- ភ្នំពេញ
ភ្នំពេញ៖ សេវាដឹកជញ្ជូនសាធារណៈ តាមរយៈរថយន្តក្រុង និងកាណូត នៅក្នុងរាជធានីភ្នំពេញ បានបើកដំណើរការឡើងវិញហើយ ចាប់ពីថ្ងៃទី២ ខែវិច្ឆិកា ឆ្នាំ២០២១។ រដ្ឋបាលរាជធានីភ្នំពេញ…
ភ្នំពេញ៖ សេវាដឹកជញ្ជូនសាធារណៈ តាមរយៈរថយន្តក្រុង និងកាណូត នៅក្នុងរាជធានីភ្នំពេញ បានបើកដំណើរការឡើងវិញហើយ ចាប់ពីថ្ងៃទី២ ខែវិច្ឆិកា ឆ្នាំ២០២១។ រដ្ឋបាលរាជធានីភ្នំពេញ ក៏បានអនុញ្ញាតឱ្យសាធារណជន ជិះដោយមិនបង់ប្រាក់ រយៈពេល ៦ថ្ងៃ ចាប់ពីថ្ងៃទី២ ដល់ថ្ងៃទី៧ ខែវិច្ឆិកា ឆ្នាំ២០២១។
ក្នុងដំណើរការសាកល្បងសេវាដឹកជញ្ជូនសាធារណៈ តាមរថយន្តក្រុង និងកាណូតឡើងវិញ នៅភ្នំពេញ ចាប់ពីថ្ងៃទី២ ខែវិច្ឆិកានេះ គឺរថយន្តក្រុង មាន ៥ខ្សែ រួមមាន៖ ខ្សែទី១-ចេញពីស្ថានីយចំណតរថយន្តក្រុងព្រែកព្នៅ ដល់ស្ថានីយចំណតរថយន្តក្រុងវាលស្បូវ។ ខ្សែទី២-ចេញពីស្ថានីយចំណតរថយន្តក្រុងរង្វង់មូលគួចកាណុង ដល់ស្ថានីយចំណតរថយន្តក្រុង ស្ពានព្រែកសំរោង ក្រុងតាខ្មៅ។ ខ្សែទី៣-ចេញពីស្ថានីយចំណតរថយន្តក្រុង សួនឫស្សីកែវ ដល់ស្ថានីយ ចំណតរថយន្តក្រុងបុរីសន្តិភាព២ តាមមហាវិថីសហព័ន្ធរុស្ស៊ី។ ខ្សែទី៤A-ចេញពីស្ថានីយចំណតរថយន្តក្រុងសួនឫស្សីកែវ ដល់ស្ថានីយចំណតរថយន្តក្រុងបុរីសន្តិភាព២ តាមមហាវិថីសហព័ន្ធរុស្ស៊ី និងខ្សែទី៤B-ចេញពីស្ថានីយចំណតរថយន្តក្រុងសួនឫស្សីកែវ ដល់ស្ថានីយចំណតរថយន្តក្រុងបុរីសន្តិភាព២ តាមមហាវិថីចោមចៅ។ ចំណែកកាណូត ដឹកជញ្ជូនអ្នកដំណើរ ចេញពីស្ថានីយចំណតសួនឫស្សីកែវ ដល់ស្ថានីយចំណតក្រុងតាខ្មៅ។
រដ្ឋបាលរាជធានីភ្នំពេញ បានប្រកាសអនុញ្ញាតឲ្យជិះរថយន្តក្រុង និងកាណូត ដោយមិនបង់ប្រាក់ រយៈពេល ៦ថ្ងៃ ចាប់ពីថ្ងៃទី២ ដល់ថ្ងៃទី៧ ខែវិច្ឆិកា ឆ្នាំ២០២១ និងគិតកម្រៃសេវាធម្មតា ចាប់ពីថ្ងៃទី៨ ខែវិច្ឆិកា ឆ្នាំ២០២១ ដោយលើកលែងមិនគិតថ្លៃ ចំពោះព្រះសង្ឃ ចាស់ជរា កុមារកម្ពស់ក្រោម ១ម៉ែត្រ សិស្ស-និស្សិត កម្មករ-កម្មការិនី កីឡាករ-កីឡារិនី និងគ្រូបង្រៀន។
យ៉ាងណាក៏ដោយ នៅពេលឡានក្រុង និងកាណូតដឹកជញ្ជូនអ្នកដំណើរ បើកដំណើរការឡើងវិញនេះ អាជ្ញាធរ កំណត់ថា អ្នកដំណើរទាំងអស់ ត្រូវគោរពតាមវិធានការសុខាភិបាល ដោយត្រូវបង្ហាញប័ណ្ណចាក់វ៉ាក់សាំង សម្រាប់មនុស្សពេញវ័យ ពាក់ម៉ាស លាងដៃនឹងអាល់កុល វ៉ាស់កម្តៅ ស្កេន QR Code និងអង្គុយតាមកៅអី ដែលបានរៀបចំ។
