រាជធានីភ្នំពេញ ៖ បើតាមអ្នកឆ្លើយឆ្លងព័ត៌មានកោះសន្តិភាពបានឲ្យដឹងថា បុរសម្នាក់បានត្រូវប្រជាពលរដ្ឋចាប់ខ្លួនប្រគល់ឲ្យសមត្ថកិច្ចមូលដ្ឋាន បន្ទាប់ពីធ្វើសកម្មភាពគាស់បន្ទប់ជួល ។
ហេតុការណ៍នេះបានបង្កឲ្យមានការភ្ញាក់ផ្អើលនៅវេលាម៉ោង២និង១៥នាទីរសៀលថ្ងៃទី១១ មេសា ២០១៦ នៅបន្ទប់ផ្ទះជួលចំណុចផ្លូវបេតុង ភូមិ-សង្កាត់ទួលសង្កែ ខណ្ឌប្ញស្សីកែវ ។ ជនសង្ស័យឈ្មោះ ហឿម តុលា ភេទប្រុស អាយុ២២ឆាំ្ន ជាជាងម៉ាស៊ីនត្រជាក់ ស្នាក់នៅបន្ទប់ ជួលក្នុងភូមិសាស្ត្រខាងលើ និងមានស្រុកកំណើតនៅផូមិព្រៃរំដេង ឃុំពង្រ ស្រុកកោះសូទិន ខេត្តកំពង់ចាម ។
សេចក្តីរាយការណ៍បានបន្តថា នៅមុនពេលចាប់ខ្លួន ជនសង្ស័យបានលួចឆ្កឹះទ្វារនៅបន្ទប់លេខ១១ជាន់ផ្ទាល់ដី តែមិនសម្រេចក៍ឡើងទៅជាន់ទី១ដោយធ្វើសកម្មភាពគាស់បន្ទប់លេខ៣១និង៤៤ទៀត ក៍ត្រូវអ្នកមើលការខុសត្រូវបន្ទប់ជួលឃើញទាន់ស្រែកផ្អើលអ្នកជិតខាងព័ទ្ឋចាប់ប្រគល់ឲ្យសមត្ថកិច្ចតែម្តង ។
នៅពេលនេះ ជនសង្ស័យកំពុងសាកសួរនៅអធិការដ្ឋាននគរបាលខណ្ឌ រង់ចាំកសាងសំណុំរឿងចាត់ការតាមច្បាប់ ។
សូមបញ្ជាក់ថា ជនសង្ស័យឈ្មោះ ហឿម តុលានេះ ត្រូវជាបងថ្លៃជនសង្ស័យម្នាក់ទៀតឈ្មោះ ផាន់ ឈីង អាយុ១៧ឆ្នាំ ដែលលួចម៉ូតូមិត្តភក្តិក្រោយពេលនាំស្រីទៅដេកនៅផ្ទះសំណាក់កាលពីព្រឹកថ្ងៃទី០៩ មេសា ២០១៦ នៅសំណាក់យីហោ “បឹងលាភ” ស្ថិតនៅផ្លូវបេតុង ភូមិ-សង្កាត់ទួលសង្កែ ខណ្ឌប្ញស្សីកែវ ដែលម្ចាស់ម៉ូតូឈ្មោះ ពេជ្រ បូរី អាយុ២៥ឆ្នាំ ជាកម្មករទឹកបរិសុទ្ឋ ស្នាក់នៅភូមិ-សង្កាត់ទួលសង្កែ ៕
ចែករំលែកព័តមាននេះ