ប្រទេសសិង្ហបុរី ៖ ការលក់អចលនទ្រព្យរបស់សិង្ហបុរីបានធ្លាក់ចុះ៧៤% ស្មើនឹង១,៧៥ប៊ីលានដុល្លារនៅក្នុងត្រីមាសដំបូងឆ្នាំនេះ បើធៀបនឹងត្រីមាសទី៤ ឆ្នាំ២០១៥ ស្មើនឹង៦,៧ប៊ីលានដុល្លារ ។ នេះបើតាមការលើកឡើងរបស់អ្នកប្រឹក្សានៃក្រុមហ៊ុន DTZ ។
ចំនួននៃកិច្ចព្រមព្រៀងវិនិយោគក្នុងឆ្នាំ២០១៦នេះ គឺមានកម្រិតទាបបំផុត បើគិតចាប់ពីត្រីមាសទី៣ឆ្នាំ២០០៩មក ស្របពេលដែលពិភពលោកកំពុងតែជួបវិបត្តិហិរញ្ញវត្ថុសកល ។ ការលក់វិនិយោគមានទឹកប្រាក់ទាបស្មើនឹង១៩២លានដុល្លារនៅក្នុងត្រីមាសទី១ ឆ្នាំ២០០៩ ។ នេះបើតាមរបាយការណ៍បង្ហាញដោយក្រុមហ៊ុន DTZ ដែលបានចុះផ្សាយកាលពីថ្ងៃចន្ទកន្លងមក ។
ក្រុមហ៊ុនបញ្ជាក់ថា ការធ្លាក់ចុះនៃការលក់វិនិយោគនាពេលថ្មីៗនេះ គឺជាផ្នែកមួយនៃការរួមចំណែកក្នុងភាពមិនប្រាកដប្រជានៃសេដ្ឋកិច្ចសកល ដែលជាសញ្ញារួមគ្នានៃកំណើនសេដ្ឋកិច្ចចិន ។ ការចុះផ្សាយពីទិន្នន័យធ្លាក់ចុះក្នុងប្រទេសសិង្ហបុរី ចាប់ពីខែមករា ឆ្នាំ២០១៦មក ជាហេតុធ្វើឲ្យការវិនិយោគធ្លាក់ចុះ និងបណ្តាលឱ្យមានគម្លាតតម្លៃរវាងអ្នកបញ្ជាទិញ និងអ្នកលក់កាន់តែធំឡើងផងដែរ ។
ការលក់ដីធ្លីរបស់រដ្ឋាភិបាល (GLS) បានគ្របដណ្តប់ទៅលើការលក់អចលនទ្រព្យនៅក្នុងត្រីមាសទី១ ឆ្នាំ២០១៦ ដែលមានអត្រាប្រមាណ៧០%នៃការលក់សរុប ឬស្មើនឹង១,២ប៊ីលានដុល្លារ ។
យោងតាមរបាយការណ៍ឲ្យដឹងទៀតថា វិនិយោគិនសិង្ហបុរីបានងាកទៅវិនិយោគលើអចលនទ្រព្យនៅក្រៅប្រទេស ។ ក្នុងនោះការលក់វិនិយោគលើទីផ្សារឯកជនបានធ្លាក់ចុះពី៥,១ប៊ីលានដុល្លារ ទៅ៥២១,៩០លានដុល្លារនៅត្រីមាសទី១ឆ្នាំនេះ ខណៈការវិនិយោគសរុបនៅក្រៅប្រទេសមានទឹកប្រាក់យ៉ាងហោចណាស់ ក៏២,០៥ប៊ីលានដុល្លារដែរ ។
លោកស្រី Swee Shou Fern អគ្គនាយិកាជាន់ខ្ពស់នៃក្រុមហ៊ុនប្រឹក្សាសេវាកម្មវិនិយោគ មានប្រសាសន៍ថា ៖ « ទោះបីជាមានប្រតិបត្តិការតិចតួចនៅក្នុងត្រីមាសដំបូងក្តី ក៏វិនិយោគិនបរទេស និងក្នុងស្រុកនៅតែសម្លឹងមើលការវិនិយោគក្នុងវិស័យអចលនទ្រព្យនៅសិង្ហបុរីផងដែរ » ៕
ចែករំលែកព័តមាននេះ