ពិធីសំណេះសំណាលនិងសួរសុខទុក្ខកងទ័ព បន្ដទៅសាលាកុមារគថ្លង់និងពិការភ្នែក
ខេត្តសៀមរាប ៖ ឯកឧត្ដម ទៀ បា.ញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះជួយខេត្តសៀមរាប
ខេត្តសៀមរាប ៖ ឯកឧត្ដម ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះជួយខេត្តសៀមរាប និងលោកជំទាវព្រមទាំងឯកឧត្តមលោកឧកញ៉ាលោកជំទាវជាសមាជិករដ្ឋសភា រដ្ឋលេខាធិការ អនុរដ្ឋលេខាធិការ គណៈអភិបាលខេត្ត មេបញ្ជាការយោធភូមិភាគទី៤និងកងពលធំអន្តរាគមន៍លេខ២ ព្រមទាំងអស់លោកលោកស្រីជាភរិយាថ្នាក់ដឹកនាំមន្ទីរ ស្ថាប័ន អង្គភាពបានអញ្ជើញចុះសួរសុខទុក្ខយោធិនពិការគូលែនលេខ៣១៧ បន្តទៅសួរសុខទុក្ខកងទ័ព ដែលកំពុងសម្រាកព្យាបាលនៅមន្ទីរពេទ្យយោធាភូមិភាគ៤ និងបន្តទៅធ្វើការសំណេះសំណាលជាមួយកុមារនៃសាលាកុមារគថ្លង់នឹងពិការភ្នែក នាថ្ងៃទី២៨ ខែមីនា ឆ្នាំ២០១៦ នៅខេត្តសៀមរាប។
ក្នុងកិច្ចស្វាគមន៍របស់លោកស្រីនាយិកាសាលាកុមារគថ្លង់នឹងពិការភ្នែកខេត្ត បានគូសបញ្ជាក់ឲ្យដឹងថា ឆ្លងកាត់រយៈពេល១៦ឆ្នាំមកនេះ សាលាមានអគារចំនួន១២ខ្នង បុគ្គលិកចំនួន៤០នាក់ ស្រី១៦នាក់ និងមានសិស្សសរុប១២២នាក់ ស្រី៤១នាក់ ក្នុងនោះសិស្សគថ្លង់៩៤នាក់ ស្រី៣០នាក់ សិស្សពិការភ្នែក២៨នាក់ ស្រី១១នាក់ និងស្នាក់នៅរៀនសូត្រក្នុងសាលាចំនួន៧២នាក់ ស្រី៣៣នាក់។ ក្នុងនោះឯកឧត្ដម ទៀ បាញ់ និងលោកជំទាវ ព្រមទាំងសប្បុរសជន បានឧបត្ថម្ភគាំទ្រ ជាសម្ភារសិក្សារួមមាន ស្បៀងអាហារប្រចាំខែ ដល់សាលាកុមារគថ្លង់នឹងពិការភ្នែក ដែលសកម្មភាពទាំងនេះជាការផ្តល់នូវភាពកក់ក្តៅចំពោះកុមារ និងជម្រុញឲ្យកុមារទាំងអស់ឱ្យមានការពុះពារតស៊ូទៀតផង។
បន្ទាប់ពីមានការថ្លែងអំណរគុណរបស់តំណាងសិស្សពិការភ្នែកចំពោះគណៈប្រតិភូរួចមក លោកក៏បានមានប្រសាសន៍សំណេះសំណាលជាមួយក្មួយៗដែលជាកុមារគថ្លង់ និងពិការភ្នែក នាឱកាសនោះ ឯកឧត្ដមទៀ បាញ់ ក៏បានសម្ដែងនូវការអាណិតអាសូរចំពោះក្មួយៗកុមារគថ្លង់នឹងពិការភ្នែកពីកំណើត ដែលត្រូវបានទទួលការអប់រំនឹងរៀនសូត្រនៅតាមមជ្ឈមណ្ឌលចំណេះដឹងទូទៅ និងបច្ចេកទេស ក្រោមការយកចិត្តទុកដាក់ពីលោកគ្រូអ្នកគ្រូដែលដែលជាម្តាយទី២របស់ក្មួយៗហើយពិសេសព្រមទាំងទទួលបានការចិត្តទុកដាក់ពីប្រមុខរាជរដ្ឋាភិបាលកម្ពុជា