ប្រធានសហព័ន្ធកីឡាទោចក្រយាន្ត ទទូចរឿងការប្រើសារធាតុញៀ.ន និងថ្នាំប៉ូវ
- ភ្នំពេញ
រាជធានីភ្នំពេញ ៖ នៅក្នុងកិច្ចប្រជុំបើកវគ្គបណ្តុះបណ្តាលគ្រូបង្វឹកកីឡាទោចក្រយាន កម្រិត១ កាលពីថ្ងៃទី២២ ដល់ថ្ងៃទី២៦
រាជធានីភ្នំពេញ ៖ នៅក្នុងកិច្ចប្រជុំបើកវគ្គបណ្តុះបណ្តាលគ្រូបង្វឹកកីឡាទោចក្រយាន កម្រិត១ កាលពីថ្ងៃទី២២ ដល់ថ្ងៃទី២៦
រាជធានីភ្នំពេញ ៖ នៅក្នុងកិច្ចប្រជុំបើកវគ្គបណ្តុះបណ្តាលគ្រូបង្វឹកកីឡាទោចក្រយាន កម្រិត១ កាលពីថ្ងៃទី២២ ដល់ថ្ងៃទី២៦ ខែវិច្ឆិកា ឆ្នាំ២០២១ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) កន្លងទៅ ប្រធានសហព័ន្ធកីឡានេះ បានលើកឡើងពីបញ្ហាសារធាតុញៀ.ន និង ថ្នាំប៉ូវ ថាជាហានិភ័យរបស់កីឡាករ ខណៈដែលលោកទទូចអោយកីឡាករ និងមន្ត្រីពាក់ព័ន្ធត្រូវចូលរួមទប់ស្កាត់លើបញ្ហានេះ អោយបានល្អ។ ថ្នាក់ដឹកនាំសហព័ន្ធរូបនេះ ក៏ជឿជាក់ថា តាមរយៈការបណ្ដុះបណ្ដាល ដែលបានធ្វើឡើងនឹងជួយពង្រឹងសមត្ថភាពកីឡាករ និងមន្ត្រីជាគ្រូបង្គោល និងត្រូវធ្វើយុទ្ធនាការកុំអោយពាក់ព័ន្ធនឹងសារធាតុញៀ.ន ឬ ថ្នាំប៉ូវ ដែលនាំអោយប៉ះពាល់ដល់ការចូលប្រកួត និងការចូលរួមប្រកួតនានារបស់កីឡាករផងដែរ។
លោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជា បានលើកឡើងថា គ្រឿងស្រវឹង សារធាតុប៉ូវកម្លាំង ឬសារធាតុញៀ.នជាដើម គឺជាអ្វីដែលសហព័ន្ធទាំងមូលត្រូវតែជៀសអោយឆ្ងាយ ហើយកីឡាករទាំងអស់ ដែលត្រូវការការបង្កើនកម្លាំងអោយបានរឹងមាំ គឺដាច់ខាតត្រូវតែខំហ្វឹកហាត់ និង ថែសុខភាព ដោយមិនត្រូវពាក់ព័ន្ធនឹងគ្រឿងស្រវឹង សារធាតុញៀ.ន ឬ ថ្នាំប៉ូវណាមួយ ដែលខុសប្រក្រតីឡើយ។
លោកទទូចអោយគណៈកម្មការមានវិធានការជួយទប់ស្កាត់លើបញ្ហានេះអោយបានទាំងស្រុង នៅក្នងសហព័ន្ធទាំងមូល ស្របពេលដែលលោកក៏ចាត់ទុកថា ការបណ្ដុះបណ្ដាលដែលបានធ្វើឡើងកន្លងមក ក៏ជាវគ្គដ៏សំខាន់មួយ ដើម្បីជួយពង្រឹងដល់គុណភាពចំណេះដឹងរបស់គ្រូបង្វឹកកីឡាទោចក្រយានកម្ពុជា ឲ្យកាន់តែរឹងមាំបន្ថែមទៀត។ វគ្គសិក្សានេះ លោកថា គឺជាការសិក្សាតាមរបៀបរបបបច្ចេកទេសអន្តរជាតិរបស់សហព័ន្ធកីឡាទោចក្រយានអន្តរជាតិ (UCI) ដោយផ្តោតសំខាន់លើមេរៀនគន្លឹះសំខាន់ៗចំនួន១០មេរៀន ក្នុងនោះ ផ្ដល់អោយគ្រូឧទ្ទេសប្រចាំវគ្គនីមួយៗ នូវការចែករំលែកមេរៀនអំពីសារធាតុហាមឃាត់ក្នុងវិស័យកីឡា (ដូពីង ឬដូប៉ា) ដូចជាគ្រឿងស្រវឹង សារធាតុប៉ូវកម្លាំង ឬសារធាតុញៀ.នជាដើម ដែលត្រូវតែរួមគ្នាបង្ការអោយបានដាច់ខាត។
