រាជធានីភ្នំពេញ ៖ លោកប៉ា សុជាតិវង្ស អភិបាលរាជធានីភ្នំពេញ បានធ្វើការព្រមានត្រង់ៗទៅអភិបាលគ្រប់ខណ្ឌក្រោមឱវ៉ាទ គឺតម្រូវឲ្យមានការទទួលខុសត្រូវ ជាពិសេសលើការងារជួសជុល និងថែទាំប្រព័ន្ធផ្លូវថ្នល់ និងប្រព័ន្ធលូក្នុងភូមិសាស្ត្ររបស់ខ្លួន ដើម្បីសម្រួលដល់ការធ្វើចរាចរណ៍ និងការរស់នៅរបស់ប្រជាពលរដ្ឋ បើការងារនេះ ធ្វើមិនបានទេ មានន័យថា អសមត្ថភាព ចឹងគួរដើរចេញតែម្តងទៅ ទុកឲ្យគេមានសមត្ថភាពធ្វើម្តង ។ ការព្រមានរបស់លោកប៉ា សុជាតិវង្ស នេះ នៅសាលារាជធានីភ្នំពេញ ព្រឹកថ្ងៃទី២១ មេសា ២០១៦ ក្នុងកិច្ចប្រជុំពិភាក្សាទៅលើគម្រោងផែនការដោះស្រាយការកកស្ទះចរាចរណ៍ក្នុងរាជធានីភ្នំពេញ ។
លោកប៉ា សុជាតិវង្ស អភិបាលរាជធានីភ្នំពេញ បានលើកឡើងថា សាលារាជធានីភ្នំពេញ បានប្រគល់ការងារជួសជុល ថែទាំផ្លូវថ្នល់ លូ ខាងលើនេះ វាគឺជាម៉ែត្រសម្រាប់វាស់ស្ទង់សមត្ថភាពការងាររបស់អភិបាលខណ្ឌទាំងអស់តែម្តង តើអាចធ្វើបាន ឬមិនបាន បើអនុវត្តការងារនេះមិនបានទេ ចឹងល្មមដើរចេញហើយ ។ លោកបន្តថា ក្នុងការងារនេះ សាលារាជធានីភ្នំពេញបានប្រជុំដាក់ផែនការឲ្យអភិបាលខណ្ឌប្រមាណមួយខែ ហើយមិនទាន់មានការកម្រើកសោះ គឺមានតែខណ្ឌមួយគត់ដែលបានធ្វើបញ្ជីអនុឡោមនុភាព បញ្ជូនឲ្យសាលារាជធានីភ្នំពេញ ។
លោកប៉ា សុជាតិវង្ស បានបញ្ជាក់ថា អភិបាលខណ្ឌទាំងអស់កុំឆ្វេកឆ្វាច ត្រូវប្រាកដប្រជាជាមួយការងារ ត្រូវចេះប្រមូលផ្តុំបញ្ហា ដើម្បីយកមកធ្វើការដោះស្រាយ ចំពោះការចំណាយក្នុងផែនការជួសជុលផ្លូវ និងលូនោះ គឺសាលារាជធានីភ្នំពេញជាអ្នកចំណាយទាំងស្រុង ។
លោកប៉ា សុជាតិវង្ស ក៏បានលើកឡើងផងដែលអំពីផែនការ ៣.២.១ ដោយសាលារាជធានីភ្នំពេញនៅតែបន្តអនុវត្តន៍ តែមានការផ្លាស់ប្តូរ និងបន្ថែមនូវចំណុចខ្លះបានណែនាំ និងជម្រុញអំពីការងារផ្តល់សេវាសាធារណៈជូនប្រជាពលរដ្ឋ ដើម្បីកាត់បន្ថយការថ្នាំងថ្នាក់ ។ ក្រៅពីនេះ អភិបាលរាជធានីភ្នំពេញក៏បានទម្លាក់ការទទួលខុសត្រូវមួយចំនួនទៀតឲ្យខណ្ឌគ្រប់គ្រងដោយផ្ទាល់ផងដែរ ដូចជា ចូលរួមថែរក្សា និងទទួលខុសត្រូវចំពោះភ្លើងស្តុប ដែលមាននៅក្នុងមូលដ្ឋានរបស់ខ្លួន និងជួយសម្រួលការកកស្ទះចរាចរណ៍ ព្រមទាំងចុះស្តារអណ្តូង លូ ដើម្បីត្រៀមរំដោះទឹកនៅរដូវភ្លៀងធ្លាក់ខាងមុខនេះផងដែរ ។
ទាក់ទិនទៅនឹងបញ្ហាចរាចរណ៍ លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា ភាពស្មុគស្មាញ និងបញ្ហានៃការកកស្ទះចរាចរណ៍ បណ្តាលមកពីការរំលោភចំណីផ្លូវ មិនគោរពច្បាប់ចរាចរណ៍ មធ្យោបាយដឹកជញ្ជូនកើនយ៉ាងគំហុក កង្វះខាតមធ្យោបាយដឹកជញ្ជូនសាធារណៈ ខ្វះខាតស្លាកសញ្ញាចរាចរណ៍ និងភ្លើងស្តុប។ ចំពោះបញ្ហានៃការកកស្ទះខ្លាំងមានច្រើនទីតាំង ដូចជា តំបន់ភ្លើងស្តុប BKC ផ្សារដីហុយ ផ្សារដើមគរ ផ្សារដេប៉ូ ផ្លូវណតប្រ៊ីត ចោមចៅ ផ្លូវជើងឯកត្រង់ស្ពានដែក ផ្លូវឡើងផ្សារដើមថ្កូវ ផ្សារតូច រង្វង់មូលទួលគោក ផ្លូវ២៧១ និងរង្វង់មូលកាំកូស៊ីតធីជាដើម ។
លោក សាំ ពិសិដ្ឋ បានឲ្យដឹងទៀតថា មកដល់ពេលនេះ ភ្លើងស្តុបនៅរាជធានីភ្នំពេញកំពុងដំណើរការមានចំនួន៩៤កន្លែងហើយក្នុងពេលនេះ សាលារាជធានីភ្នំពេញកំពុងបំពាក់ភ្លើងស្តុបថ្មីចំនួន១៣ទីតាំងបន្ថែមទៀត ដែលកំពុងដាក់ឲ្យដំណើរការជាបន្តបន្ទាប់។ ចំណែកឯភ្លើងស្តុបចំនួន១០០ទីតាំង ដែលបានចាប់ផ្តើមពីខែមីនា ២០១៦ នឹងត្រូវបញ្ចប់នៅខែមេសា ២០១៧ នេះ ក្នុងនោះមានការផ្លាស់ប្តូរភ្លើងស្តុបចាស់ៗនៅក្នុងក្រុងចំនួន៦៤ទីតាំង មានការបំពាក់កាមេរ៉ាចំនួន២៦ និងបន្ទប់កុងត្រូរួមមួយនៅមន្ទីរសាធារណការ ប៉ុន្តែទោះជាយ៉ាងណានាពេលបច្ចុប្បន្ននេះ ភ្លើងស្តុបចំនួន៦ទីតាំងត្រូវបានផ្អាកដំណើរការ ដោយសារមានការដ្ឋានស្ថាបនាផ្លូវ និងដាក់លូផងដែរ ៕
ចែករំលែកព័តមាននេះ