បន្ទាយមានជ័យ ៖ ច្រកទ្វារព្រំដែនអន្តរជាតិប៉ោយប៉ែតក្នុងខេត្តបន្ទាយមានជ័យ ឈមច្រកអន្តរជាតិខ្លងលឹកទឹកដីថៃខេត្តស្រះកែវមិនទាន់បើកជាផ្លូវការទេ គិតត្រឹមថ្ងៃនេះ១ ខែវិច្ឆិកា ឆ្នាំ២០២១ បើទោះជាកន្លងទៅថ្មីៗប្រទេសថៃបានប្រកាសជាផ្លូវការថា ប្រទេសខ្លួន និងបើកទទួលអ្នកដំណើរ និងភ្ញៀវទេសចរមកពីប្រទេសមានហានិភ័យកូវីដ១៩ទាប និងបានចាក់វ៉ាក់សាំងគ្រប់ដូស ចាប់ពីថ្ងៃទី១ វិច្ឆិកា២០២១ក្តី ។
ច្រកធំលើស្ពានព្រំដែនបន្តបើកជាធម្មតា ដើម្បីដោះដូរទំនិញសេដ្ឋកិច្ច ពាណិជ្ជកម្ម ខណៈច្រកថ្មើរជើងទាំងសងខាងលើស្ពានព្រំដែនមួយនេះភាគីថៃនៅបន្តបិទដដែល ។
ដោយសារភាគីថៃអះអាងតាមប្រព័ន្ធផ្សព្វផ្សាយរបស់ខ្លួនពីការបើកព្រំដែនឡើងវិញ នៅព្រឹកថ្ងៃទី១ វិច្ឆិកានេះ គេឃើញមានពលរដ្ឋខ្មែរបានចេញចូលទៅមកច្រកទ្វារអន្តរជាតិប៉ោយប៉ែត ដើម្បីចង់ដឹងថា តើខាងភាគីថៃបើកច្រកទ្វារព្រំដែនឡើងវិញមែន ឬយ៉ាងណា?
ជុំវិញបញ្ហាខាងលើនេះ មន្ត្រីទំនាក់ទំនងព្រំដែនកម្ពុជាថៃប្រចាំច្រកទ្វារអន្តរជាតិប៉ោយប៉ែតមិនអាចទាក់ទងសុំការបំភ្លឺបានទេ ដោយទូរស័ព្ទចុចចូលជាច្រើនដងគ្មានអ្នកទទួល ។
ប្រធានសេនាធិការនគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត លោកវរសេនីយ៍សេម មករា ប្រាប់តាមទូរស័ព្ទថា មកទល់ថ្ងៃនេះ ខាងភាគីថៃមិនទាន់មានការបើកច្រកទ្វារព្រំដែនអន្តរជាតិខ្លងលឹកក្នុងស្រុកអារញ្ញខេត្តស្រះកែវជាប់កម្ពុជាច្រកទ្វារអន្តរជាតិប៉ោយប៉ែតជាចំហរនៅឡើយទេ ដោយបើកឲ្យដំណើរការតែរថយន្តដឹកទំនិញ ឯផ្លូវថ្មើរជើងនៅបិទដដែល ។
មិនតែប៉ុណ្ណោះលោកថា មិនទាន់មានរបាយការណ៍ណាមួយពីភាគីថៃរឿងបើកច្រកទ្វារព្រំដែនអន្តរជាតិប៉ោយប៉ែតខ្លងលឹកនោះដែរ ៕
ចែករំលែកព័តមាននេះ