លោក ថោង ខុន ៖ ការដើរកម្សាន្ត ៤ ថ្ងៃមកនេះជាចរន្តសេដ្ឋកិច្ចដ៏សំខាន់
- ភ្នំពេញ
រាជធានីភ្នំពេញ ៖ លោក ថោង ខុន រដ្ឋមន្ត្រីក្រសួងទេសចរណ៍រយៈពេល ៤ ថ្ងៃ (១៨-២១ វិច្ឆិកា…
រាជធានីភ្នំពេញ ៖ លោក ថោង ខុន រដ្ឋមន្ត្រីក្រសួងទេសចរណ៍រយៈពេល ៤ ថ្ងៃ (១៨-២១ វិច្ឆិកា ២០២១) ក្នុងឱកាសព្រះរាជពិធីបុណ្យអុំទូក ៣ ថ្ងៃបូកនឹងថ្ងៃអាទិត្យនេះ ១ ថ្ងៃទៀត នៅទូទាំងប្រទេសកម្ពុជាទទួលបានភ្ញៀវទេសចរ ១,១៤៧,៣៥៩ នាក់ ក្នុងនោះភ្ញៀវជាតិមាន ១,១៣២,៩០៣ នាក់ និងភ្ញៀវបរទេសផ្ទៃក្នុងមាន ១៤,៤៥៦ នាក់ ។
គោលដៅទេសចរណ៍សំខាន់ៗភ្នំពេញបានទទួលអ្នកទេសចរច្រើនជាងគេរហូតដល់ជាង ២០ ម៉ឺននាក់ បន្ទាប់មក គឺសៀមរាប និងព្រះសីហនុដែលទទួលបានអ្នកទេសចរជាង ១៤ ម៉ឺននាក់ប្រហាក់ប្រហែលគ្នា ចំណែកខេត្តកែប ទទួលបានអ្នកទេចរជាង ៩២ម៉ឺននាក់ ខេត្តពោធិ៍សាត់ ៧៥,៥៧៨ នាក់ ខេត្តបាត់ដំបង ៥៦,៦៧៩ នាក់ ខេត្តកំពង់ស្ពឺ ៥០,៩៦០ នាក់ ខេត្តមណ្ឌលគិរី ៤០,៩១៧នាក់ ខេត្តកណ្តាល ៤០,២០៦ នាក់ ខេត្តកោះកុង ៣៨,៦៥០ នាក់ និងខេត្តរតនគិរី ៣១,៤៥៧ នាក់ ។
ចំនួនភ្ញៀវទេសចរជាង ១ លាននាក់ ក្នុងរយៈពេលជិតមួយសប្តាហ៍នេះ ជាចំនួនដ៏ច្រើនគិតចាប់ពីមានព្រឹត្តិការណ៍សហគមន៍ ២០ កុម្ភៈ ។ ជាក់ស្តែង ចំនួននេះមានការកើនឡើងប្រមាណ ២៥.៨% ធៀបនឹងរយៈពេលដូចគ្នានៃពិធីបុណ្យភ្ជុំបិណ្ឌនាដើមខែតុលា ឆ្នាំ២០២១ កន្លងមក ដែលមានភ្ញៀវទេសចរតែ ៩១១,១៤៧ នាក់ ។
លោក ថោង ខុន បានគូសបញ្ជាក់ថា លំហូរភ្ញៀវទេសចរជិតមួយសប្តាហ៍នេះ បង្កើតបាននូវចរន្តសេដ្ឋកិច្ចដ៏សំខាន់សម្រាប់សេដ្ឋ កិច្ចជាតិ និងសេដ្ឋកិច្ចមូលដ្ឋាន ពិសេសសម្រាប់វិស័យឯកជន និងប្រជាពលរដ្ឋទូទៅ ខណៈដែលប្រតិបត្តិករទេសចរណ៍នានាបានប្រមើលមើលពីកាលានុវត្តភាពនៃការងើបឡើងដ៏រហ័សនៃវិស័យទេសចរណ៍ ។
លោកបន្តថា ទន្ទឹមនឹងនេះ ចរន្តភ្ញៀវទេសចរដ៏ផុសផលនេះ ក៏បានបង្ហាញផងដែរថា មូលដ្ឋានអាជីវកម្ម ផ្នែកឯកជន និងអ្នក រកទទួលទានក្នុងវិស័យទេសចរណ៍បានត្រៀមខ្លួនរួចរាល់ក្នុងការចូលរួមស្តារ និងលើកកម្ពស់វិស័យទេសចរណ៍ក្រោយវិបត្តិជំងឺកូវីដ-១៩ តាមរយៈការរៀបចំ និងកែលម្អទម្រង់ធុរកិច្ច និងអាជីវកម្មរបស់ខ្លួនក្នុងគន្លងប្រក្រតីភាព ក៏ដូចជាដើម្បីត្រៀមទទួលភ្ញៀវទេសចរអន្តរជាតិនាពេលខាងមុខឆាប់ៗនេះផងដែរ ៕
ចែករំលែកព័តមាននេះ