ទប់ស្កាត់ការរត់ពន្ធឈើជន្លង់ម្រេច ឆ្លងចូលទឹកដីវៀតណាម
ខេត្តក្រចេះ៖ ក្រោយពិនិត្យឃើញថា ការរត់ពន្ធឈើជន្លង់ម្រេចមិនត្រឹមតែបង្កភាព អនាធិបតេយ្យ និងថែមទាំងបង្កគ្រោះចរាចរលើផ្លូវជាតិជាញឹកញាប់
ខេត្តក្រចេះ៖ ក្រោយពិនិត្យឃើញថា ការរត់ពន្ធឈើជន្លង់ម្រេចមិនត្រឹមតែបង្កភាព អនាធិបតេយ្យ និងថែមទាំងបង្កគ្រោះចរាចរលើផ្លូវជាតិជាញឹកញាប់ បណ្ដាលឲ្យមានមនុស្សស្លាប់ជាច្រើននាក់។ អាជ្ញាធរបានបង្កើនការរឹតបន្តឹងដោយប្រើប្រាស់ វិធានការច្បាប់ចរាចរ ចាប់ឃាត់រថយន្តនិងតម្រូវបង់ផាកពិន័យធ្វើកិច្ចសន្យាជាមួយម្ចាស់រថយន្តប្រភេទសាំយ៉ុងដឹកជន្លង់ម្រេចទាំងនោះ ឲ្យបញ្ឈប់កែច្នៃរថយន្តខុសពីលក្ខណៈ បច្ចេកទេស។
ការរត់ពន្ធឈើជន្លង់ម្រេច ដែលបានកើតមានរយៈពេលរាប់សិបឆ្នាំមកហើយនោះ សព្វថ្ងៃត្រូវបានគេមើលឃើញថា កាន់តែមានសកម្មភាពកាន់តែខ្លាំងឡើង។ មិនត្រឹមតែបង្កឲ្យវិនាសធ្ងន់ធ្ងរដល់ឈើលេខ១ប្រភេទសុក្រំ និងផ្ចឹកប៉ុណ្ណោះទេ ជាងនេះទៅទៀត ក្រុមរថយន្តដឹកឈើជន្លង់ម្រេចរត់ពន្ធដោយខុសច្បាប់ទាំងនោះ តែងតែបង្កគ្រោះថ្នាក់ជាញឹកញាប់ដល់អ្នកធ្វើដំណើរទៅមកគ្រប់មធ្យោបាយ ដោយសារការបើកវ៉ាជែងគ្នា ដើម្បីរត់គេចពីការបង់លុយឲ្យក្រុមកុងត្រូល ហើយនៅរាល់គ្រោះថ្នាក់គឺតែងតែ ធ្វើឲ្យមានមនុស្សស្លាប់ និងកំពុងតែធ្វើឲ្យមជ្ឈដ្ឋានមហាជន ពិសេសអ្នកធ្វើដំណើរលើ ដងផ្លូវកំពុងតែមានការព្រួយបារម្ភជាខ្លាំងលើសុវត្ថិភាពការធ្វើដំណើរ។
ស្រុកស្នួល ត្រូវបានគេមើលឃើញថា ជាស្រុកមួយដែលមានភាពអនាធិបតេយ្យធ្ងន់ធ្ងរជាងគេ លើការរត់ពន្ធជន្លង់ម្រេច ដែលបានលួចដឹកជញ្ជូនពីតំបន់នានា យកនាំចូលទៅប្រទេសវៀតណាម ដោយខុសច្បាប់ក្រោមរូបភាពជាឈើសម្រាប់ទ្រទ្រង់ដំណាំកសិកម្ម។ ស្របគ្នានេះដែរការដាក់កុងត្រូលជជុះខុសច្បាប់ ពីក្រុមស្ថាប័នសមត្ថកិច្ចជាច្រើនស្ថាប័នដែលអះអាងមានភារកិច្ចបង្ក្រាប និងទប់ស្កាត់បទល្មើសដឹកឈើ ក៏កើតមានយ៉ាង ស្អេកស្កះពេញផ្លូវជាតិលេខ៧ ក្នុងស្រុកស្នួល តែវិធានការបង្ក្រាបណាមួយហាក់នៅមិនទាន់មានប្រសិទ្ធភាពនៅឡើយ។
សេចក្តីរាយការណ៍ជាលើកចុងក្រោយឲ្យដឹងថា ក្រៅពីធ្លាប់បង្កឲ្យមានមនុស្សប្រុស ស្រីជាច្រើននាក់ បានស្លាប់ដោយគ្រោះថ្នាក់ចរាចរ ដែលបង្កឡើងដោយរថយន្តដឹកឈើជន្លង់ម្រេច ដូចជាបង្កការក្រឡាប់ដោយខ្លួនឯង និងការបើកបុករះ ធ្វើឲ្យអ្នកដទៃស្លាប់ កាលពីអំឡុងប៉ុន្មានថ្ងៃមុននេះ មានមនុស្សស្រីយ៉ាងតិច៣នាក់ត្រូវបានស្លាប់ នៅលើផ្លូវជាតិបន្ទាប់ពីពួកគេបានជិះម៉ូតូ និងត្រូវរថយន្តសាំយ៉ុងដឹកជន្លង់ម្រេចបានបុកបណ្តាលឲ្យស្លាប់ ភ្លាមៗនៅលើផ្លូវជាតិ ក្នុងស្រុកស្នួល។
នៅជុំវិញវិធានការរបស់កម្លាំងនគរបាលចរាចរ ចុះរឹតបន្តឹងការអនុវត្តច្បាប់ចរាចរ ពិសេសប្រភេទរថយន្តសាំយ៉ុងកែច្នៃដឹកឈើជន្លង់ម្រេចនេះ អធិការរងនគរបាលស្រុកស្នួល ទទួលបន្ទុកសណ្តាប់ធ្នាប់ លោកកែ វិណូ បានឲ្យដឹងនៅថ្ងៃទី២២ មេសា នេះថា ក្រោយការ ចុះអនុវត្តបានពីរថ្ងៃ នគរបាលចរាចរបានចាប់ឃាត់ពពួករថយន្តដឹកឈើជន្លង់ម្រេច បានចំនួនជិត៤០គ្រឿងមក ធ្វើការផាកពិន័យ និងតម្រូវឲ្យម្ចាស់រថយន្តធ្វើកិច្ចសន្យាឲ្យ បញ្ឈប់ការកែច្នៃរថយន្តខុសលក្ខណៈបច្ចកទេស៕
ចែករំលែកព័តមាននេះ