ក្រុមហ៊ុនចុច…ចុច…!
ប៉ាណូយីហោតាមហាង…ប៉ាណូផ្សាយពាណិជ្ជកម្មក្នុងរាជធានីភ្នំពេញទាំងមូល មិនមែនបង់ថ្លៃឈ្មួលផ្ទាល់ឱ្យរដ្ឋទេ…គឺបង់ចូលថង់ចូលបាវឯកជន ទាំងដុលតែម្តង…
ប៉ាណូយីហោតាមហាង…ប៉ាណូផ្សាយពាណិជ្ជកម្មក្នុងរាជធានីភ្នំពេញទាំងមូល មិនមែនបង់ថ្លៃឈ្មួលផ្ទាល់ឱ្យរដ្ឋទេ…គឺបង់ចូលថង់ចូលបាវឯកជន ទាំងដុលតែម្តង…។
មានក្រុមហ៊ុនឯកជនមួយ…បានសិទ្ធិម៉ៅការទារចំណូលពីប៉ាណូផ្សព្វផ្សាយពាណិជ្ជកម្មរយៈពេល១០ឆ្នាំ គិតពីឆ្នាំ២០១៤ដល់ឆ្នាំ២០២៤ ទើបដាច់ខ្យល់ងាប់តៃហោង…
មិនដឹងពាក្យម៉ៅការនោះត្រូវបង់ចូលរដ្ឋប៉ុន្មានទេក្នុងមួយឆ្នាំ…គ្មានប្រភពច្បាស់ការណ៍ណាមួយហ៊ានបង្ហើបឱ្យដឹងឡើយ…លាក់ជិតឈឹង…ស្ងាត់ឈឹងដូចចោរគាស់ក្រោលទាំងថ្ងៃ…
មានទូរស័ព្ទហូរហែប្រាប់កោះសន្តិភាពថា ពួកគេមិនចង់បង់ប្រាក់ថ្លៃយីហោផ្សព្វផ្សាយទេ…ព្រោះបង់ឱ្យឯកជន…បើបង់ចូលរដ្ឋផ្ទាល់តែម្តង…មិនខ្លាច មិនរារែកទេ…នរណាក៏ចង់ជួយថវិកាជាតិដែរ…បើបង់ចូលហោប៉ៅឯកជន…គេខឹងណាស់…គេឈឺចាប់…។
អ្នកសង្កេតការណ៍…អ្នកតាមដាន…បាននិយាយថា នៅរាជធានីភ្នំពេញ ស្លាកប៉ាណូ…ស្លាកយីហោតាមហាង…តាមទីសាធារណៈ…កើនឡើងស្អេកស្កះសក្តិសមជាបេះដូងសេដ្ឋកិច្ចជាតិ…ជារាជធានីសេដ្ឋកិច្ចរីកចំរើន…បើប្រមូលប្រាក់តាមថ្លៃប៉ាណូគ្រប់ប្រភេទអាចបានរាប់លានដុល្លារក្នុងមួយឆ្នាំៗ ។
មិនដឹងឯកជនបង់ចូលរដ្ឋប៉ុន្មានទេក្នុងមួយឆ្នាំ…ព្រោះដំណឹងនេះបិទជិតឈឹង…ព្រោះជាល្បែងម៉ៅការ ។
មានប្រភពមាត់ដាចខ្លះប្រាប់ថា មួយឆ្នាំយ៉ាងច្រើនបង់ឱ្យរដ្ឋ២សែនដុល្លារប៉ុណ្ណោះ ។
ប្រសិនដូច្នោះមែន…ម្ចាស់ប៉ាណូទាំងឡាយអើយដែលកំពុងខឹងសម្បារ…កំពុងមិនចង់បង់…ពិតជាមានទស្សនៈត្រឹមត្រូវ…គឺមិនបង់ទេ ។
