រាជធានីភ្នំពេញ ៖ រថយន្ត២គ្រឿងដោយបើកខ្វះការប្រុងប្រយ័ត្ន បណ្ដាលឱ្យបុកគ្នាយ៉ាងពេញទំហឹង ធ្វើឱ្យរថយន្តក្រឡាប់២ត្រឡប់ រងការខ្ទេចផ្នែកខាងមុខ និងបង្កជាអណ្តាតភ្លើងឆាបឆេះឡើង ដែលហេតុការណ៍នេះ ភ្ញាក់ផ្អើលកាលពីវេលាម៉ោង១២ និង១០រំលងអធ្រាត្រ ឈានចូលថ្ងៃទី២០ មេសា ស្ថិតត្រង់ចំណុចផ្លូវ៤៣២ កែងផ្លូវ១៦៣ សង្កាត់ទួលទំពូង១ ខណ្ឌចំការមន ។
បើតាមសម្ដីពលរដ្ឋដែលឃើញហេតុការណ៍ថា មុនពេលកើតហេតុ យុវជនម្នាក់មានអាយុប្រមាណ២៥ឆ្នាំ បានបើករថយន្តម៉ាកឡិចស៊ីស RX330 ពណ៌ទឹកមាស ពាក់ស្លាកលេខភ្នំពេញ2AE-9276 ធ្វើដំណើរតាមផ្លូវលេខ១៦៣ទិសដៅ ពីជើងទៅត្បូង ក្នុងល្បឿនលឿន ។ លុះមកដល់ចំណុចកើតហេតុ ដែលជាផ្លូវបំបែកជាបួន ស្រាប់តែរថយន្តម៉ាកកាមរីឆ្លាម ពណ៌ខ្មៅ ពាក់ស្លាកលេខ CD-80070 បើកដោយបុរសជនជាតិវៀតណាម៣នាក់ ធ្វើដំណើរតាមផ្លូវលេខ៤៣២ ទិសដៅពីលិចទៅកើត ក្នុងល្បឿនលឿន និងស្រវឹងផង ក៏ចាប់ហ្រាំងមិនទាន់ជ្រុលទៅបុកជាមួយរថយន្តឡិចស៊ីស ចំកង់ខាងក្រោយចំហៀងខាងស្តាំ បណ្ដាលឱ្យរថយន្តឡិចស៊ីសក្រឡាប់២ត្រលប់ផ្ងារជើងមួយចំហៀង បត់ក្បាលត្រលប់ក្រោយរងកាខូចខាតយ៉ាងដំណំ ចំណែកអ្នកបើកបររងរបួសរលាត់ដៃជើងស្រាលមិនបានទៅពេទ្យទេ ។
រីឯរថយន្តបង្កវិញ ខ្ទេចផ្នែកខាងមុខឆេះចេញជាអណ្ដាតភ្លើង ត្រូវបានប្រជាពលរដ្ឋជួយយកបំពង់ពន្លត់អគ្គិភ័យ បាញ់អស់មួយបំពង់ ទើបរលត់អស់ ។ ចំនែកមនុស្សដែលរងរបួសស្រាល៣នាក់ មានម្នាក់រត់គេចខ្លួនបាត់ នៅសល់២នាក់ត្រូវសមត្ថកិច្ចឃាត់
ខ្លួន ។
ក្រោយពេលកើតហេតុ សមត្ថកិច្ចចុះទៅវាស់វែងរួចហើយ ភាគីទាំងសងខាងមានតំណាងចេញមកចរចា ដោយខាងរថយន្តបង្កយល់ព្រមសងរថយន្តថ្មីមួយគ្រឿងក្នុងតម្លៃ៣.២០០០ដុល្លារ ចំណែករថយន្តដែលខូចខាតម្ចាស់រថយន្តបង្ កជាអ្នកយកទៅជួសជុល ៕
ចែករំលែកព័តមាននេះ