ថ្ងៃបុណ្យចូលឆ្នាំខ្មែរខេត្តចំនួន3អ្នកទេសចរកើនឡើង
យោងតាមភ្ញៀវទេសចរនានាដែលទៅលេងកម្សាន្តនាឱកាសបុណ្យចូលឆ្នាំប្រពៃណីជាតិខ្មែរ ខេត្តចំនួន3 អ្នកទេសចរកើនឡើង
យោងតាមភ្ញៀវទេសចរនានាដែលទៅលេងកម្សាន្តនាឱកាសបុណ្យចូលឆ្នាំប្រពៃណីជាតិខ្មែរ ខេត្តចំនួន3 អ្នកទេសចរកើនឡើង
ខេត្តកំពត-កែប ៖ យោងតាមភ្ញៀវទេសចរនានាដែលទៅលេងកម្សាន្តនាឱកាសបុណ្យចូលឆ្នាំប្រពៃណីជាតិខ្មែរនៅខេត្តកំពត និងខេត្តកែបឲ្យដឹងថា នៅតាមរមណីយដ្ឋាននានាដូចជារមណីយដ្ឋានធម្មជាតិទឹកឈូ រថយន្តភ្ញៀវចូលទៅកម្សាន្តត្រូវបង់ឲ្យមន្ទីរទេសចរណ៍ចំនួន៥ពាន់រៀលក្នុងមួយគ្រឿង ។
តម្លៃម្ហូបអាហារលក់នៅក្នុងរមណីយដ្ឋានក៏ឡើងថ្លៃគួរសមដែរ ។
ដោយឡែកនៅមុនថ្ងៃបុណ្យ បើភ្ញៀវទិញម្ហូប គឺខ្យូសអង្គុយមិនគិតថ្លៃទេ ។ ប៉ុន្តែនៅថ្ងៃបុណ្យចូលឆ្នាំ បើទិញម្ហូប ហើយអង្គុយហូបនៅខ្យូសនោះត្រូវបង់២ម៉ឺនរៀលបន្ថែម បើមានម្ហូបបាយខ្លួនឯង ជួលតែខ្យូសអង្គុយ គឺតម្លៃក្នុងខ្យូសមួយ៣ម៉ឺនរៀល ។
រីឯខេត្តកែបវិញមានភ្ញៀវទៅលេងកម្សាន្តច្រើនគួរសមដោយមិនព្រួយបារម្ភពីបាតុភូតទឹកសមុទ្រប្រែពណ៌ដូចប៉ុន្មានថ្ងៃមុនបុណ្យចូលឆ្នាំឡើយ ។ គេឃើញនៅផ្លូវចូលទៅកាន់តំបន់ឆ្នេរស្ទះចរាចរណ៍ ខ្លះៗ ។
ការបង់សេវារថយន្តចូលទៅកម្សាន្តមានពីរកន្លែង ទី១នៅចំណុចខាងជើងរង្វង់មូលផ្លូវបំបែកទៅផ្សារក្តាម ទី២ ខាងកើតផែឆ្លងទៅកោះទន្សាយ ។ ក្នុងរថយន្តមួយគ្រឿងបង់ថ្លៃ៥ពាន់រៀល រីឯម៉ូតូអត់បង់ថ្លៃទេ ។
ភ្ញៀវទេសចរពីតាមបណ្តាខេត្ត និងរាជធានីភ្នំពេញទៅលេងកម្សាន្តនៅខេត្តកំពត និងកែបមានការកើនឡើងជាងឆ្នាំ មុនៗ ។ ភ្ញៀវទេសចរទៅលេងកម្សាន្តក្នុងខេត្តកំពត បើតាមរបាយការណ៍សរុបរបស់មន្ទីរទេសចរណ៍ខេត្តមានចំនួនសរុប១០១.៨២១នាក់ កើនឡើង៣០,៧៥% ស្មើនឹង២៣.៩៤៧នាក់ ក្នុងនោះទេសចរក្នុងស្រុក៩៨.៥៩៦នាក់ កើនឡើង៣១,០៩% ស្មើ២៣.៣៨២នាក់ ។ ភ្ញៀវភាគច្រើនសម្រុកទៅលេងនៅរមណីយដ្ឋាន«ឋានសួគ៌បូកគោ» ។
