គ្រួសារស្រីណុច ទទួលបានម៉ូតូមួយគ្រឿងទៀត ពីអាជ្ញាធរជាតិអប្សរា
ខេត្តសៀមរាប ៖ នៅថ្ងៃទី១០ ខែមេសា ឆ្នាំ២០១៦នេះ ក្រុមការងារអាជ្ញាធរជាតិអប្សរា ដឹកនាំដោយលោក សុខ សង្វារ អគ្គនាយករងអាជ្ញាធរជាតិអប្សរា
ខេត្តសៀមរាប ៖ នៅថ្ងៃទី១០ ខែមេសា ឆ្នាំ២០១៦នេះ ក្រុមការងារអាជ្ញាធរជាតិអប្សរា ដឹកនាំដោយលោក សុខ សង្វារ អគ្គនាយករងអាជ្ញាធរជាតិអប្សរា
ខេត្តសៀមរាប ៖ នៅថ្ងៃទី១០ ខែមេសា ឆ្នាំ២០១៦នេះ ក្រុមការងារអាជ្ញាធរជាតិអប្សរា ដឹកនាំដោយលោក សុខ សង្វារ អគ្គនាយករងអាជ្ញាធរជាតិអប្សរា បានធ្វើការប្រគល់ម៉ូតូមួយគ្រឿងបន្ថែមទៀត ដល់ក្រុមគ្រួសារស្រីណុចដែលរស់នៅក្នុងភូមិភ្លង់ ឃុំលាងដៃ ស្រុកអង្គរធំ ខេត្តសៀមរាប ដើម្បីសម្រួលដល់ការងារប្រចាំថ្ងៃ។ ស្រីណុច ជាក្មេងស្រីម្នាក់ដែលរស់នៅក្នុងភូមិភ្លង់ ឃុំលាងដៃ ស្រុកអង្គរធំ ខេត្តសៀមរាប និងទើបមានអាយុ៧ឆ្នាំប៉ុណ្ណោះ តែមានទេពកោសល្យខាងគំនូរតាំងពីតូចមកម្ល៉េះ។
កុមារីស្រីណុចចូលចិត្តគូររូបអប្សរានៅលើដីនៃផ្លូវចូលប្រាសាទព្រះខ័ន ធ្វើឱ្យភ្ញៀវទេសចរណ៍យ៉ាងច្រើនមានការចាប់អារម្មណ៍ចំពោះទេពកោសល្យនេះ។ លោក សុខ សង្វារ អគ្គនាយករងអាជ្ញាធរជាតិអប្សរា បានដឹកនាំក្រុមការងារនៃអាជ្ញាធរជាតិអប្សរា ទៅជួបក្រុមគ្រួសាររបស់ស្រីណុច និងបានជួយឧបត្ថម្ភជាបន្តជាបន្ទាប់ ទាំងសម្ភារសិក្សា កង់ និងការសិក្សានៅសាលាឯកជនដែលមានគុណភាពល្អ ស្តង់ដារអន្តរជាតិ ព្រមទាំងជួយឱ្យឪពុករបស់នាងបានទៅធ្វើការនៅសាលានោះទៀតផង។
សព្វថ្ងៃស្រីណុចកំពុងរៀនថ្នាក់ទី២ទាំងភាសាខ្មែរ និងភាសាបរទេស នៅសាលា Go Global School។ ក្នុងពិធីប្រគល់ម៉ូតូនោះដែរ លោក សុខ សង្វារ បានលើកឡើងថា ដោយយើងឃើញថា ស្រីណុច និងឪពុករបស់ក្មួយស្រីបានទៅរៀននៅសាលាឯកជន មានចម្ងាយឆ្ងាយ ត្រូវជិះកង់ជាង១ម៉ោង ទើបដល់សាលា ដូច្នេះបានអាជ្ញាធរជាតិអប្សរាសម្រេចឧបត្ថម្ភម៉ូតូមួយគ្រឿងដល់គ្រួសារស្រីណុច ដើម្បីសម្រួលដល់ការធ្វើដំណើរ។ មិនត្រឹមតែធ្វើដំណើរទៅសាលាទេ ម៉ូតូមួយគ្រឿងនេះក៏នឹងជួយសម្រួលដល់ការងារប្រចាំថ្ងៃរបស់គ្រួសារផងដែរ។
លោក សុខ សង្វារ ក៏បានរំឭកដាស់តឿនក្រុមគ្រួសារស្រីណុច សុំឱ្យយកចិត្តទុកដាក់បន្ថែមលើក្មេងស្រីដ៏មានទេពកោសល្យនេះ ហើយលោក ក៏បានផ្តាំផ្ញើឱ្យប្អូនស្រីណុចខិតខំរៀនសូត្រ និងបន្ថែមសមត្ថភាពរបស់ខ្លួន ដើម្បីសម្រេចបំណងរបស់ខ្លួននាពេលអនាគត។ ម្តាយរបស់ស្រីណុចបានរៀបរាប់ថា អ្នកស្រីពិតជារីករាយខ្លាំងណាស់ ដែលអាជ្ញាធរជាតិអប្សរាតែងតែឧបត្ថម្ភគ្រួសាររបស់អ្នកស្រី។ បច្ចុប្បន្នអ្នកស្រី តែងព្យាយាមជំរុញលើកទឹកចិត្តកូនស្រីឱ្យខិតខំសិក្សា រៀនសូត្រជាប្រចាំ ដើម្បីកូនមានអនាគតភ្លឺស្វាង៕
ចែករំលែកព័តមាននេះ