រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់បានបើកបររថយន្តតូយ៉ូតាព្រូសមួយគ្រឿងក្នុងល្បឿនយ៉ាងលឿនទាំងមេឃកំពុងធ្លាក់ភ្លៀងជោកជាំផង រួចក៏ជ្រុលចង្កូតរថយន្តរអិលធ្លាក់ចូលក្នុងរណ្ដៅដីរបស់ការដ្ឋានជួសជុលប្រព័ន្ធបង្ហូរទឹកស្អុយ ដែលគេជីកដើម្បីដាក់លូ បង្កឲ្យមានការភ្ញាក់ផ្អើលឡើងកាលពីវេលាម៉ោង៧និង៤០នាទីយប់ ថ្ងៃទី១១ ខែវិច្ឆិកា ឆ្នាំ២០២១ ត្រង់ចំណុចខាងមុខសាលា អេស្ទើនអន្តរជាតិ តាមបណ្ដោយផ្លូវ15B ស្ថិតក្នុងភូមិត្រពាំងឈូក សង្កាត់អូបែកក្អម ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានឲ្យដឹងថា ការដ្ឋានជួសជុលប្រព័ន្ធបង្ហូរទឹកស្អុយនៅត្រង់ចំណុចកើតហេតុនោះ គឺបានដំណើរអស់រយៈពេលជាងមួយខែមកហើយ ដោយបានជីកកាយដីផ្លូវជម្រៅ៥ម៉ែត្រ ទំហំ៣ម៉ែត្រ និងប្រវែង១០ម៉ែត្រ ដែលធ្វើឲ្យកំណាត់ផ្លូវ15B នោះ ត្រូវផ្អាកជាបណ្ដោះអាសន្នមិនអាចធ្វើដំណើរឆ្លងកាត់បាននោះទេ ប៉ុន្តែក្រុមការងារដែលបម្រើការនៅក្នុងការដ្ឋាននោះ មិនបានយកស្លាកសញ្ញាសំគាល់ទៅដាក់ប្រាប់អ្នកដំណើរពីដើមផ្លូវ ឬឆ្ងាយពីការដ្ឋានដើម្បីឲ្យអ្នកដំណើរដែលមានបំណងចង់បើកកាត់ផ្លូវនោះបានដឹងនោះទេ តែបែរជាដាក់បាំងត្រឹមការដ្ឋានដែលកំពុងដំណើរតែប៉ុណ្ណោះ។
ប្រភពដដែលបន្តថា លុះដល់វេលាកើតហេតុ ខណៈពេលដែលមេឃកំពុងតែធ្លាក់ភ្លៀងជោកជាំផងនោះ ក៏ឃើញមានបុរសម្នាក់បើកបររថយន្តមួយគ្រឿងម៉ាក តូយ៉ូតាព្រូស ពណ៌ទឹកប្រាក់ ពាក់ស្លាកលេខ ភ្នំពេញ2AU-1171 បានធ្វើដំណើរតាមបណ្ដោយផ្លូវ15B ទិសដៅពីជើងទៅត្បូង និងក្នុងល្បឿនលឿន។ លុះដល់ចំណុចកើតហេតុ រថយន្តក៏អក់ហ្សើជាមួយការដ្ឋាននោះ និងបានជាប់ហ្វ្រាំងដែរ តែមិនជាប់ រួចក៏បណ្ដាលឲ្យរថយន្តរអិលធ្លាក់ដាំក្បាលចូលទៅក្នុងរណ្ដៅរបស់ការដ្ឋានតែម្តង។
ប្រភពដដែលបន្តទៀតថា ភ្លាមៗនោះ បុរសជាអ្នកបើកបររថយន្តក៏បានចេញពីក្នុងរថយន្តដោយសុវត្ថិភាព រួចក៏បានឡើងចេញពីក្នុងរណ្ដៅនោះ ហើយក៏បានដើរចេញពីកន្លែងកើតហេតុបាត់ស្រមោលតែម្តង បន្សល់ទុកតែរថយន្ត រួចក៏ត្រូវបានសមត្ថកិច្ចចុះមកអន្តរាគមន៍ផងដែរ។
ក្រោយពេលកើតហេតុ ក៏មានសាច់ញាតិរបស់អ្នកបើកបររថយន្តបានមកដល់ទីតាំងកន្លែងកើតហេតុ ប៉ុន្តែដោយសាររថយន្តមិនបានបង្កឲ្យមានការខូចខាត ឬគ្រោះថ្នាក់ដល់អ្នកដទៃនោះ ទើបសមត្ថកិច្ចព្រមឲ្យម្ចាស់រថយន្តធ្វើការស្ទូចយករថយន្តរបស់ខ្លួនចេញពីកន្លែងកើតហេតុតែម្ដង៕
ចែករំលែកព័តមាននេះ