ខេត្តមណ្ឌលគិរី ៖ រយៈពេល៤ថ្ងៃនៃពិធីបុណ្យចូលឆ្នាំថ្មី ភ្ញៀវដែលទោកម្សាន្តនៅខេត្តនេះ មានចំនួន១៣០.១៦៤នាក់ ក្នុងនោះភ្ញៀវបរទេសមានចំនួន៣០២នាក់ និងភ្ញៀវជាតិមានចំនួន១២០.៨៦២នាក់ កើនឡើង១,១៨% បើប្រៀបធៀបនឹងឆ្នាំ២០១៥ ។
យោងតាមទិន្នន័យចំនួនភ្ញៀវទេសចរបរទេសនិងភ្ញៀវទេសចរជាតិ ដែលទិញប័ណ្ណចូលទស្សនារមណីយដ្ឋានទឹកជ្រោះប៊ូស្រា ក្នុងឆ្នាំ២០១៦ លោក ផុន សាវឿន ប្រធានក្រុមគ្រប់គ្រងរួមតំបន់រមណីយដ្ឋានទឹកជ្រោះប៊ូស្រា បានឱ្យដឹងថា ចំនួនភ្ញៀវទេសចរដែលទិញប័ណ្ណចូលទស្សនារមណីយដ្ឋានទឹកជ្រោះប៊ូស្រារយៈពេល៤ថ្ងៃ ក្នុងឆ្នាំ២០១៦មានចំនួនសរុប៧.១៣៤នាក់ ក្នុងនោះភ្ញៀវបរទេសមានចំនួន១១២នាក់ និងភ្ញៀវជាតិមានចំនួន៧.០២២នាក់ ។
លោកបន្តថា ដើម្បីពង្រឹងគុណភាពសេវាកម្មទេសចរណ៍ រក្សាសន្តិសុខនិងសុវត្ថិភាពភ្ញៀវទេសចរ លើកតម្លៃនិងផ្តល់នូវបទពិសោធន៍ទស្សនាដ៏ល្អប្រសើរសម្រាប់ភ្ញៀវទេសចរគ្រប់រូប ការងារជាច្រើនត្រូវបានរៀបចំជាបន្តបន្ទាប់ដូចជា ការគ្រប់គ្រងលំហូរភ្ញៀវ ការរៀបចំហេដ្ឋារចនាសម្ព័ន្ធនិងបរិក្ខារចាំបាច់សម្រាប់បម្រើដល់ការទស្សនារបស់ភ្ញៀវ ការរៀបចំព្រឹត្តិការណ៍ទាក់ទាញភ្ញៀវទេសចរ ការកែលម្អសោភ័ណភាពនៅតាមរមណីយដ្ឋាន ការដាក់អនុវត្តក្រមប្រតិបត្តិ ការបណ្តុះបណ្តាលពង្រឹងសមត្ថភាពភ្នាក់ងារទេសចរណ៍នៅតាមរមណីយដ្ឋាន និងកិច្ចសហការល្អជាមួយដៃគូពាក់ព័ន្ធទាំងអស់ដែលមិនអាចខ្វះបាន ។
តំបន់រមណីយដ្ឋានទឹកជ្រោះប៊ូស្រា ត្រូវបានក្រុមអ្នកទេសចរជាតិនិយាយថា ឆ្នាំនេះមិនមានទឹកធ្លាក់ច្រើនទេ ដោយសារតែគ្រោះរាំងស្ងួត ហើយរលកកម្តៅក៏បានរំខានផងដែរ ។ ដោយឡែក ហេដ្ឋារចនាសម្ព័ន្ធក្នុងរមណីយដ្ឋាននេះមិនមានរៀបចំជាខ្យូសសម្រាប់ភ្ញៀវនោះទេ ។
