ខេត្តព្រះសីហនុ៖ យុទ្ធនាការបិទផ្សព្វផ្សាយបណ្ណព័ត៌មានពីពេលវេលាបញ្ចេញសំរាម និងប្រមូល ដឹកជញ្ជូនសំរាម នៅតាមដងផ្លូវចំនួន ៤៧ខ្សែ ក្នុងក្រុងព្រះសីហនុ កាលពីថ្ងៃទី២៣ ខែតុលា។ នោះ នៅផ្លូវ ២៧ខ្សែ ដែលមានប័ណ្ណពណ៌ក្រហម គឺប្រជាពលរដ្ឋ ត្រូវបញ្ចេញសំរាម ដើម្បីឲ្យក្រុមហ៊ុន ទៅប្រមូល និងដឹកជញ្ជូនសំរាម ចាប់ពីម៉ោង ៧យប់ ដល់ម៉ោង ៣ភ្លឺ ហើយក្រុមហ៊ុន ត្រូវទៅប្រមូល និងដឹកជញ្ជូនសំរាមចាប់ពីម៉ោង ៣ភ្លឺ ដល់ម៉ោង ៨ព្រឹក។ រីឯផ្លូវចំនួន ២០ខ្សែទៀត មានប័ណ្ណសម្គាល់ពណ៌ខៀវ គឺប្រជាពលរដ្ឋ ត្រូវបញ្ចេញសំរាម ចាប់ពីម៉ោង ៧យប់ ដល់ម៉ោង ៣ភ្លឺ ហើយក្រុមហ៊ុនត្រូវទៅប្រមូល និងដឹកជញ្ជូនសំរាមចាប់ពីម៉ោង ៣ភ្លឺ ដល់ម៉ោង ១០ព្រឹក។
អាជ្ញាធរខេត្តព្រះសីហនុ បានប្រកាសថា ក្នុងករណី ដែលប្រជាពលរដ្ឋបញ្ចេញសំរាមខុសពេលវេលា ដែលបានកំណត់ នៅក្នុងប័ណ្ណព័ត៌មានទាំងពីរពណ៌នេះ នឹងត្រូវផាកពិន័យ ជាប្រាក់ ចាប់ពី ២ម៉ឺនរៀល ដល់ ៤០ម៉ឺនរៀល (យោងតាមអនុក្រឹត្យលេខ១១៣)។ ដោយឡែកក្នុងករណី ដែលក្រុមហ៊ុន មិនបានទៅប្រមូល និងដឹកជញ្ជូនសំរាម តាមពេលវេលា ដែលបានកំណត់ ក្នុងប័ណ្ណព័ត៌មានទាំងពីរពណ៌នេះ ក្រុមហ៊ុន នឹងត្រូវទទួលការពិន័យ ដូចមានចែងក្នុងកិច្ចសន្យារបស់រដ្ឋបាលក្រុងព្រះសីហនុ។
កាលពីថ្ងៃសៅរ៍ លោក គួច ចំរើន អភិបាលខេត្តព្រះសីហនុ បានមានប្រសាសន៍ថា យុទ្ធនាការបិទផ្សព្វផ្សាយប័ណ្ណព័ត៌មានបញ្ចេញសំរាម និងប្រមូល ដឹកជញ្ជូនសំរាម នៅតាមខ្សែផ្លូវ ៤៧ខ្សែ ក្នុងក្រុងព្រះសីហនុ ដើម្បីបញ្ចប់សំរាម នៅក្នុងក្រុងព្រះសីហនុ ដោយសារកន្លងមក សំរាមមានការកកស្ទះ នៅក្រុងព្រះសីហនុ អ្នកបញ្ចេញសំរាម មានចំនួនច្រើន និងការប្រមូលមិនទាន់ទាន់ឆ្លើយតប។ បច្ចុប្បន្ន ការកកស្ទះសំរាម នៅសល់តែតំបន់ទំនប់រលកប៉ុណ្ណោះ ដោយសារការបញ្ចេញសំរាមមានទាំងនៅលើគោក និងសំរាមមកពីតំបន់កោះ។
លោកអភិបាលខេត្ត បានបន្តថា រដ្ឋបាលក្រុងព្រះសីហនុ បានទទួលសិទ្ធិពីរាជរដ្ឋាភិបាល និងក្រសួងស្ថាប័នពាក់ព័ន្ធ តាមខ្លឹមសារអនុក្រឹត្យលេខ១១៣ ដោយរៀបចំកម្មវិធីប្រមូលសំរាម និងសកម្មភាពដឹកជញ្ជូនសំរាមចេញពីក្រុងព្រះសីហនុ។ ជាមួយគ្នានេះ រដ្ឋបាលក្រុងព្រះសីហនុ បានធ្វើការអប់រំ ផ្សព្វផ្សាយដល់ប្រជាពលរដ្ឋជាបន្តបន្ទាប់ និងបានជំរុញឱ្យក្រុមហ៊ុនប្រមូលសំរាម និងដឹកជញ្ជូនសំរាម ត្រូវជ្រើសរើសបុគ្គលិក រថយន្តដឹកជញ្ជូនសំរាម និងឧបករណ៍បំពាក់បន្ថែម ទៅតាមតម្រូវការជាក់ស្តែង៕
ចែករំលែកព័តមាននេះ