យោងតាមឯកសារអ្នកទស្សនវិជ្ជាពុទ្ធសាសនាបានពន្យល់ថា ព្រះពុទ្ធសាសនាមានដើមដំណើតនៅលើភពផែនដីនេះហើយបានស្ថិតស្ថេរគង់វង្ស ព្រមទាំងមានការតាំងមាំក្នុងចិត្តរបស់មនុស្សទាំងឡាយ មិនមែនព្រោះតែបង្រៀនមនុស្សឲ្យជឿលើការឃោសនា ការសម្ដែងអួតសរសើរ ការអូសទាញ ឬការបញ្ចុះបញ្ចូលមនុស្សឲ្យជឿទាំងខ្វះហេតុផល ឬឲ្យជឿដោយបង្ខិតបង្ខំនោះទេ ។
ពិតណាស់អ្នកដែលគោរពបូជាព្រះពុទ្ធសាសនា មិនមែនបែបប្រមូលបរិស័ទនោះឡើយ ហើយក៏មិនមែនជឿព្រោះតែបានលាភសក្ការៈនោះដែរ គឺគ្រប់មនុស្សទាំងអស់ដែលត្រូវបានហៅថាជាពុទ្ធបរិស័ទនោះគឺសុទ្ធតែបានឆ្លងកាត់ការឈ្វេងយល់យ៉ាងច្បាស់អំពីគោលការណ៍សំខាន់ៗនៃមាគ៌ាប្រតិបត្តិរួចទៅហើយ ទើបពួកគេមានការជឿជាក់ជាខាងក្រោយ មិនមែនជឿរួចហើយទើបប្រតិបត្តិតាមនោះទេ វាស្របទៅនឹងពាក្យថា គិតហើយសឹមគូរ ទើបត្រឹមត្រូវប្រាកដនិយម មិនមែនគូររួចហើយទើបគិតជាខាងក្រោយនោះឡើយ ។
បើទោះជាច្បាប់នៅកម្ពុជាបានចែងថា ប្រជាជនទាំងពីរភេទមានសិទ្ធិគោរព និងជឿលើសាសនាដែលខ្លួនពេញចិត្តក៏ដោយ តែក៏បានប្ដេជ្ញាយ៉ាងមុតមាំផងដែរថា ព្រះពុទ្ធសាសនា គឺជាសាសនារបស់រដ្ឋ ប្រជាពលរដ្ឋភាគច្រើនបំផុតជាអ្នកគោរពបូជាព្រះពុទ្ធសាសនា និងគាំទ្រយ៉ាងមុតមាំមិនថាតែ អ្នករស់នៅទីក្រុង ឬជនបទស្រុកស្រែចម្ការនោះទេ ហើយថែមទាំងមានពុទ្ធមណ្ឌល វត្តអារាមគ្រប់ទិសទីក្នុងប្រទេសផងដែរ ៕ សាន សារិន
ចែករំលែកព័តមាននេះ