អគ្គព្រះរាជអាជ្ញារង ជម្រុញឱ្យមន្ត្រីនគរបាលយុត្តិធម៌អនុវត្តច្បាប់ និងក្រមសីលធម៌
ខេត្តប៉ៃលិន ៖ ក្រមនីតីវិធីព្រហ្មទណ្ឌ នៃព្រះរាជាណាចក្រកម្ពុជា បានបញ្ជាក់ថា ព្រះរាជអាជ្ញាជាអ្នកដឹកនាំ និងសម្របសម្រួលសកម្មភាពការងារ
ខេត្តប៉ៃលិន ៖ ក្រមនីតីវិធីព្រហ្មទណ្ឌ នៃព្រះរាជាណាចក្រកម្ពុជា បានបញ្ជាក់ថា ព្រះរាជអាជ្ញាជាអ្នកដឹកនាំ និងសម្របសម្រួលសកម្មភាពការងារ
ខេត្តប៉ៃលិន ៖ ក្រមនីតីវិធីព្រហ្មទណ្ឌ នៃព្រះរាជាណាចក្រកម្ពុជា បានបញ្ជាក់ថា ព្រះរាជអាជ្ញាជាអ្នកដឹកនាំ និងសម្របសម្រួលសកម្មភាពការងារ របស់មន្ត្រីនគរបាលយុត្តិធម៌ និងភ្នាក់ងារ នគរបាលយុត្តិធម៌ទាំងអស់ នៅក្នុងដែនសមត្ថកិច្ចរបស់ខ្លួន ហើយមន្ត្រីនគរបាលយុត្តិធម៌ គឺជាជំនួយរបស់អំណាចតុលាការ ។ នេះជាការលើកឡើងរបស់ឯកឧត្តម ស៊ិន រិទ្ធ អគ្គព្រះរាជអាជ្ញារង នៃមហាអយ្យការអមសាលាឧទ្ធរណ៍ នៅក្នុងកិច្ចប្រជុំស្តីពីកិច្ចសហការណ៍ រវាងអយ្យការតុលាការ និងមន្ត្រីនគរបាលយុត្តិធម៌ ក្នុងការអនុវត្តច្បាប់ ទប់ស្កាត់ និងបង្ក្រាបរាល់បទល្មើសព្រហ្មទណ្ឌ ដែលរៀបដោយអយ្យការអមសាលាដំបូងខេត្តប៉ៃលិន កាលពីព្រឹកថ្ងៃទី០២ ខែឧសភា ឆ្នាំ២០១៦ ស្ថិតក្រោមអធិបតីភាពឯកឧត្តម កើត សុធា អភិបាលនៃគណៈអភិបាលខេត្តប៉ៃលិន អញ្ជើញចូលរួមពីលោក លាង សួគ៌ ប្រធានសាលាដំបូងខេត្ត លោក ជុំ សែនសទ្ធា ព្រះរាជអាជ្ញាអមសាលាដំបូងខេត្ត មន្ត្រីសាលាដំបូង អង្គការសិទ្ធិមនុស្ស ព្រមទាំងមន្ត្រីនគរបាលយុត្តិធម៌នៅក្នុងខេត្តជាច្រើនរូបថែមទៀតផង ។
ឯកឧត្តម ស៊ិន រិទ្ធ បានលើកឡើងបន្តទៀតថា មន្ត្រីនគរបាលយុត្តិធម៌ ត្រូវតែបង្ក្រាបបទល្មើស មិនថាថ្ងៃឬយប់នោះឡើយ ហើយរាល់ការឆែកឆេរ ឬចុះចាប់ឃាត់ខ្លួនត្រូវតែរាយការណ៍ជូនព្រះរាជអាជ្ញាអមសាលាដំបូងខេត្តភ្លាម ដើម្បីផ្តល់ជាដំណឹង កុំឱ្យមានការថ្លោះធ្លោយដោយប្រការណាមួយ ។ ជាមួយគ្នានេះដែរ ព្រះរាជអាជ្ញាអមសាលាដំបូង លោក ជុំ សែនសទ្ធា បានណែនាំ ដល់មន្ត្រីនគរបាលយុត្តិធម៌ទាំងអស់ថា ក្នុងករណីណាក៏ដោយ មន្ត្រីនគរបាលយុត្តិធម៌ មិនអាចតម្កល់រឿងទុកដោយឥតចាត់ការបានទេ បើទោះបីជាក្រោយពីមានការសម្រុះសម្រួលគ្នារវាងជនល្មើស និងជនរងគ្រោះ ឬក៏មានការដកពាក្យបណ្តឹងក៏ដោយ ។ លើសពីនេះមន្ត្រីនគរបាលយុត្តិធម៌ ដែលរក្សាទុកកំណត់ហេតុ និងវត្ថុតាងដោយចេតនា ឬលាក់កំបាំងដល់អាជ្ញាធរតុលាការអំពើអត្ថិភាពនៃកំណត់ហេតុ ឬវត្ថុតាងត្រូវចាត់ទុកថា មន្ត្រីនគរបាលយុត្តិធម៌នោះបានប្រព្រឹត្តបទល្មើស ដែលត្រូវផ្តន្ទាទោសតាមច្បាប់ ក្រមព្រហ្មទណ្ឌនៃព្រះរាជាណាចក្រកម្ពុជា ពាក់ព័ន្ធទៅនឹងជំពូក ស្តីពីការស្រាវជ្រាវរកវត្ថុតាង ។
លោកបន្តទៀតថា រាល់កំហុសទាំងឡាយ ដែលប្រព្រឹត្តដោយមន្ត្រីនគរបាលយុត្តិធម៌ក្នុងពេលអនុវត្តច្បាប់មុខងាររបស់ខ្លួន ត្រូវតែរាយការណ៍ដោយព្រះរាជអាជ្ញា ដល់អគ្គព្រះ រាជអាជ្ញាអមសាលាឧទ្ធរណ៍ ដើម្បីផ្តើមនីតិវិធីខាងវិន័យ ។ ដោយឡែក ឯកឧត្តម កើត សុធា អភិបាលនៃគណៈអភិបាលខេត្តប៉ៃលិន បានសំណូមពរទៅដល់តុលាការ និងអយ្យការអមសាលាដំបូងខេត្ត ពិសេសមន្ត្រីនគរបាលយុត្តិធម៌ទាំងអស់ ក្នុងការចុះបំពេញការងារ ត្រូវអនុវត្តច្បាប់ឱ្យបានត្រឹមត្រូវ និងមានឆន្ទៈបម្រើរាស្ត្រ ដោយពិតប្រាកដ ជៀសវាងប្រើល្បិចកិច្ចកលធ្វើបាបប្រជាពលរដ្ឋ ។ ឯកឧត្តមបាន បន្តទៀតថា សូមឱ្យអ្នកអនុវត្តន៍ច្បាប់ទាំងអស់ចូលរួមធ្វើសកម្មភាព ស្របនឹងនយោបាយរបស់រាជរដ្ឋាភិបាល ដើម្បីប្រយោជន៍រួម គឺបម្រើផលប្រយោជន៍ដល់ប្រជាពលរដ្ឋ និងប្រទេសជាតិ ជៀសវាងកើតបញ្ហាណាមួយពលរដ្ឋចោទប្រកាន់ទៅលើច្បាប់ ឬអាជ្ញាធរមូលដ្ឋានផងដែរ ៕
ចែករំលែកព័តមាននេះ