រាជធានីភ្នំពេញ ៖ កម្លាំងនគរបាល នៃអធិការដ្ឋាននគរបាលខណ្ឌឬស្សីកែវ បានធ្វើការឃាត់ខ្លួនយុវជន ចំនួន ០២នាក់ កាលពីវេលាម៉ោង១៥និង៣០នាទីរសៀលថ្ងៃទី០៤ ខែវិច្ឆិកា ឆ្នាំ២០២១…
រាជធានីភ្នំពេញ ៖ កម្លាំងនគរបាល នៃអធិការដ្ឋាននគរបាលខណ្ឌឬស្សីកែវ បានធ្វើការឃាត់ខ្លួនយុវជន ចំនួន ០២នាក់ កាលពីវេលាម៉ោង១៥និង៣០នាទីរសៀលថ្ងៃទី០៤ ខែវិច្ឆិកា ឆ្នាំ២០២១ ករណីបើកម៉ូតូនាំមុខរថយន្តសង្គ្រោះបន្ទាន់(ឡានពេទ្យ) ដែលធ្វើឲ្យបាត់បង់សណ្ដាប់ធ្នាប់សាធារណៈ និងបង្កហានិភ័យគ្រោះថ្នាក់ចរាចរណ៍ដល់អ្នកដទៃ នៅចំណុចមុខប៉ុស្តិ៍នគរបាលរដ្ឋបាលច្រាំងចំរេះ២ ផ្លូវជាតិលេខ៥ ភូមិ.ក សង្កាត់ច្រាំងចំរេះ២ ខណ្ឌឬស្សីកែវ រាជធានីភ្នំពេញ ។
វត្ថុតាងចាប់យក ម៉ូតូចំនួន ២គ្រឿង រួមមាន ៖
១- ម៉ូតូម៉ាក Honda Scoopy ពណ៌ស សេរីឆ្នាំ២០២០ ពាក់ផ្លាកលេខ ភ្នំពេញ 1IE-1708 (មិនពាក់មួកសុវត្ថិភាព) បើកបរដោយឈ្មោះ សឿន ហាវ ភេទប្រុស អាយុ២៥ឆ្នាំ មុខរបលក់ដូរ ស្នាក់នៅ ផ្ទះលេខ ៧១១C ក្រុម១០ ភូមិលូ សង្កាត់ ស្វាយប៉ាក ខណ្ឌឬស្សីកែវ ។
២- ម៉ូតូម៉ាក Honda Dream C១២៥ ពណ៌ខ្មៅ ឆ្នាំ២០១៧ ពាក់ផ្លាកលេខ ភ្នំពេញ ១GL-២៨២៧ (ពាក់មួកសុវត្តិភាព) បើកបរដោយឈ្មោះ ប៊ុត វិសាល ភេទប្រុស អាយុ១៨ឆ្នាំ មុខរបរដឹកជញ្ជូន ស្នាក់នៅសង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ ។
បច្ចុប្បន្នជនសង្ស័យ និងវត្ថុតាង កំពុងឃាត់ខ្លួននៅអធិការដ្ឋាននគរបាល ខណ្ឌឬស្សីកែវ ដើម្បីចាត់ការបន្តតាមនីតិធី ។
គួររម្លឹកឡើងវិញថា អំឡុង ខែកក្កដា ឆ្នាំ២០២១ កម្លាំងសមត្ថកិច្ច នៃស្នងការដ្ឋាននគរបាលរាជធានីភ្នំពេញ បានចាប់ផ្ដើមអនុវត្តតាមការណែនាំរបស់រដ្ឋបាលរាជធានីភ្នំពេញ ដោយហាមឃាត់មិនឲ្យក្រុមអ្នកបើកបរម៉ូតូ ដែលបើកផ្លូវ ឲ្យរថយន្តពេទ្យសង្គ្រោះបន្ទាន់ បន្តធ្វើសកម្មភាពនេះទៀតឡើយ ។
អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ លោកវរសេនីយ៍ឯក សាន សុខសីហា ថ្លែងប្រាប់អោយដឹងថា កម្លាំងសមត្ថកិច្ចរាជធានីភ្នំពេញ បានហាមឃាត់សកម្មភាពក្រុមអ្នកបើកបរម៉ូតូបើកផ្លូវនាំមុខរថយន្តពេទ្យសង្គ្រោះបន្ទាន់នេះ ព្រោះថា សកម្មភាពរបស់ពួកគេ បានបង្កឲ្យមានបញ្ហាច្រើន ហើយក៏មានប្រជាពលរដ្ឋជាច្រើន ក៏បានរាយការណ៍អំពីបញ្ហានេះ មកកាន់ស្នងការដ្ឋាននគរបាលរាជធានីភ្នំពេញផងដែរ ។
