ពិធីបុណ្យរំឭកព្រះឧបការគុណសម្តេចព្រះសង្ឃរាជជួន ណាត
ខេត្តសៀមរាប ៖ ពិធីបុណ្យរំឭកព្រះឧបការគុណសម្តេចព្រះសង្ឃរាជជោតញ្ញាណោ ជួន ណាត និងក្រុមជំនុំព្រះត្រៃបិដកខែ្មរ លើកទី៨ បានរៀបចំកាលពីថៃ្ងទី១ ខែមេសា ឆ្នាំ២០១៦…
ខេត្តសៀមរាប ៖ ពិធីបុណ្យរំឭកព្រះឧបការគុណសម្តេចព្រះសង្ឃរាជជោតញ្ញាណោ ជួន ណាត និងក្រុមជំនុំព្រះត្រៃបិដកខែ្មរ លើកទី៨ បានរៀបចំកាលពីថៃ្ងទី១ ខែមេសា ឆ្នាំ២០១៦ នៅវត្តរាជបូព៌ សង្កាត់សាលាកំរើក ក្រុងសៀមរាប ខេត្តសៀមរាប ក្រោមព្រះវត្តមានរបស់ព្រះមហាវិមលធម្មពិន សែម សិរីសុវណ្ណោ រាជាគណៈថ្នាក់ទោគណៈមហានិកាយនិងជាឧត្តមទីប្រឹក្សាគណៈសង្ឃនាយក និងលោកកៅ សោភណ្ឌ សមាជិកក្រុមប្រឹក្សាខេត្តសៀមរាប ។
គណៈអធិបតីបានបូជាផ្កា ទៀន ធូប និងព្រះសង្ឃស្វាធ្យាយជយន្តោ គោរពរំឭកព្រះរាជវិញ្ញាណក្ខន្ធសម្តេចព្រះមហាសុមេធាធិបតី ជោតញ្ញាណោ ជួន ណាត សម្តេចព្រះសង្ឃរាជថ្នាក់ទី១ និងក្រុមជំនុំព្រះត្រៃបិដក និងវចនានុក្រមខ្មែរ ព្រមទាំងព្រះមហាវីរសមណទាំងគណៈមហានិកាយ គណៈធម្មយុត្តិកនិកាយ និងមហាវីរបុព្វបុរសខ្មែរ និងការប្រកាសព្រះឧបការគុណ ។
ព្រះតេជគុណសុមនោ ហេង ប៊ុជា មានសង្ឃដីកាថា បុណ្យរំឭកព្រះឧបការគុណនេះ គឺជាការបញ្ជាក់នូវស្នាព្រះហស្តនៃព្រះរាជនិពន្ធ និងចងក្រងគម្ពីរ ក្បួនខ្នាត ក្នុងការអភិរក្សអក្សរសាស្ត្រជាតិខ្មែរឲ្យបានគង់វង្ស ។
ព្រះតេជគុណស៊ុម សិរីវិបុល ព្រះនាយកវិទ្យុសាសនាកម្ពុជរដ្ឋ បានអានពព្រះរាជជីវប្រវត្តិ និង ស្នាព្រះហស្តរបស់សម្តេច ព្រះមហាសុមេធាធិបតី ជោតញ្ញាណោជួន ណាត សម្តេចព្រះសង្ឃរាជ ដែលបានបន្សល់ទុកដល់ប្រជាជនខ្មែរយើងគ្រប់រូបគោរពប្រតិបត្តិ ។ ក្រោយពេលព្រះអង្គទ្រង់សោយទិវង្គតរយៈពេល៤៧ឆ្នាំមកនេះ ព្រះកិត្តិគុណ ព្រះកិត្តិនាមរបស់សម្តេចនៅមានគន្ធពិដោរ និងស្នាព្រះហស្តកាន់តែមានសារសំខាន់សម្រាប់ប្រជាជាតិខ្មែរយើងទៅពេលអនាគត ។
