស់ត្រូវចោរយកបាត់ គ្មានសល់សូម្បីមួយគ្រឿងឡើយ។ ហេតុការណ៏នោះ បានបង្កមានការឲ្យភ្ញាក់ផ្អើល កាលពីវេលាម៉ោង២យប់ រំលងអាធ្រាត្រឈានចូលថ្ងៃទី២ ខែឧសភា ឆ្នាំ២០១៦ ស្ថិតនៅក្នុងបន្ទប់ផ្ទះជួល នៅខាងក្រោយផ្សារកាណាស៊ីធី ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។
ប៉ូលីសបានឲ្យដឹងថា ម៉ូតូដែលត្រូវចោរលួចយក ទៅបាត់នោះ ម៉ាកហុងដាឌ្រីមសេ១២៥ ចំនួន៦គ្រឿង និងម៉ូតូម៉ាកវ៉េវអ៊ី១គ្រឿង ពេលនេះ ម្ចាស់បាន ដាក់ពាក្យបណ្ដឹងរួចរាល់ហើយ ចំណែកកម្លាំងប៉ូលីស ទាំងប៉ុស្ដិ៍ចោមចៅ និងអធិការដ្ឋានខណ្ឌពោធិ៍សែនជ័យ បាននឹងកំពុងធ្វើការស្រាវជ្រាវ តាមរកមុខសញ្ញាក្រុម ចោរលួចទាំងនោះហើយ។ ម្យ៉ាងទៀតតាមការសន្និដ្ឋាន ក្រុមចោរទាំងនោះអាចមានគ្នាច្រើន ឬអាចមានទាំងរថយន្តសម្រាប់ដឹកទៀតផង ទើបអាចយកម៉ូតូទាំងអស់ទៅបាន មិនតែ ប៉ុណ្ណោះ ក្រុមចោរអាចមានរនុកក្នុងថែមទៀត ទើបដឹងថានៅក្នុងឃ្លាំងនោះ មានទុកម៉ូតូច្រើន បែបនេះ ហើយនៅមុនពេលកើតហេតុ ម្ចាស់បានទុកម៉ូតូទាំងអស់នៅក្នុងឃ្លាំងខាងលើ ។ បន្ទាប់មកបានចាក់សោរួចរាល់បានចូលទៅដេកលង់លក់ រហូតដល់ វេលាកើតហេតុទើបដឹង បាត់ បណ្ដាលឲ្យមានការភ្ញាក់ផ្អើលទាំងយប់ ប៉ុន្តែមិនបានដាក់ពាក្យបណ្ដឹងភ្លាមៗនោះឡើយ លុះព្រឹកឡើងទើបនាំគ្នាធ្វើដំណើរ ទៅដាក់ពាក្យប្ដឹងនៅប៉ុស្ដិ៍ចោមចៅឲ្យជួយអន្តរាគមន៏៕
ចែករំលែកព័តមាននេះ