លោកវរសេនីយ៍ឯក សាន សុខសីហា បានប្រាប់ដូច្នេះថា យើងអនុវត្តតាមការណែនាំរបស់សាលារាជធានីភ្នំពេញ គឺយើងមានគោលការណ៍ ដើម្បីហាមឃាត់មិនឲ្យពួកគាត់ បើកនាំមុខឡានសង្គ្រោះបន្ទាន់ទៀតទេ ព្រោះវាមើលទៅវាដូចជា បង្កភាពអនាធិបតេយ្យច្រើន បង្កឲ្យមានបញ្ហាច្រើន ។ អ្នកបើកបរម៉ូតូនាំមុខឡានសង្គ្រោះបន្ទាន់ មានច្រើនក្រុម ដែលក្រុមខ្លះមានបំពាក់សារ៉ែនថែមទៀត ក្រុមអ្នកបើកបរម៉ូតូទាំងនោះ មិនមានអង្គភាពអ្វីច្បាស់លាស់នោះឡើយ ដោយគ្រាន់តែពួកគេបង្កើតជាក្រុមៗ និងមិនមានការស្នើសុំ ការអនុញ្ញាតត្រឹមត្រូវណាមួយ ទៅក្រសួង-ស្ថាប័នពាក់ព័ន្ធនោះឡើយ។
អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានបញ្ជាក់ទៀតថា ចាប់ពីពេលនេះតទៅ ប្រសិនបើក្រុមអ្នកបើកបរម៉ូតូ ដែលបំពាក់សារ៉ែនបើកផ្លូវ នាំមុខរថយន្តពេទ្យសង្គ្រោះបន្ទាន់ទាំងនោះ នៅតែបន្តសកម្មភាពដដែលនេះទៀត សមត្ថកិច្ចនឹងដកហូតអាវ និងសម្ភារៈ របស់ពួកគេ ព្រមទាំងឲ្យធ្វើកិច្ចសន្យាអប់រំណែនាំ ហើយបើនៅតែមិនស្ដាប់តាមការណែនាំបន្តទៀត នោះសមត្ថកិច្ចនឹងចាត់វិធានការទៅតាមច្បាប់ ។
ឡានពេទ្យមានបេសកកម្មមួយ គឺដឹកអ្នកជំងឺ ទៅសង្គ្រោះជីវិតនៅមន្ទីរពេទ្យ ដូច្នេះមនុស្សគ្រប់គ្នា ត្រូវតែបើកផ្លូវ អោយឡានពេទ្យ ។ ប៉ុន្តែតាមការសង្កេត គឺមិនដូច្នេះឡើយ ដូច្នេះហើយវាក៏លេចករណី រហូតដល់ឡានពេទ្យត្រូវមានអ្នកជិះម៉ូតូបើកផ្លូវបន្ថែមទៀត ។
ក៏ប៉ុន្តែសកម្មភាពក្រុមយុវជនជិះម៉ូតូ បើកផ្លូវឡានពេទ្យនោះ កន្លងមក បានជួបគ្រោះថ្នាក់ ដោយមួយករណី រហូតដល់ស្លាប់ នៅខាងច្បារអំពៅ ដោយសារតែជិះលឿន ហើយជ្រុលចង្កូត ចូលក្រោមឡាន ។ ថ្មីៗនេះទៀត អ្នកជិះម៉ូតូ ដែលអះអាងថា ជាក្រុមអ្នកសម្រួលចរាចរណ៍ ជូនរថយន្តសាម៉ុយ ក៏ត្រូវឡានមួយគ្រឿង បុកនៅផ្លូវបំបែកជា៤ កាលពីម៉ោង ១១យប់ថ្ងៃទី១០ ខែកក្កដា ឆ្នាំ២០២១ នៅផ្លូវបំបែកជា៤ ស្តុបទេពផន កែងមហាវិថីម៉ៅសេទុង ស្ថិតនៅក្នុងសង្កាត់ទឹកល្អក់២ ខណ្ឌទួលគោក គឺត្រឹមតែខូចខាតម៉ូតូបន្តិចបន្តួចប៉ុណ្ណោះ ។
ករណីក្រុមយុវជនបើកម៉ូតូ នាំមុខឡានពេទ្យនេះ មានមតិគាំទ្រ និងមានទាំងមតិរិះគន់ ហើយសូម្បីតែប៉ូលិស ក៏មិនគាំទ្រឲ្យមានក្រុមអ្នកនាំផ្លូវឡានពេទ្យនេះឡើយ ហើយពេលខ្លះ បង្កបញ្ហា និងប្រឈមនឹងគ្រោះថ្នាក់ចរាចរណ៍ថែមទៀត ដោយសារតែអ្នកបើកម៉ូតូលឿន ក្នុងពេលផ្លូវកកស្ទះចរាចរណ៍ ៕
ចែករំលែកព័តមាននេះ