- ភ្នំពេញ
ភ្នំពេញ៖ យូរឆ្នាំណាស់មកហើយ ដែលប្រមុខដឹកនាំកម្ពុជា បានប្រកាសថា ការគំរាម ដាក់សម្ពាធ និងកៀបសង្កត់មកលើកម្ពុជា ពីសំណាក់សហគមន៍អន្តរជាតិ ពិសេសប្រទេសលោកខាងលិច ប្រជាធិបតេយ្យសេរី…
ភ្នំពេញ៖ យូរឆ្នាំណាស់មកហើយ ដែលប្រមុខដឹកនាំកម្ពុជា បានប្រកាសថា ការគំរាម ដាក់សម្ពាធ និងកៀបសង្កត់មកលើកម្ពុជា ពីសំណាក់សហគមន៍អន្តរជាតិ ពិសេសប្រទេសលោកខាងលិច ប្រជាធិបតេយ្យសេរី…
ភ្នំពេញ៖ យូរឆ្នាំណាស់មកហើយ ដែលប្រមុខដឹកនាំកម្ពុជា បានប្រកាសថា ការគំរាម ដាក់សម្ពាធ និងកៀបសង្កត់មកលើកម្ពុជា ពីសំណាក់សហគមន៍អន្តរជាតិ ពិសេសប្រទេសលោកខាងលិច ប្រជាធិបតេយ្យសេរី ដូចជា សហរដ្ឋអាមេរិក និងសហភាពអឺរ៉ុប ជាដើមនោះ គឺលែងមានឥទ្ធិពលអ្វីតទៅទៀតហើយ។ មូលហេតុ ដោយសារតែកម្ពុជា សំអាងលើឯករាជ្យ អធិបតេយ្យជាតិ ដែលមិនអាចមានបរទេសណា មករំលោភបំពានបានឡើយ។ តែមែនទែនទៅ ក៏ដោយសារតែសេដ្ឋកិច្ចកម្ពុជា រីកចម្រើន ហើយក៏មិនពឹងផ្អែកទាំងស្រុងលើអាមេរិក ឬអឺរ៉ុប ដែលចង់ដាក់ការកៀបសង្កត់លើកម្ពុជា ក្រោមលក្ខខណ្ឌប្រជាធិបតេយ្យ សេរីភាព និងសិទ្ធិមនុស្សនោះទេ តែកម្ពុជា មានមហាអំណាចចិន នៅពីក្រោយ ជាខ្នងបង្អែកយ៉ាងរឹងមាំ។
ជាថ្មីម្តងទៀត ក្នុងពិធីសម្ពោធដាក់ឲ្យដំណើរការអគារថ្មីនៃក្រសួងរៀបចំដែនដី នគរូបនីយកម្ម និងសំណង់ នាព្រឹកថ្ងៃទី៨ ខែវិច្ឆិកា ឆ្នាំ២០២១ សម្តេចតេជោ នាយករដ្ឋមន្ត្រី ហ៊ុន សែន ប្រកាសថា បើសិនថ្នាក់ដឹកនាំប្រទេសនានា មកកម្ពុជា ហើយចង់មកកៀបសង្កត់កម្ពុជា ដើម្បីឲ្យធ្វើតាមខ្លួន កុំមកល្អជាង ពីព្រោះថា ជាសិទ្ធិរបស់កម្ពុជា។
ការលើកឡើងរបស់សម្តេចតេជោដូច្នេះ ខណៈមានអ្នកខ្លះ បានលើកឡើងថា រដ្ឋមន្ត្រីការបរទេសអូស្ត្រាលី មកបំពេញទស្សនកិច្ចនៅកម្ពុជា នាថ្ងៃទី៧-៨ ខែវិច្ឆិកានេះ ដើម្បីមកដាក់គំនាបកម្ពុជា។
