បណ្តាអ្នកជំនាញបាននិយាយថា ស្ត្រីដែលគ្រួសាររបស់ខ្លួនធ្លាប់មានប្រវត្តិកើតជំងឺមហារីកដោះគួរតែចៀសវាងការទទួលទានស្រា ។ យោងតាមការសិក្សាមួយបានបង្ហាញថា បណ្តាស្ត្រីមានសាច់សន្តានធ្លាប់កើតជំងឺខាងដើមហើយចូលចិត្តផឹកស្រានោះ ប្រឈមទៅរកការកើតដុំសាច់ benign tumours ជាងអ្នកមិនផឹកស្រាដល់ទៅជាង២ដង ។
ការអះអាងនេះបានកើតចេញបន្ទាប់ពីមានការសិក្សាស្រាវជ្រាវមួយធ្វើឡើងដោយអ្នកវិទ្យាសាស្ត្រមកពីសាកលវិទ្យាល័យ Harvardដែលបានពិនិត្យតាមដានលើក្មេងស្រីប្រមាណជា៧០០០នាក់អាយុចាប់ពី៩ទៅ១៥ឆ្នាំ ដោយបានប្រើអស់រយៈពេល៩ឆ្នាំ ។ ក្នុងចំណោមនេះមាន១៧% មានម្តាយ ម្តាយមីង ឬក៏ជីដូនធ្លាប់កើតជំងឺមហារីកដោះ ។
សាស្ត្រាចារ្យដឹកនាំការស្រាវជ្រាវឈ្មោះ Catherine Berkey បាននិយាយថា ស្ត្រីវ័យក្មេង និងវ័យជំទង់មកពីគ្រួសារដែលកើតជំងឺមហារីកដោះគួរតែយល់ដឹងថា ការទទួលទានគ្រឿងស្រវឹងអាចប្រឈមនឹងការកើតមានការកើតដុំសាច់ ឬក៏មហារីកដោះក្នុងថ្ងៃខាងមុខ ។ លោកបានបន្ថែមថា «គ្រឿងស្រវឹងគឺជាផ្នែកមួយដែលនាំឲ្យកើតជំងឺមហារីកដោះ» ។
ក្រុមអ្នកស្រាវជ្រាវក្នុងពេលឥឡូវនេះកំពុងតែស្នើឲ្យមានការកាត់បន្ថយការប្រើប្រាស់គ្រឿងស្រវឹងក្នុងនាមជាមធ្យោបាយលុបបំបាត់ការប្រឈមនឹងជំងឺមហារីកដោះ ។ ៩០ភាគរយនៃដំពកនៅលើដោះស្ត្រីមិនមែនជាមហារីកទេ ប៉ុន្តែវាត្រូវបានគេគិតថាជាផ្នែកមួយយ៉ាងសំខាន់ដែលនាំឲ្យកើតជំងឺមហារីកដោះ ។
តាមការសិក្សាមួយកាលពីឆ្នាំ២០០៨ដោយ Mayo Clinic បានបង្ហាញថា ស្ត្រីរងការប៉ះពាល់ដោយការកើតដុំសាច់ benign tumours ដែលគេស្គាល់ថា Atypical Hyperplasia ប្រឈមនឹងការកើតជំងឺមហារីកដល់ទៅជាង៦ដង ។
បើទោះជាមានការរកឃើញយ៉ាងនេះក្តី ប៉ុន្តែអ្នកជំនាញឯករាជ្យម្នាក់បាននិយាយថា ដំបូន្មានឲ្យបោះបង់ការផឹកស្រាមិនទំនងជាធ្វើឲ្យមានការថយចុះអត្រាប្រឈមនឹងជំងឺមហារីកដោះនោះឡើយ ៕
ចែករំលែកព័តមាននេះ