អភិរាជធានីភ្នំពេញចុះពិនិត្យ និងជំរុញផែនការអភិវឌ្ឍន៏ហេដ្ឋារចនាសម្ព័ន្ធតំបន់បឹងកក់
រាជធានីភ្នំពេញ ៖ អភិបាលរាជធានីភ្នំពេញ លោក ប៉ា សុជាតិវង្ស កាលពីរសៀលថ្ងៃទី២៧មេសា២០១៦ បានដឹកនាំមន្ត្រីជំនាញក្រោមឱវាទចុះពិនិត្យមើល
រាជធានីភ្នំពេញ ៖ អភិបាលរាជធានីភ្នំពេញ លោក ប៉ា សុជាតិវង្ស កាលពីរសៀលថ្ងៃទី២៧មេសា២០១៦ បានដឹកនាំមន្ត្រីជំនាញក្រោមឱវាទចុះពិនិត្យមើលស្ថានភាពជាក់ស្តែងគម្រោងអភិវឌ្ឍន៍នៅក្នុងតំបន់បឹងកក់ ដែលក្រុមហ៊ុនបានទទួលសិទ្ធិអភិវឌ្ឍន៍កំពុងដំណើរការយ៉ាងសស្រាក់សស្រាំ។ ការចុះពិនិត្យដោយថ្មើរជើងនេះ លោក ប៉ា សុជាតិវង្ស បានជំរុញឲ្យមានការរៀបចំតភ្ជាប់ផ្លូវក្រោយសណ្ឋាគារភ្នំពេញកាត់តាមវិហារឥស្លាមចេញទៅផ្លូវក្នុងតំបន់បឹងកក់ ឬហៅថាផ្លូវR4 តភ្ជាប់ផ្លូវR9 និងផ្លូវR10 ដែលជាផ្លូវរំដោះចរាចរពីតំបន់ទួលគោកទៅជ្រោយចង្វា ឬកាល់ម៉ែត និងផ្លូវមួយខ្សែដែលភ្ជាប់ពីមហាវិថីសហព័ន្ធរុស្ស៊ី ទៅកាន់ចំណុចភ្លើងស្តុបផ្លូវលេខ៧០ ដើម្បីសម្រួលដល់ការធ្វើចរាចររបស់ប្រជាពលរដ្ឋនៅតំបន់នោះ ។
ការស្ថាបនាស្ថានីយបូមទឹកទួលគោក២ ដែលបាននឹងកំពុងសាងសង់នៅលើប្រឡាយបាក់ទូក ដើម្បីបង្ហូរទឹកទៅភាគខាងជើងនៃរាជធានីភ្នំពេញឲ្យបានរួចរាល់មុនរដូវវស្សាខាងមុខនេះ។ មន្ត្រីជំនាញមន្ទីរសាធារណៈការ និងដឹកជញ្ជូនរាជធានីភ្នំពេញបានឲ្យដឹងថា ស្ថានីយបូមទឹកថ្មីនេះ ត្រូវបានស្ថាបនាសម្រេចបាន៨០ភាគរយហើយ ។ នៅពេលចប់រួចរាល់ស្ថានីយនេះ មានសមត្ថភាពអាចបូមទឹករហូតដល់៥ម៉ែត្រគូប ក្នុងមួយវិនាទី ដែលលើសពីស្ថានីយចាស់ចំនួន៣ដង ហើយជាកន្លែងបញ្ចេញទឹកពីតំបន់ផ្សារដេប៉ូ តំបន់៧មករា កម្ពុជាក្រោម ជាដើម។លោក ប៉ា សុជាតិវង្ស បានលើកឡើងថា ការអភិវឌ្ឍន៍តំបន់បឹងកក់ត្រូវតែធ្វើឲ្យបានលឿន ដើម្បីដោះស្រាយបញ្ហាកកស្ទះចរាចរ និងទឹកលិចជុំវិញតំបន់បឹងកក់ឲ្យប្រសើរនាពេលឆាប់ៗនេះ។
ដីតំបន់បឹងកក់ទំហំប្រមាណ១០០ហិកតា ដែលកន្លងមកមានតែទឹកស្អុយ ភក់ជ្រាំ និងសំណង់មិនរៀបរយ តែពេលនេះត្រូវបានរាជរដ្ឋាភិបាលជួលទៅឲ្យក្រុមហ៊ុន ស៊ូកាគូអ៊ីន ធ្វើការវិនិយោគរយៈពេល៩៩ឆ្នាំ ដើម្បីប្រែក្លាយតំបន់នោះ ឲ្យទៅជាតំបន់សេដ្ឋកិច្ច និងទេសចរណ៍ដ៏ទាក់ទាញ។ ដោយមានប្រព័ន្ធផ្លូវថ្នល់ ភ្លើងអគ្គិសនី និងអគារទំនើបជាដើម ។ តាមរយៈការអភិវឌ្ឍន៏នេះ បានធ្វើឲ្យមានការដោះដូរលំនៅឋានរបស់ប្រជាពលរដ្ឋចំនួន៤.២៥២គ្រួសារ ក្នុងនោះជាង៣.០០០គ្រួសារ បានទទួលគោលនយោបាយទៅរស់នៅកន្លែងថ្មី និងជាង១.០០០គ្រួសារទៀត ទទួលបានការអភិវឌ្ឍន៍នៅនឹងកន្លែង ៕
ចែករំលែកព័តមាននេះ