ប៉ុន្តែសម្តេចតេជោ ហ៊ុន សែន លើកឡើងថា ក្រោយពិធីសម្ពោធនេះ សម្តេចនឹងជួបពិភាក្សាជាមួយរដ្ឋមន្ត្រីការបរទេសអូស្ត្រាលី ដែលនឹងពិភាក្សាគ្នាយ៉ាងច្រើន ទៅលើកិច្ចសហប្រតិបត្តិទ្វេភាគី ក្នុងក្របខណ្ឌរវាងកម្ពុជា និងអូស្ត្រាលី និងជាក្របខណ្ឌហួសពីនេះទៀត គឺទាក់ទង និងឥណ្ឌូអាស៊ីប៉ាស៊ីហ្វិក និងប្រទេសអាស៊ានមួយចំនួន ទៅលើពាក់ព័ន្ធនឹងតំបន់មានអាវុធនុយក្លេអ៊ែរ។ ក្នុងនោះ អូស្ត្រាលី ក៏ចង់ប្រាប់កម្ពុជា អំពីការបង្កើតសម្ព័ន្ធភាពថ្មី AUKUS ( អូស្ត្រាលី អង់គ្លេស និងអាមេរិក )។
សម្តេច ក៏បានផ្តាំផ្ញើទៅខ្មែរ ដែលជាក្រុមប្រឆាំង នៅក្រៅប្រទេសថា សូមអ្នកដទៃ នៅក្រៅប្រទេស ដែលនិយាយថា គេមកដល់ផ្ទះកៀបសង្កត់ គឺសម្តេច បញ្ជាក់ឲ្យហើយថា បើអ្នកដែលចង់មកកម្ពុជាកៀបសង្កត់កម្ពុជា សូមមិនចាំបាច់មកទេ។ ការដែលរដ្ឋមន្ត្រីការបរទេសអង់គ្លេសមក សម្តេចមិនបានទៅទទួល គេចោទថា សម្តេចខ្លាចរដ្ឋមន្ត្រីការបរទេសអង់គ្លេស កៀបសង្កត់។
ប៉ុន្តែសម្តេច សូមបញ្ជាក់ថា ពេលនោះ សម្តេចកំពុងជាប់ធ្វើចត្តាឡីស័ក។ ផ្ទុយទៅវិញ រដ្ឋមន្ត្រីអង់គ្លេសមកកម្ពុជា ដើម្បីស្នើឲ្យកម្ពុជា គាំទ្រអង់គ្លេស ក្លាយជាដៃគូអាស៊ានប៉ុណ្ណោះ។ រឿងអ្វី ដែលសម្តេច ត្រូវខ្លាចអង់គ្លេស? អង់គ្លេស ជាមួយកម្ពុជា ធ្វើកិច្ចសហប្រតិបត្តិការពាណិជ្ជកម្ម នៅតែល្អ។ កំណើនពាណិជ្ជកម្មរវាងប្រទេសទាំងពីរ មានទំហំធំជាងគេ នៅក្នុងអឺរ៉ុប។
ជាមួយគ្នានោះដែរ សម្តេចតេជោ ហ៊ុន សែន ក៏បានបញ្ជាក់ថា ថ្នាក់ដឹកនាំប្រទេសអង់គ្លេស បានប្រកាសជំហរល្អជាមួយកម្ពុជា ហើយចំពោះបង្ហាញ EBA អង់គ្លេស មិនខ្វល់នោះទេ។ តែអង់គ្លេស ខ្វល់តែរឿងដកខ្លួនចេញពីអឺរ៉ុបតែប៉ុណ្ណោះ។ សម្រាប់ទស្សនៈកិច្ច រដ្ឋមន្ត្រីអូស្ត្រាលីនៅកម្ពុជា ពេលនេះ ក៏មិនមែនមកកៀបសង្កត់នោះទេ ប្រហែលជាមក ដើម្បីពន្យល់រវាងសម្ព័ន្ធភាពអូស្ត្រាលី អង់គ្លេស និងអាមេរិក ហៅកាត់ថា AUKUS ជារឿងសំខាន់។
