ខេត្តព្រៃវែង ៖ រថយន្តធំៗរាប់សិបគ្រឿង កំពុងសម្រុកដឹកជញ្ជូនស្ករ.ស និងបារីនាំចេញទៅលក់នៅប្រទេសវៀតណាមយ៉ាងគគ្រឹកគគ្រេងជារៀងរាល់ថ្ងៃតាមច្រករបៀងកោះស្កូ ដែលជាច្រកឧបសម្ព័ន្ធរបស់ច្រករបៀងកោះសំពៅ ស្ថិតនៅក្នុងឃុំកោះសំពៅ ស្រុកពាមជរ ។
ប្រជាពលរដ្ឋដែលរស់នៅតាមខ្សែបន្ទាត់ព្រំដែនក្នុងឃុំកោះសំពៅ បានឲ្យដឹងថា បើទោះបីជាសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋន្ត្រីក្រសួងមហាផ្ទៃបានប្រកាសបិទច្រករបៀងនៅតាមបណ្ដោយព្រំដែន ហាមមិនឲ្យមានការចរាចរណ៍ដោះដូរទំនិញឆ្លងដែននៅតាមច្រករបៀងទូទាំងប្រទេសក៏ដោយ ប៉ុន្តែសម្រាប់ច្រករបៀងកោះស្កូនេះ ក្រុមឈ្មួញនៅតែអាចនាំយកទំនិញរបស់ពួកគេ ដូចជាស្ករស និងបារីជាដើម យកទៅលក់នៅប្រទេសវៀតណាមបានយ៉ាងរលូន ដោយគ្មានការរំខានឬទប់ស្កាត់ពីសំណាក់សមត្ថកិច្ច និងមន្ត្រីជំនាញនៅចំណុចព្រំដែនកោះស្កូនេះឡើយ ។
ក្រុមឈ្មួញរកស៊ីក្នុងស្រុកមួយចំនួន បានឲ្យដឹងថា ការនាំចេញស្ករសនិងបារីនេះ រាជរដ្ឋាភិបាលមិនបានហាមឃាត់ទេ គឺមានតែបង្កលក្ខណៈឲ្យកាន់តែងាយស្រួលថែមទៀតសម្រាប់ក្រុមពាណិជ្ជករ តែមិនអនុញ្ញាតឲ្យនាំចេញតាមច្រកឧបសម្ព័ន្ធ(ច្រករបៀង)នោះទេ គឹត្រូវនាំចេញតាមច្រកទ្វេភាគី ឬច្រកទ្វារអន្តរជាតិ។ ប៉ុន្តែសម្រាប់ប្រទេសវៀតណាមវិញ ទំនិញទាំងនេះ រដ្ឋាភិបាលវៀតណាមគេហាមឃាត់មិនឲ្យមានការនាំចូលទេ ហេតុដូច្នេះហើយទើបធ្វើឲ្យទំនិញប្រភេទនេះមានតម្លៃថ្លៃនិងកាក់កបខ្លាំងសម្រាប់ក្រុមឈ្មួញ ដែលបានជះចំហាយធ្វើឲ្យសមត្ថកិច្ច និងមន្ត្រីជំនាញនៅច្រកកោះស្កូនេះសើមមាត់សើមកមិនតិចដែរ។
ចំពោះករណីនេះ អ្នកយកព័ត៌មានកោះសន្តិភាពបានព្យាយាមទាក់ទងទៅលោក ឡាច ភីរៈ ប្រធានច្រករបៀងកោះសំពៅ អស់រយៈពេល២ថ្ងៃ ដើម្បីសុំការបំភ្លឺកាលពីមុនថ្ងៃបុណ្យចូលឆ្នាំថ្មី ប៉ុន្តែទូរស័ព្ទរបស់លោកហៅចូលហើយគ្មានអ្នកទទួល ។ ចំណែកលោក ឃួន វាន់ថេន មេប៉ូលិសព្រំដែនវរៈ៦០៧ ក៏មិនអាចទាក់ទងសុំការបំភ្លឺបានដែរ គឺទូរស័ព្ទចូលហើយគ្មានអ្នកទទួលដូចគ្នា ។
ដោយឡែក លោកឧត្តមសេនីយ៍ ស្រេង ជាស្នងការនគរបាលខេត្តបានឲ្យដឹងថា ខាងសមត្ថកិច្ចរបស់លោកគ្រប់គ្រង និងទប់ស្កាត់តែជនអន្តោប្រវេសន៍ប៉ុណ្ណោះ ចំណែករឿងទំនិញជារឿងរបស់មន្ត្រីគយ លោកមិនដឹងធ្វើម៉េចដែរទេ។ ករណីនេះកោះសន្តិភាព ក៏បានទាក់ទងទៅលោកកាង លាង ប្រធានសាខាគយ និងរដ្ឋាករខេត្តទៀត ដើម្បីសុំការបំភ្លឺ ប៉ុន្តែទូរស័ព្ទរបស់លោក ហៅចូលហើយគ្មានអ្នកទទួល ៕
ចែករំលែកព័តមាននេះ