ក្រោមកិច្ចដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី និងសម្តេចគត្តិព្រឹទ្ធបណ្ឌិត ព្រមទាំងថ្នាក់ដឹកនាំគ្រប់លំដាប់ថ្នាក់ តែងបានធ្វើការផ្គត់ផ្គង់ជាប្រចាំខែដល់ក្មួយៗនៃសាលាកុមារគថ្លង់នឹងពិការភ្នែក ព្រមទាំងធ្វើការរៀបចំជួបជុំកម្សាន្ដសប្បាយជាមួយក្មួយៗទៀតផង។
ឯកឧត្ដម ទៀ បាញ់ ក៏បានធ្វើការកោតសរសើរចំពោះលោកគ្រូអ្នកគ្រូដែលបានខិតខំបង្ហាត់បង្រៀនដល់ក្មួយៗទាំងអស់រហូតបានជួយស្វែងរកការងារជូនដល់សិស្សគថ្លង់នឹងពិការភ្នែក តាមបណ្តាក្រុមហ៊ុនឯកជនដើម្បីធ្វើឱ្យជីវភាពប្រចាំថ្ងៃកាន់តែប្រសើឡើង។ លោកឧបនាយករដ្ឋមន្ត្រីក៏បានលើកនូវដំបូន្មានល្អៗមួយចំនួនសម្រាប់ក្មួយៗកុមារគថ្លង់នឹងពិការភ្នែកទាំងអស់ត្រូវគោរពត្រង់ត្រាប់នូវដំបូន្មានរបស់លោកគ្រូអ្នកគ្រូ និងចេះជួយនូវទុក្ខធុរៈមិត្តភក្តិ ចេះស្រឡាញ់សាមគ្គីគ្នាឲ្យបានល្អនៅក្នុងមជ្ឈមណ្ឌល ព្រមទាំងត្រូវខិតខំសិក្សារៀនសូត្រ និងត្រូវចៀសឲ្យឆ្ងាយពីគ្រឿងញៀនដែលសង្គមស្អប់ខ្ពើម។
ក្នុងឱកាសនោះដែរ លោកឧបនាយករដ្ឋមន្ត្រី និងលោកជំទាវ ក៏បាននាំយកនូវអំណោយចែកជូនដល់យោធិនពិការគូលែនទាំង៣១៧ ព្រមទាំងបន្តទៅចែកអំណោយដល់យោធាកំពុងសម្រាកព្យាបាលនៅមន្ទីរពេទ្យយោធាភូមិភាគ៤ និងបន្តទៅសួរសុខទុក្ខព្រមទាំងនាំយកនូវអំណោយចែកជូនដល់សិស្សគថ្លង់ដោយម្នាក់ៗទទួលបាន សៀវភៅ៥ក្បាល ប៊ិច២ដើម សារុង១ ក្រម៉ា១ ថវិកា៣ម៉ឺនរៀល សិស្សពិការភ្នែកម្នាក់ៗ សារុង១ ក្រម៉ា១ ថវិកា៣ម៉ឺនរៀល លោកគ្រូអ្នកគ្រូម្នាក់ៗទទួលបានសៀវភៅ១៥ក្បាល ប៊ិច៥ដើម សារុង១ ក្រម៉ា១ ថវិកា៥ម៉ឺនរៀល និងផ្គត់ផ្គង់ស្បៀងអាហារនូវគ្រឿងឧបភោគបរិភោគដល់សាលារយៈពេល៥ខែ នូវអង្ករ៥តោន ត្រីខ៥កេស, មី២០កេស, ទឹកក្រូច៨កេស នំស្រួយ៣កេស និង៥ថងធំ និងកំព្យូទ័រ១គ្រឿង ព្រីនធ័រ១គ្រឿង តុការិយាល័យ១ និងថវិកាចំនួន៥លានរៀលផងដែរ។ ក្នុងឱកាសនោះក៏មានរៀបចំជួបជុំពិសារអាហារថ្ងៃត្រង់ជូនដល់ក្មួយៗពិការដោយ លោកជំទាវ អស់លោកលោកស្រី បានបញ្ចុកអាហារដល់ក្មួយៗកុមារគថ្លង់ និងពិការភ្នែកក្នុងការអាណិតអាសូរ និងទឹកចិត្តជាម្តាយឳពុករបស់ក្មួយៗប្រកបដោយភាពរីករាយបំផុត៕
ចែករំលែកព័តមាននេះ