ខេត្តកំពង់ឆ្នាំង ៖ កូនក្រពើមួយក្បាលត្រូវបានប្រជាពលរដ្ឋនៅភូមិកោះលត ឃុំកោះថ្កូវ ស្រុកជលគីរីចាប់បាន បង្កការភ្ញាក់ផ្អើលកាលពីយប់ថ្ងៃទី២៤ តុលា ខណៈគាត់ទៅឆ្លុះកង្កែបក៏ប្រទះសត្វក្រពើ២ក្បាល តែចាប់បានតែមួយក្បាលទេ ។…
ខេត្តកំពង់ឆ្នាំង ៖ កូនក្រពើមួយក្បាលត្រូវបានប្រជាពលរដ្ឋនៅភូមិកោះលត ឃុំកោះថ្កូវ ស្រុកជលគីរីចាប់បាន បង្កការភ្ញាក់ផ្អើលកាលពីយប់ថ្ងៃទី២៤ តុលា ខណៈគាត់ទៅឆ្លុះកង្កែបក៏ប្រទះសត្វក្រពើ២ក្បាល តែចាប់បានតែមួយក្បាលទេ ។
បើតាមយុវជនឈ្មោះ ផន ភារម្យ អាយុ១៩ឆ្នាំ មានទីលំនៅភូមិឃុំខាងលើ បានឲ្យដឹងថា នៅយប់ថ្ងៃទី២៤ តុលា រូបគេបានទៅឆ្លុះកង្កែបជាមួយឪពុក ហើយក៏បានប្រទះឃើញកូនក្រពើ២ក្បាល ដែលកំពុងតែបណ្តែតខ្លួនមួយក្បាលនៅទឹកជ្រៅ មួយក្បាលនៅទឹករាក់ ហើយក៏នាំគ្នាចាប់បានមួយក្បាលដែលនៅទឹករាក់ ពេលយកមកដល់ផ្ទះវាស់ប្រវែងនិងថ្លឹងទម្ងន់ឃើញមានប្រវែង ១ ម៉ែត្រ ទម្ងន់៣គីឡូក្រាម ។ យូរជនរូបនោះបានបញ្ជាក់ថា មិនដឹងក្រពើរួចពីកន្លែងចិញ្ចឹមក្រពើណានោះទេ ។
ដោយឡែក តាមសេចក្តីរាយការណ៍ពីប្រជាពលរដ្ឋ ដែលនៅក្នុងភូមិខាងលើនោះបានឲ្យដឹងថា កន្លងមកពួកគាត់ធ្លាប់ចាប់បានកូនក្រពើជារឿយៗដែរ បើគិតមកដល់ពេលនេះ ប្រមាណជាង១០ក្បាលហើយ ។ ដោយហេតុនេះ ហើយពួកគាត់មានការភ័យខ្លាចនិងសំណូមពរដល់អាជ្ញាធរមានសមត្ថកិច្ចជួយស្រាវជ្រាវរកម្ចាស់ក្រពើ ឬក៏អាចជាក្រពើធម្មជាតិ ដែលមេក្រពើបង្កគ្រោះថ្នាក់ដល់ប្រជាពលរដ្ឋ ។
ទាក់ទងដល់បញ្ហានេះ លោក ចិន ផាន់ណា មេឃុំកោះថ្កូវ បានបញ្ជាក់ថា ពេលនេះ លោកកំពុងតែប្រមូលព័ត៌មាន មិនដឹងថាកូនក្រពើរួចពីកន្លែងណា? ឬក្រពើធម្មជាតិនោះទេ ។ ហេតុនេះហើយ គាត់សូមអំពាវនាវដល់បងប្អូនប្រជាពលរដ្ឋមេត្តាប្រុងប្រយ័ត្នផងដែរ ព្រោះកន្លងមក ក៏មានប្រជាពលរដ្ឋចាប់បានកូនក្រពើដូចដែលមានសេចក្តីរាយការណ៍នោះដែរ ៕
ចែករំលែកព័តមាននេះ