លោកថា ដើម្បីសម្រួចគោលដៅអភិវឌ្ឍន៍វិស័យកីឡាមួយនេះ ឲ្យកាន់តែល្អប្រសើរបន្ថែមទៀត គឺមន្ត្រី និងកីឡាករទាំងអស់ត្រូវតែដឹងពីចំណេះដឹងដែលបានបង្ហាញ ហើយអ្វីដែលសំខាន់ជាងគេ គឺត្រូវតែដឹងថាអ្វីខ្លះគឺជាគ្រឿងហាមឃាត់នៅក្នុងវិស័យកីឡា ជាពិសេសក្នុងពេលដែលប្រទេសកម្ពុជា ក៏ត្រូវដំណើរឆ្ពោះទៅទទួលរៀបចំធ្វើជាម្ចាស់ផ្ទះ ការប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលត្រូវតែយល់ដឹងពីចំណេះដឹងនេះ។
លោកអគ្គលេខាធិការបន្ថែមទៀតថា សហព័ន្ធនឹងបន្តផ្ដល់វគ្គមូលដ្ឋានដ៏សំខាន់បែបនេះ អោយបានច្រើន ដោយ លោកស្នើឲ្យសិក្ខាកាមជាគ្រូបង្វឹកទាំងអស់ គប្បីខិតខំប្រឹងប្រែងយកចិត្តទុកដាក់ក្រេបយកចំណេះវិជ្ជា ពីគ្រូឧទ្ទេសឲ្យបានល្អដើម្បីឆ្លងទៅចូលរួមវគ្គសិក្សាកម្រិត២ ដែលគ្រោងនឹងធ្វើឡើងនាពាក់កណ្តាលឆ្នាំ២០២២ និងកម្រិត៣បន្ត ដែលគ្រោងធ្វើនាចុងឆ្នាំ២០២២។ សម្រាប់វគ្គសិក្សាកម្រិតអន្តរជាតិកម្រិត៣ សហព័ន្ធកីឡាទោចក្រយានកម្ពុជា បានស្នើសុំ UCI បញ្ជូនសិក្ខាកាមទៅសិក្សារយៈពេល៣ខែ នៅប្រទេសស្វីស តែម្តង ដោយការសិក្សាក្នុងកម្រឹតទី៣នេះ គឺកម្ពុជាមានលទ្ធភាពបញ្ជូនអោយទៅទទួលការបណ្ដុះបណ្ដាលបានច្រើន អោយតែសិក្ខាកាមជាគ្រូបង្វឹកទាំងអស់ ប្រឡងជាប់តាមកម្រិតនីមួយៗ ដែលទទួលស្គាល់ពី UCI។
លោក នូ ចំរើន ក៏បានលើកទឹកចិត្តដល់គ្រូបង្វឹកទាំងអស់ឲ្យប្រឹងប្រែង ដើម្បីគោលដៅការទទួលធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ ឲ្យទទួលបានជោគជ័យជាប្រវត្តិសាស្ត្រជាលើកដំបូងរបស់កម្ពុជា ហើយទាំងអស់នេះ ក៏ជាដំណើរការអភិវឌ្ឍវិស័យកីឡាទោចក្រយានកម្ពុជា ឆ្ពោះទៅឆ្នាំបន្តបន្ទាប់ទៀត ហើយអ្វីដែលពិសេស គឺកម្ពុជាទើបទទួលបានសិទ្ធិជាផ្លូវការពីមហាសន្និបាតក្រុមប្រឹក្សាកីឡាអូឡាំពិកអាស៊ី កាលពីថ្ងៃទី២១ ខែវិច្ឆិកា ឆ្នាំ២០២១ នៅទីក្រុងឌូបៃ ប្រទេសអារ៉ាប់រួម ក្នុងការរៀបចំទទួលធ្វើម្ចាស់ផ្ទះ ការប្រកួតកីឡាយុវជនអាស៊ី (ASIAN Youth Games) នាឆ្នាំ២០២៩ ខាងមុខ ដោយនឹងប្រើប្រាស់យុវជនអាយុក្រោម១៨ឆ្នាំ ខណៈប្រភេទកីឡាទោចក្រយានកម្ពុជា ក៏ត្រៀមខ្លួនចូលរួមរៀបចំ និងចូលរួមការប្រកួតកីឡាទោចក្រយាន ក្នុងព្រឹត្តិការណ៍យុវជនអាស៊ីនេះផងដែរ។
លោកថា សហព័ន្ធទាំងមូលកំពុងតែមានការឈានឡើង តែទន្ទឹមនឹងការរីកចំរើន ក៏ត្រូវតែប្រាកដពីភាពរឹងមាំ ដែលមិនពាក់ព័ន្ធនឹងសារធាតុញៀ.នផ្សេង ឬគ្រឿងប៉ូវ ដែលអន្តរជាតិមិនទទួលយកនោះផងដែរ៕
ចែករំលែកព័តមាននេះ