កន្លងមកនេះមានមនុស្សមួយក្រុម…មកពីក្រុមហ៊ុនមួយឈ្មោះ RKS…ដើរវាស់ទំហំប៉ាណូតាមហាង…តាមផ្ទះឱ្យតែមានយីហោ…វាស់គ្មានសល់រួចធ្វើលេខគិតលុយជាដុល្លារ…បញ្ជាឱ្យម្ចាស់ចូលខ្លួនទៅបង់…។ល។ បង់ខ្មោចយ៎អី !…មានបង់ចូលរដ្ឋឯណា ? បង់ឱ្យមេក្រុមហ៊ុនអត់ដេញថ្លៃមួយ ឈ្មោះ RKS…មិនដឹងរបស់សេដ្ឋីមានអំណាច មានខ្នងមួយណាទេ…ប្រមូលកើបលុយស្រស់ៗតែម្តង…ដូចឈ្លើងជញ្ជក់ឈាម…
រដ្ឋយើងជាប្រទេសកំពុងអភិវឌ្ឍ…ជាប្រទេសក្រីក្រក្នុងលោក…ចំណូលសម្រាប់រដ្ឋមានច្រើនណាស់…ហើយងាយស្រួលយកទៀត…ចូលរដ្ឋឈឹបៗ ដូចចំណូលពីប៉ាណូផ្សាយពាណិជ្ជកម្មជាដើម…ប៉ុន្តែអ្នកក្រឫកធំពេក…អ្នកក្រមិនចេះទុកដាក់លុយ…មិនចេះរកលុយដោយខ្លួនឯង…ពូកែខាងត្រូវរ៉ូវជាមួយឈ្មួញកណ្តាល…ទុកឱកាសឱ្យឈ្មួញកណ្តាលត្របាក់លេប…ហើយសល់តិចតួចសម្រាប់ចិញ្ចឹមសង្គម…ហេ ! ហេ !
ទស្សនៈជាច្រើនបង្ហាញថា បើបង់ឱ្យរដ្ឋមិនខ្លាចបង់ទេ…ប៉ុន្តែបើបង់ឱ្យឯកជន…មិនចង់…មិនសប្បាយបង់ឡើយ…
គេត្រូវគ្នាពីក្រោមដល់លើ…ស៊ីអស់ហើយ…បោះឆ្អឹងសម្រាប់រដ្ឋ…ហ៎ ! ស៊ីទៅ !!
បើរដ្ឋគ្មានសមត្ថភាព ម៉េចមិនដេញថ្លៃ…? ម៉េចមិនរកដៃគូប្រកួតប្រជែង ?
ឬមួយមានតែក្រុមហ៊ុន RKS នេះមួយទេដែលពូកែចុច…ចុច…?
នៅក្រុងព្រៃនគរ រដ្ឋប្រមូលខ្លួនឯង បានចំណូលពីប៉ាណូជាង១០លានដុល្លារក្នុងមួយឆ្នាំ ។ មន្ត្រីសាលាក្រុងវៀតណាមម្នាក់ប្រាប់ម្សិលមិញ…
នៅភ្នំពេញឧបមាបានដប់ ម្ភៃមឺុនដុល្លារមួយឆ្នាំ…អាចបាត់ចំណូលយ៉ាងតិចមួយលានដុល្លារ ។ ចង់ថា២លាន ៣លានដុល្លារក៏បានដែរ…ព្រោះតួលេខពិតត្រូវលាក់ជិតឈឹង…
ទស្សនៈនានាប្រាប់ថា ដើម្បីយុត្តិធម៌សង្គម ត្រូវតែសើរើដាក់ដេញថ្លៃឡើងវិញ…ទាន់ក្តៅៗ…ក្លាហាន…ហ៊ានទេ ?
ផ្លូវជាតិលេខ៤ ផ្លូវវេងស្រេងធ្វើបានរឿងអីចំណូលប៉ាណូធ្វើមិនបាន ?
អាឡេវ
ចែករំលែកព័តមាននេះ