ខេត្តក្រចេះ ៖ ក្រុមមន្ត្រីបានឲ្យដឹងថា ក្នុងអំឡុងរយៈពេលបីថ្ងៃនៃពីធីបុណ្យចូលឆ្នាំថ្មីប្រពៃណីជាតិ ឆ្នាំ២០១៦នេះ ខេត្តក្រចេះទទួលបានភ្ញៀវទេសចរជាតិ-អន្តរជាតិ ទៅទស្សនាកម្សាន្តនៅតាមតំបន់ទេសចរណ៍ទាំង១៦កន្លែងក្នុងទូទាំងខេត្តសរុបចំនួន១០៣.៥៣៣នាក់។ ចំនួននេះបើប្រៀបធៀបទៅនឹងឆ្នាំមុនគឺមានការកើនឡើងចំនួន៤.៨៩៨នាក់ ស្មើនឹង៤,៩៧% ។ ដោយឡែក ភ្ញៀវអន្តរជាតិមានចំនួន២៥៧នាក់ បើធៀបនឹងឆ្នាំ២០១៥ ដែលមានចំនួន២៧៣នាក់ គឺថយចុះ១៦នាក់ ស្មើនឹង៥,៨៦%។
អនុប្រធានមន្ទីរទេសចរណ៍ខេត្ត លោក ប្រាក់ វិកុល បានឲ្យដឹងថា ភ្ញៀវទេសចរបានទៅកម្សាន្តនៅតាមតំបន់រមណីយដ្ឋាននានា ក្នុងនោះរួមមានតំបន់រមណីយដ្ឋានវប្បធម៌ប្រវត្តិសាស្ត្រ រមណីយដ្ឋានធម្មជាតិ និងរមណីយដ្ឋានសហគមន៍កែច្នៃ សរុបមានចំនួន១៦កន្លែង ។
ប៉ុន្តែសម្រាប់តំបន់ទេសចរណ៍ធម្មជាតិទឹកជួរទន្លេមេគង្គកាំពី ដែលជារមណីយដ្ឋានមួយលេចធ្លោ និងទាក់ទាញជាងគេក្នុងចំណោមតំបន់ទេសចរណ៍ទាំង១៦របស់ខេត្ត ហើយជារៀងរាល់ឆ្នាំក៏ទទួលបានភ្ញៀវមកលេងកម្សាន្តច្រើនជាងគេដែរនោះ តែសម្រាប់ឆ្នាំនេះចំនួនភ្ញៀវមានការថយចុះគួរឲ្យកត់សម្គាល់ទៅវិញ ។
ក្រុមមន្ត្រីអះអាងថា បើទោះជាតំបន់រមណីយដ្ឋានទឹកជួរកាំពីដែលជារមណីយដ្ឋានអេកូទេសចរណ៍ មានឈ្មោះល្បីរន្ទឺ ហើយតែងតែទទួលបានភ្ញៀវមកងូតទឹកលេងកម្សាន្តដ៏ច្រើនលើសលប់ តែឆ្នាំនេះចំនួនភ្ញៀវមានការធ្លាក់ចុះយ៉ាងណាក្តី តែក៏នៅមានតំបន់រមណីយដ្ឋានមួយចំនួនគឺមានការកើនឡើងវិញ ដូចជាតំបន់រមណីយដ្ឋានវប្បធម៌ប្រវត្តិសាស្ត្រព្រះវិហារវត្តសសរ១០០ ស្រុកសំបូរ តំបន់រមណីយដ្ឋានទេសចរណ៍កែច្នៃសហគមន៍កោះទ្រង់ និងតំបន់រមណីយដ្ឋានអន្លង់ផ្សោតកាំពីជាដើម ៕
ចែករំលែកព័តមាននេះ