ការដឹកជញ្ជូនសាធារណៈ តាមរថយន្តក្រុង និងតាមកាណូត បានផ្អាក អំឡុងផ្ទុះព្រឹត្តិការណ៍ឆ្លងកូវីដ១៩ ចាប់តាំងពីដើមឆ្នាំ២០២០ ដើម្បីទប់ស្កាត់ការឆ្លងរាលដាលជំងឺកូវីដ១៩។ តែនៅថ្ងៃដំបូងនៃដំណើរការឡើងវិញ កាលពីថ្ងៃទី២ ខែវិច្ឆិកា មិនសូវមានអ្នកជិះច្រើនទេ ទាំងឡានក្រុង និងទាំងកាណូត។
យ៉ាងណាក៏ដោយ នៅលើឡានក្រុង និងនៅលើកាណូតដឹកជញ្ជូនសាធារណៈនេះ តម្រូវអ្នកដំណើរទាំងអស់ ត្រូវគោរពតាមវិធានការសុខាភិបាល ដើម្បីការពារ និងទប់ស្កាត់កូវីដ១៩ រួមមាន ត្រូវបង្ហាញប័ណ្ណចាក់វ៉ាក់សាំង ពាក់ម៉ាស លាងដៃនឹងអាល់កុល វាស់កម្ដៅ ស្កេន QR-Code និងអង្គុយតាមកៅអី ដែលបានរៀបចំ ដោយមានសញ្ញាខ្វែង មានគម្លាតពីគ្នាជាង ១ម៉ែត្រ។ ក្រៅពីនោះ មានរណាំងផ្លាស្ទីក បាំងរវាងអ្នកដំណើរ និងអ្នកបើកបរ ហើយមិនប្រើម៉ាស៊ីនត្រជាក់ទេ គឺបើកកញ្ចក់ឡាន ជាដើម។
ការបើកដំណើរការសាកល្បងបពសេវាដឹកជញ្ជូនសាធារណៈឡានក្រុង និងកាណូត នៅរាជធានីភ្នំពេញ នាពេលនេះ ធ្វើឡើងស្របពេលនៃការបើកប្រទេសឡើងវិញ លើគ្រប់វិស័យ តាមគន្លងថ្មី មុនដំណើរការបើកទទួលទេសចរណ៍វ៉ាក់សាំង នៅថ្ងៃទី១៨ ខែវិច្ឆិកា ឆ្នាំ២០២១ ចំថ្ងៃបុណ្យអុំទូក។ នៅពេលនេះ សាលារៀន ក៏បើកដំណើរការឡើងវិញ នៅគ្រប់កម្រិត ហើយទេសចរណ៍ ក៏ដំណើរការធម្មតា តាមប្រក្រតីថ្មី ខណៈវិស័យដទៃទៀត ក៏បានបើកឡើងវិញជាបន្តបន្ទាប់។
កន្លងមក ការដឹកជញ្ជូនអ្នកដំណើរ តាមរថយន្តឈ្នួល ទៅមកភ្នំពេញ តាមបណ្តាខេត្តនានា ទាំងរថយន្តឈ្នួលតូចៗ និងទាំងរថយន្តក្រុង បានដំណើរការពេញផ្ទៃប្រទេស តាំងពីពេលមានករណីឆ្លងរាលដាលកូវីដ១៩ ទ្រង់ទ្រាយធំ នៅខែកុម្ភៈ បន្តរហូតដល់ពេលនេះ។ ឡានឈ្នួល និងឡានក្រុងឯកជន ដឹកអ្នកដំណើរកន្លងមក ក៏មិនបានរៀបចំឲ្យបានខ្ជាប់ខ្ជួននូវវិធានការការពារកូវីដ ដូចការរៀបចំរបស់ឡានក្រុង និងកាណូតដឹកជញ្ជូនអ្នកដំណើរ នៅរាជធានីភ្នំពេញនោះទេ។ តែឡានឈ្នួល និងឡានក្រុងឯកជនទាំងនោះ ក៏មិនជួបនឹងហានិភ័យនៃការឆ្លងរាលដាលកូវីដ ទ្រង់ទ្រាយធំឡើយ។
ដូច្នេះដំណើរការសាកល្បងឡានក្រុង និងកាណូតដឹកជញ្ជូនអ្នកដំណើរនៅរាជធានីភ្នំពេញ ទៅមកក្រុងតាខ្មៅ ខេត្តកណ្តាល នាពេលនេះ ក៏នឹងមិនជួបហានិភ័យនៃការឆ្លងរាលដាលកូវីដនោះទេ ខណៈដែលរាជរដ្ឋាភិបាល សម្រេចបើកប្រទេសឡើងវិញ ចាប់តាំងពីថ្ងៃទី១វិច្ឆិកា។ ប៉ុន្តែក៏នៅតែទាមទារឲ្យអ្នកដំណើរទាំងអស់ ត្រូវគោរពឲ្យបានហ្មត់ចត់តាមវិធានសុខាភិបាល ដែលរៀបចំនៅលើឡានក្រុង និងនៅលើកាណូត។ ពោលគឺការពារ ប្រសើរជាងព្យាបាល ត្បិតតែម្នាក់ៗ បានចាក់វ៉ាក់សាំងគ្រប់ដូសហើយក៏ដោយ៕
ចែករំលែកព័តមាននេះ