សម្តេចតេជោ ហ៊ុន សែន គូសបញ្ជាក់ថា កិច្ចសហប្រតិបត្តិការទ្វេភាគីរវាងកម្ពុជា និងអូស្ត្រាលី មានការនិយាយគ្នាច្រើនសម្រាប់ក្នុងរយៈពេលប៉ុន្មានខែ នៃការធ្វើអាជីវកម្មមាសរបស់ក្រុមហ៊ុនអូស្ត្រាលី នៅកម្ពុជា គឺបានមាសជិត ៨០០គីឡូ ហើយបើមួយឆ្នាំ នឹងជីករកបានច្រើនជាងនេះ។ ដូច្នេះទំហំពាណិជ្ជរវាងកម្ពុជា និងអូស្ត្រាលី នឹងមានទំហំកាន់តែច្រើនថែមទៀត។
ឥទ្ធិពលបរទេស ពិសេសលោកខាងលិច មកលើកម្ពុជា បានថមថយជាបន្តបន្ទាប់ ហើយប៉ុន្មានឆ្នាំចុងក្រោយនេះ លែងមានតែម្តង ខណៈដែលកម្ពុជា ក្រោមការដឹកនាំរបស់សម្តេចតេជោ ហ៊ុន សែន មានសេដ្ឋកិច្ចរឹងមាំជាងមុន និងមានការអភិវឌ្ឍន៍គ្រប់វិស័យ។ ជាងនេះទៅទៀត កម្ពុជាក៏មានមហាយក្សចិន នៅពីក្រោយ។ ចិនផ្តល់ទាំងជំនួយឥតសំណង ដោយគ្មានលក្ខខណ្ឌ រួមទាំងប្រាក់កម្ចីយ៉ាងច្រើន សម្រាប់ធ្វើផ្លូវ និងស្ពានយ៉ាងច្រើន នៅកម្ពុជា។
ប៉ុន្តែទោះជាដូច្នេះមែន តែកម្ពុជានៅតែបើកចំហ និងទទួលស្វាគមន៍នូវរាល់ទំនាក់ទំនងការទូតជាមួយគ្រប់បណ្តាប្រទេសជាមិត្ត ហើយក៏ទទួលយកនូវរាល់ជំនួយទាំងឥតសំណង និងទាំងជំនួយសម្បទានពីដៃគូអភិវឌ្ឍន៍នានា ក្នុងនោះ ក៏មានអាមេរិក រួមទាំងប្រទេសមហាអំណាចនានា នៅអឺរ៉ុបផងដែរ។
យ៉ាងណាក៏ដោយ ជំហរចុងក្រោយរបស់កម្ពុជា ចំពោះបរទេស ក៏ត្រូវបានបញ្ជាក់យ៉ាងច្បាស់រួចមកហើយ ពិសេសពាក់ព័ន្ធករណី EBA របស់សហភាពអឺរ៉ុប។ នោះគឺទោះបីជាអឺរ៉ុបផ្តាច់ EBA ពីកម្ពុជា តែការនាំចេញរបស់កម្ពុជា ទៅកាន់អឺរ៉ុប ពិសេសលើផលិតផលកាត់ដេរ មកដល់ពេលនេះ មិនបានថមថយទេ។ ករណី EBA នេះ កម្ពុជាមិនយកអធិបតេយ្យជាតិរបស់ខ្លួន ទៅដូរនឹងជំនួយនោះឡើយ។
ដូច្នេះសរុបទៅ ក្នុងប៉ុន្មានឆ្នាំចុងក្រោយ រហូតមកដល់ពេលនេះ សេដ្ឋកិច្ចកម្ពុជាកាន់តែរឹងមាំ ហើយការអភិវឌ្ឍន៍ក៏ត្រូវបានធ្វើឡើងលើគ្រប់វិស័យ ខណៈដែលកម្ពុជា បានរក្សាទំនាក់ទំនងនយោបាយកាន់តែរឹងមាំជាមួយប្រទេសចិន ក៏ដូចជាប្រទេសជាមិត្តផ្សេងទៀត។ នៅឆ្នាំ២០២២ ខាងមុខ កម្ពុជាក៏ដល់វេន ធ្វើជាប្រធានអាស៊ាន ជាលើកទី៣ ទៀត។ កម្ពុជា ក៏ប្រហែលជាកាន់តែក្លាយជាកូនក្រមុំដ៏ស្រស់ស្អាត សម្រាប់មហាអំណាច ចែចង់បន្តទៀតដែរ៕
ចែករំលែកព័តមាននេះ