ខេត្តបន្ទាយមានជ័យ ៖ ស្របពេលដែលពិធីបុណ្យចូលឆ្នាំថ្មីប្រពៃណីជាតិជិតឈានចូលមកដល់ ពលករខ្មែរបានវិលត្រឡប់ពីថៃមានជាហូរហែតាមច្រកទ្វារអន្តរជាតិប៉ោយប៉ែត ទាំងស្របច្បាប់ និងមិនស្របច្បាប់ ។ តាមដងផ្លូវនៅច្រកទ្វារអន្តរជាតិប៉ោយប៉ែត ក៏ដូចជាតាមទីតាំងសាខាលក់សំបុត្ររថយន្តក្រុង គេសង្កេតឃើញមានពលករប្រុសស្រីដែលវិលត្រឡប់ពីថៃពពាក់ពពូននាំគ្នាទិញសំបុត្ររថយន្ត ។
រថយន្តតូចធំផ្ទុកពលករពេញៗ បានចេញពីក្រុងប៉ោយប៉ែតឆ្ពោះទៅតាមបណ្តាខេត្ត និងរាជធានីភ្នំពេញ ។ ជាមួយគ្នានេះមានប្រភពព័ត៌មានថា សំបុត្ររថយន្តលួចលក់ឡើងថ្លៃតែមិនហួសហេតុដូចកាលពីឆ្នាំមុនទេ ហើយរាល់ការសួរនាំត្រូវម្ចាស់ទីតាំងសាខាទាំងនោះធ្វើការបដិសេធជាមួយអ្នកកាសែត ។
ចំពោះការវិលត្រឡប់មកស្រុកកំណើត ក្រុមពលករនិយាយថា ការឆ្លងកាត់ខេត្តស្រះកែវ ពិបាកជាងខេត្តផ្សេងៗព្រោះថា ទោះជាគ្រប់គ្នាមានកាតស៊ីជម្ពូក៏ដោយឲ្យតែការវិលត្រឡប់គ្មានលិខិតអនុញ្ញាតពីថៅកែរោងចក្រ ឬសហគ្រាសគឺត្រូវសមត្ថកិច្ចថៃចាប់តាមដងផ្លូវនៅចំណុចត្រួតពិនិត្យទាំងអស់ លើកលែងតែជិះរថយន្តវាងបារ៉ាស់ក្នុងស្រុកវ៉ាត់ថាណាណាក់ខន ខេត្តស្រះកែវ ។
ចំណែករថយន្តទ្រុងថៃ ក៏បានបញ្ជូលពលករដែលគេចោទថាខុសច្បាប់ច្រើនខុសសព្វមួយដងដែរក្នុងរយ:ពេលប៉ុន្មានថ្ងៃនេះ ដែលពលករទាំងនោះសុទ្ធតែវិលត្រឡប់ពីតាមបណ្តាខេត្តក្នុងប្រទេសថៃ ត្រូវគេចាប់នៅចំណុចបារ៉ាស់ត្រួតពិនិត្យ មិនមែនជាពលករចេញចូលដីថៃរកការងារធ្វើតាមខ្សែបន្ទាត់ព្រំដែននោះទេ។ យ៉ាងណាក៏ដោយ ការវិលត្រឡប់របស់ពលករខ្មែរតាមច្រកទ្វារអន្តរជាតិប៉ោយប៉ែត២ឆ្នាំចុងក្រោយនេះ(២០១៥-២០១៦) មានការធ្លាក់ចុះខ្លាំង ដោយសារការទៅមកដីថៃតាមច្រកទ្វារមួយនេះពលករតែងតែជួបរឿងជំរិតទារប្រាក់ខ្លាំងពេកពីក្រុមមេខ្យល់ ។
ម្យ៉ាង ការវិលត្រឡប់តាមខេត្តស្រះកែវសមត្ថកិច្ចថៃចាប់នៅចំណុចបារ៉ាស់ត្រួតពិនិត្យ ណងគង់ ក្នុងស្រុកវ៉ាក់ថាណាណាក់ខន ខុសពីខេត្តផ្សេងៗ ។ មួយរយៈចុងក្រោយនេះ ក្រុមពលករនាំគ្នាទៅមកដីថៃតាមច្រកទ្វារអន្តរជាតិដូង ក្នុងស្រុកកំរៀងខេត្តបាត់ដំបងយ៉ាងភ្លូកទឹកភ្លូកដី ដោយសារទីនោះមានសុវត្ថិភាពល្អ ហើយផ្លូវដែលត្រូវទៅមកក្នុងដីថៃពុំមានបារ៉ាស់ត្រួតពិនិត្យតឹងរ៉ឹងដូចខេត្តស្រះកែវឡើយ ដែលកាលពីថ្ងៃទី៧ ខែមករាកន្លងទៅ មានរថយន្ដទ្រុងថៃ ១០គ្រឿងដឹកពលករខ្មែរមកវិញ ៕
ចែករំលែកព័តមាននេះ