រាជធានីភ្នំពេញ ៖ លោកគន្ធ តារាវណ្ណ ទោះបីជាមន្ដ្រីយោធាថ្នាក់ឧត្ដមសេនីយ៍ត្រី “ផ្កាយមួយ” ក៏ដោយ ក៏លោកនៅតែឈរលើវិថីសិល្បៈសំដែងមិនរាថយឡើយ ។ ក្នុងពេលបច្ចុប្បន្នគេឃើញការសំដែងរបស់លោកតាមរយៈខ្សែវីដេអូភាគ និងរឿងខ្លីបែបអប់រំ់ផ្សាយតាមកញ្ចក់ទូរទស្សន៍នានា។
លោកគន្ធ តារាវណ្ណ ក្នុងវ័យ៥៣ឆ្នាំ បានចាប់ផ្ដើមចូលប្រឡូកក្នុងពិភពសិល្បៈសំដែងតាំងពីឆ្នាំ១៩៨៦ ។ លោកធ្លាប់ចូលរួមសំដែងក្នុងខ្សែភាពយន្ដរឿងសម័យ និង បុរាណប្រហែលជា១៧០រឿង ។ លោកមានកេរិ៍្ដឈ្មោះល្បីចាប់តាំងពីឆ្នាំ១៩៨៩មក ជំនាន់លោកគង់ សុភី លោកចៅ ចាន់ណារី លោកយស បូវណ្ណៈ អ្នកនាងអម្ពរ ទេវី អ្នកនាងចាន់ តារាទី លោកខៃ ប្រសិដ្ឋ អ្នកនាង សុខ ស្រីមុំ និងអ្នកនាងពិសិដ្ឋ ពិលិកា ជាដើម ។ កាលនោះលោកល្បីខ្លាំងតាមរយៈ រឿង “ផ្ការាំងរុះរោយ” តួឯកជាមួយអ្នកនាង ឃុន វណ្ណា ។ ចាប់តាំងពីពេលនោះមក លោកតែងតែចូលរួមសំដែងជារឿយៗ តែចាប់តាំងពីឆ្នាំ២០០០មក លោកបានក្លាយជាតួឪពុក និងជាតួឧកញ៉ា ឬតួព្រះមហាក្សត្រ ជាច្រើនរឿងដូចជារឿង “តេជោតំឌិន” រឿង “ព្រះសុធន នាងកែវមនោរាហ៍” ជាដើម ។ ក្នុងឆ្នាំ២០១០នេះ លោកបានចូលរួមសំដែងក្នុងរឿងភាគជាច្រើនរឿងដូចជារឿង “បេះដូងខ្ញុំសំរាប់អ្នកណា” រឿង “ចាញ់ចិត្ដដ្បិតស្រលាញ់” ដែលមានលោកហ៊ុយ វាសនា ជាអ្នកដឹកនាំរឿងសំរាប់ចាក់ផ្សាយតាមកញ្ចក់
ទូរទស្សន៍បាយ័ន ។ ក្រៅពីនេះ លោកសំដែងក្នុងរឿង “ទេវបុត្រនរក” ឱ្យផលិតកម្មជី អេស ភី (G.S.P) ដោយអ្នកដឹកនាំរឿងតំរូវឱ្យលោកសំដែងជាតួឧត្ដមសេនីយ៍ឯក (ផ្កាយមាស៣) និងជាតួអង្គព្រះបាទស្រីសុរិយោពណ៌ក្នុងរឿង “ឧកញ៉ារាមរាជតេជោយ៉ត” ។
លោកមានចិត្ដសប្បាយរីករាយដែលបានចូលរួមសំដែងក្នុងរឿងភាគបែបប្រវត្ដិសាស្ដ្រខ្មែរ ដើម្បីឆ្លុះបញ្ចាំងឱ្យកូនខ្មែរជំនាន់ក្រោយស្គាល់ពីប្រវត្ដិសាស្ដ្ររបស់ខ្លួនកាន់តែច្បាស់ថែមទៀត ។
លោកគន្ធ តារាវណ្ណ ថ្លែងថា លោកធ្លាប់សំដែងរឿងបុរាណ និងសម័យជាច្រើនរឿង ហើយលោកមានមោទនភាពណាស់ដែលបានចាប់អាជីពជាតារាភាពយន្ដតាំងពីអំឡុងទសវត្សទី៨០រហូតដល់បច្ចុប្បន្ន ។ នេះជាការរួម ចំណែកលើកស្ទួយវិស័យភាពយន្ដជាតិរបស់លោក ។ លោកគន្ធ តារាវណ្ណ ក្រៅពីចូលរួមសំដែងភាពយន្ដលោកក៏ជាឧត្ដមសេនីយ៍ត្រីមួយរូបបំរើការងារនៅក្រសួងការពារជាតិ
មានមុខនាទីជានាយករងនាយកដ្ឋានអប់រំ ។ លោកបានបញ្ចប់ការសិក្សាថ្នាក់បណ្ឌិតផ្នែកនីតិសាស្ដ្រនៅសាកលវិទ្យាល័យចំរើនពហុបច្ចេកវិទ្យា ។ ក្រៅពីនេះ លោកមានកិត្ដិយសទទួលបានមេដាយការងារ និងគ្រឿងឥស្សរិយយសព្រះរាជាណាចក្រកម្ពុជាថ្នាក់មហាសេរីវឌ្ឍន៍ពីព្រះមហាក្សត្រដោយមានស្នាដៃល្អក្នុងការបំរើការងារផ្នែកអប់រំ។ លោកមានកូន១៣នាក់ ក្នុងនោះប្រុស៨ នាក់ ៕
ចែករំលែកព័តមាននេះ