ប្រទេសថៃ ៖ ថៃបានក្លាយជាអ្នកនាំចេញអង្ករនាំមុខគេនៅលើពិភពលោកនាត្រីមាសទី១កន្លងមកនេះ ដែលបាននាំចេញអង្ករចំនួន២,៨៥លានតោន ពោលគឺកើនឡើង៣៤% ពីមួយឆ្នាំទៅមួយឆ្នាំ ។
យោងតាមសមាគមនាំចេញអង្ករប្រចាំប្រទេសថៃ បានឲ្យដឹងកាលពីថ្ងៃសុក្រកន្លងទៅនេះថា ការនាំចេញអង្កររបស់ថៃមានទឹកប្រាក់ចំនួន៤៤ប៊ីលានបាត កើនឡើង២៣% បើធៀបនឹងរយៈពេលដូចគ្នាកាលពីឆ្នាំ២០១៥ ។
បើធៀបជាមួយប្រទេសឥណ្ឌាវិញ ការនាំចេញអង្កររបស់ឥណ្ឌាបានកើនឡើង២,៣លានតោន ចាប់ពីខែមករា ដល់ខែមីនា ខណៈការនាំចេញរបស់វៀតណាមបានកើនឡើង១,៤លានតោន, ប៉ាគីស្ថាន១,៣លានតោន និងសហរដ្ឋអាមេរិក៨២០.០០០តោន ។
ទោះជាយ៉ាងណា យោងតាមការចុះផ្សាយរបស់គយវៀតណាម កាលពីថ្ងៃពុធកន្លងមកបានបង្ហាញថា វៀតណាមជាអ្នកនាំចេញអង្ករលេខ៣ នៅលើពិភពលោក ដែលមានចំនួន១,៥៥លានតោន ចំណែកការនាំចេញសម្រាប់ត្រីមាសទី២ ត្រូវបានគេរំពឹងថា នឹងមានចំនួន១,៦លានតោន ។
កម្រិតនៃការនាំចេញរបស់ឥណ្ឌា ត្រូវបានគេព្យាករថា នឹងកើនឡើង២%នៅក្នុងត្រីមាសទីមួយនេះ ខណៈប្រទេសវៀតណាមបានកើនឡើង ៥៨%, សហរដ្ឋអាមេរិកកើនឡើង៤% និងប៉ាគីស្ថានកើនឡើង៩% ។
នៅក្នុងត្រីមាសទី១នេះ អ្នកបញ្ជាទិញធំជាងគេចំនួន៥របស់ថៃ រួមមាន ប្រទេសឥណ្ឌូណេស៊ី (៣១៧.១០០តោន), កូតឌីវ័រ (២៧២.៣៥៤តោន), បេណាំង (២៦៦.២៤៦តោន), ចិន (២៥៧.៧០៨តោន) និងកាមេរូន (១៩១.៨៤៦តោន) ។
ចំណែកការនាំចេញរបស់ថៃក្នុងខែមីនាវិញ មានចំនួន៩៩០.៨៦៤តោន ស្មើនឹងទឹកប្រាក់ប្រមាណ១៥,២ប៊ីលានបាត កើនឡើង២៦% ចំណែកតម្លៃវិញកើនឡើង១៧% ពីមួយឆ្នាំទៅមួយឆ្នាំ ។ សម្រាប់ខែនេះ អ្នកនាំចេញបាននាំអង្ករចេញទៅកាន់ប្រទេសចិន ឥណ្ឌូណេស៊ី ហ្វ៊ីលីពីន និងបណ្តាប្រទេសនៅក្នុងទ្វីបអាហ្វ្រិក ។
សមាគមនាំចេញអង្កររបស់ថៃបានព្យាករថា ការនាំចេញអង្ករនឹងកើនឡើងពី៧០០.០០០ តោន ទៅ៧៥០.០០០តោននៅក្នុងខែមេសា ក្នុងអំឡុងពេលមានពិធីបុណ្យចូលឆ្នាំថ្មីរបស់ថៃ ៕
ចែករំលែកព័តមាននេះ