រាជធានីភ្នំពេញ ៖ បុរសជាកម្មករលីសែងម្នាក់ ត្រូវបានប៉ូលិសប៉ុស្ដិ៍ស្វាយប៉ាកធ្វើការឃាត់ខ្លួន កាលពីវេលាម៉ោង១២ថ្ងៃ ត្រង់ថ្ងៃទី២៨ មីនា បន្ទាប់ពីបានទទួលពាក្យបណ្ដឹងចោទប្រកាន់ថា បុរសរូបនេះបានរំលោភសេពសន្ថវៈលើក្មេងស្រីអាយុ៩ឆ្នាំ តាំងពីព្រឹកថ្ងៃទី២៥ មីនា នៅក្នុងភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ ។ជនសង្ស័យដែលត្រូវចាប់ខ្លួននេះ សមត្ថកិច្ចប៉ូលិសបានឱ្យដឹងថា ឈ្មោះប៉ុន ម៉ុន ភេទប្រុស អាយុ៤៨ឆ្នាំ ជាកម្មករលីសែង ស្នាក់ នៅផ្ទះជួល ក្នុងក្រុមទី២ ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ ។
យោងតាមពាក្យបណ្ដឹងរបស់ម្ដាយក្មេងស្រីរងគ្រោះបញ្ជាក់ថា កាលពីវេលាម៉ោង៩ ព្រឹកថ្ងៃទី២៥ មីនា ក្មេងស្រីរងគ្រោះអាយុ៩ ឆ្នាំ រួមទាំងមិត្ដភក្ដិម្នាក់ទៀតអាយុ១២ឆ្នាំ ជាជនជាតិវៀតណាមបានបបួលគ្នាដើរលេងហើយបានចេញពីផ្ទះនៅក្នុងភូមិស្វាយប៉ាក ទៅលេងនៅម្ដុំផ្ទះជួលមួយកន្លែងដែលពួកគេធ្លាប់ស្នាក់នៅស្ថិតនៅក្បែរផ្ទះជួលរបស់ជនសង្ស័យដែរ ។ ខណៈនោះស្រាប់តែជនសង្ស័យឈ្មោះប៉ុន ម៉ុន បានឱ្យនំដល់ក្មេងស្រីទាំង២ ម្នាក់មួយកញ្ចប់ ហើយជនសង្ស័យបានឱ្យក្មេងស្រីម្នាក់អាយុ១២ឆ្នាំត្រលប់ទៅផ្ទះវិញ ។ នៅសល់តែក្មេងស្រីរងគ្រោះអាយុ៩ឆ្នាំ ត្រូវជនសង្ស័យហៅចូលទៅក្នុងផ្ទះឱ្យដេកផ្ងារនៅលើឥដ្ឋ រួចបានចាប់ស្រាតខោ ធ្វើសកម្មភាពចាប់រំលោភក្មេងស្រីនោះរហូតដល់បានសំរេច ព្រមទាំងដាច់រលាត់រហូតដល់ធ្លាក់ឈាមទៀតផង។
ចែករំលែកព័តមាននេះ