លោកកៅ សោភណ្ឌ បានឲ្យដឹងថា ការប្រារព្ធទិវាបុណ្យរំឭកព្រះឧបការគុណសម្តចព្រះមហាសុមេធាធិបតី ជោតញ្ញាណោជួន ណាត ជាលើកទី៨ហើយនៅខេត្តសៀមរាប ហើយមានអត្ថន័យយ៉ាងជ្រាលជ្រៅ ដែលសម្តចជាមហាវរសង្ឃដ៏ឆ្នើម ដែលធ្វើឲ្យបុព្វជិត ពុទ្ធបរិស័ទ ប្រជាពលរដ្ឋខ្មែរយើងមិនអាចបំភ្លេចបាន ។ ក្នុងមួយជីវិតរបស់ព្រះអង្គបានបំពេញបេសកកម្ម ក្នុងវិស័យសាធារណៈ សង្គមកិច្ច សិក្សាធិការ និងបានចងក្រងនូវគម្ពីរ ដីកាជាច្រើនមានគម្ពីរស្លឹករឹត សៀវភៅ និងបានប្រែភាសាបាលីមកជាភាសាខ្មែរសម្រាប់ជាផលប្រយោជន៍ដល់ពុទ្ធបរិស័ទ និងរៀបរៀងវចនានុក្រមភាសាខ្មែរដែលជាស្នាព្រះហស្តដ៏ធំធេងរបស់ព្រះអង្គ ។ ព្រះអង្គជាព្រះអគ្គនិពន្ធអក្សរសាស្ត្រខ្មែរ ព្រមទាំងជាសមាជិកកិត្តិយសនៃសមាគមអ្នកនិពន្ធខ្មែរ ប្រកបដោយគុណប្រយោជន៍ ទាំងផ្លូវលោក ផ្លូវព្រះធម៌ ដែលបានបំភ្លឺពុទ្ធបរិស័ទ ឱ្យចេះវិភាគរកហេតុផល ខុស និងត្រូវ ហើយមានជំនឿជាក់លើព្រះពុទ្ធសាសនា ។ ការបាត់បង់ព្រះរូបរបស់ព្រះអង្គក៏ពិតមែន តែព្រះកិត្តិនាមរបស់ព្រះអង្គ គឺស្ថិតនៅជានិច្ចនិរន្តរ៍ចំពោះប្រជាជាតិ និងមាតុភូមិកម្ពុជាជារៀងរហូត ។
លោកកៅ សោភណ្ឌ បានសំណូមពរដល់ប្រជាពុទ្ធបរិស័ទត្រូវប្រកាន់យកតែអំពើល្អដើរតាមផ្លូវកណ្តាល ដើម្បីសេចក្តីសុខ និងចូលរួមអនុមោទនាចាប់យកមគ្គផលទៅតាមកម្លាំងសទ្ធាទុកជាគុណប្រយោជន៍តម្កល់ទុកក្នុងព្រះពុទ្ធសាសនាទាំងបច្ចុប្បន្នជាតិ និងទៅអនាគតជាតិផងដែរ ។ ម្យ៉ាងទៀតវិស័យព្រះពុទ្ធសាសនា គឺជាប្រទីបបំភ្លឺផ្លូវដល់ជនគ្រប់រូបឲ្យប្រតិបត្តិអំពើល្អ ហើយក៏ជាវិស័យមួយកំពុងទាក់ទាញដល់អ្នកទេសចរជាតិ អន្តរជាតិ ចូលមកសិក្សាឈ្វេងយល់អំពីផងដែរ ។
ព្រះមហាវិមលធម្មពិន សែម សិរីសុវណ្ណោ មានពុទ្ធឱវាទមួយចំនួន សម្រាប់ពុទ្ធបរិស័ទ និងព្រះសង្ឃត្រូវគោរព ប្រតិបត្តិទៅតាមផ្លូវធម៌របស់ព្រះសម្មាសម្ពុទ្ធ ព្រះបរមគ្រូនៃយើង ។ ម្យ៉ាងទៀតព្រះសង្ឃ ពុទ្ធបរិស័ទទាំងអស់ ត្រូវថែរក្សាឲ្យបានគង់វង្សនូវមរតកវប្បធម៌ អក្សរសាស្ត្រជាតិដែលជាស្នាព្រះហស្តនៃព្រះរាជនិពន្ធ និងចងក្រងគម្ពីរ ក្បួនខ្នាត ក្នុងការអភិរក្សអក្សរសាស្ត្រជាតិខ្មែរឲ្យបានគង់វង្ស ។ ពុទ្ធបរិស័ទទាំងអស់ត្រូវប្រកាន់យកការបំពេញអំពើជាកុសលកម្មតាមផ្លូវកណ្តាលដើម្បីជាគុណប្រយោជន៍ដល់មនុស្សលោក និងសង្គមជាតិទាំងមូល ។
ដើម្បីភ្ជាប់និស្ស័យទៅនឹងពិធីបុណ្យរំឭកឧបការគុណនេះ លោកបណ្ឌិតអភិបាលខេត្ត បានប្រគេនបច្ច័យចំនួន២លានរៀល និងលោកគង់ ប៊ុនលី ចំនួន២០០ដុល្លារ រួមទាំងពុទ្ធបរិស័ទ និងសប្បុរសជនមួយចំនួនផងដែរ ៕
ចែករំលែកព័តមាននេះ