រាជធានីភ្នំពេញ ៖ កងរាជអាវុធហត្ថ ខណ្ឌដូនពេញបានធ្វើការឃាត់ខ្លួននាយ ទាហានម្នាក់ដែលបំរើការងារនៅក្រសួងការពារជាតិ កាលពីវេលាម៉ោង១០យប់ ថ្ងៃទី ១៣ កក្កដា បន្ទាប់ពីនាយទាហានរូបនោះ បាញ់បោះសេរីនៅផ្សារសូរិយាម៉ល ស្ថិតនៅ កែងផ្លូវលេខ១៥៤ និង៥១ ក្នុងសង្កាត់ផ្សារ ថ្មីទី៣ ខណ្ឌដូនពេញ ដែលបង្កឱ្យមានការ ភ័យខ្លាច និងប៉ះពាល់ដល់សន្ដិសុខសាធារណៈ ។លោកវរសេនីយ៍ត្រី ថោង ពិសិដ្ឋ មេបញ្ជាការកងរាជអាវុធហត្ថខណ្ឌដូនពេញបានឱ្យដឹងថា ជនបាញ់បោះសេរីដែលត្រូវកងរាជអាវុធហត្ថឃាត់ខ្លួននោះមានឈ្មោះកើត ស៊ីដេត ភេទប្រុស អាយុ២៩ឆ្នាំ ជានាយទាហានបំរើការងារនៅក្រសួងការពារជាតិ មានឋានន្ដរស័ក្ដិជាអនុសេនីយ៍ទោ។ ខណៈ ពេលឃាត់ខ្លួន សមត្ថកិច្ចដកហូតបានកាំភ្លើង ខ្លីមួយដើមម៉ាកកា៥៤ លេខ៥៥០០២៥២៧ បង់មួយ និងមានគ្រាប់ចំនួនបីគ្រាប់ ។
នាយទាហានរូបនេះបានសារភាពថា មុនពេលកើតហេតុ រូបគេ និងមិត្ដភក្ដិបីនាក់ ទៀតបានជិះម៉ូតូយកមកផ្ញើនៅកន្លែងផ្ញើម៉ូតូ ក្នុងផ្សារសូរិយាម៉ល រួចនាំគ្នាអង្គុយផឹក ស៊ីនៅហាងសូរិយាម៉ល ។ បន្ទាប់ពីផឹកស៊ី ជជែកគ្នាលេង និងស្រវឹងរៀងៗខ្លួនរួចមករូប គេបានគិតលុយ ហើយនាំគ្នាទៅយកម៉ូតូ ដើម្បីជិះទៅផ្ទះ លុះទៅដល់កន្លែងផ្ញើម៉ូតូ ទើបដឹងថា បាត់សំបុត្រផ្ញើ ពេលនោះរូបគេ ក៏បានព្យាយាមសុំការសំរួលពីអ្នកទទួលខុស ត្រូវនៅទីនោះ និងមានអ្នកធានាដើម្បីយក ម៉ូតូជិះទៅផ្ទះ ប៉ុន្ដែត្រូវបានអ្នកយាមម៉ូតូ បដិសេធក៏កើតជារឿងខឹងសម្បា និងទប់ ចិត្ដមិនបានរូបគេក៏ដកកាំភ្លើងបាញ់មួយគ្រាប់ ឡើងទៅលើ។
មេបញ្ជាការកងរាជអាវុធហត្ថខណ្ឌដូន ពេញបានបញ្ជាក់ថា ខណៈដែលឈ្មោះកើត ស៊ីដេត (ជនជាប់ចោទ) កំពុងបាញ់បោះសេរី នោះ គឺស្របពេលដែលកំលាំងកងរាជអាវុធ ហត្ថកំពុងជិះម៉ូតូល្បាតទៅដល់ក៏ឃាត់ខ្លួននាំ ទៅទីបញ្ជាការដើម្បីសាកសួរ ។នៅព្រឹកថ្ងៃដដែល នាយទាហានរូបនេះ ត្រូវបានកសាងសំណុំរឿងបញ្ជូនទៅទីបញ្ជា ការកងរាជអាវុធហត្ថរាជធានីភ្នំពេញ ៕
ចែករំលែកព័តមាននេះ