ដោយសារតែស្ថានភាពទឹកភ្លៀងនៅតែបន្តធ្លាក់ជាបន្តបន្ទាប់ធ្វើឱ្យជំនន់ទឹកភ្លៀងបានហូរធ្លាក់មកពីប៉ែកខាងលើ មានដូចជា ព្រំប្រទល់ខេត្តកំពង់ស្ពឺ ជាដើម បានហូរធ្លាក់ចុះមកកំណាត់ផ្លូវជាតិលេខ៥ បណ្ដាលឲ្យជន់លិចកំណាត់ផ្លូវដោយអន្លើ គឺចាប់ពី
ខេត្តកំពង់ឆ្នាំង ៖ ដោយសារតែស្ថានភាពទឹកភ្លៀងនៅតែបន្តធ្លាក់ជាបន្តបន្ទាប់ធ្វើឱ្យជំនន់ទឹកភ្លៀងបានហូរធ្លាក់មកពីប៉ែកខាងលើ មានដូចជា ព្រំប្រទល់ខេត្តកំពង់ស្ពឺ ជាដើម បានហូរធ្លាក់ចុះមកកំណាត់ផ្លូវជាតិលេខ៥ បណ្ដាលឲ្យជន់លិចកំណាត់ផ្លូវដោយអន្លើ គឺចាប់ពីគីឡូម៉ែត្រលេខ ៣៩ ដល់លេខ៤៦ ។ គ្រោះធម្មជាតិនេះ បានធ្វើឲ្យអាជ្ញាធរស្រុក និងខេត្ត ព្រមទាំងមន្ត្រីជំនាញ បានយកចិត្តទុកដាក់ក្នុងការ ជួសជុលផ្លូវរងការខូចខាត និងសម្រួលចរាចរណ៍ដល់បងប្អូនប្រជាពលរដ្ឋ និងអ្នកធ្វើដំណើរ ។
ជាក់ស្ដែងនៅព្រឹកថ្ងៃទី ២៤ ខែតុលា ឆ្នាំ ២០២១ នេះ លោក សាន់ យូ អភិបាលរងខេត្តកំពង់ឆ្នាំង បានដឹកនាំក្រុមមន្ត្រីជំនាញ សហការជាមួយនឹងម្ចាស់រោងចក្រ (ខេមស្ព័តស៊ូ ) ដោយសម្រេចកាយផ្តាច់កំណាត់ផ្លូវចូលរោងចក្រ ដែលបង្កឱ្យស្ទះចរន្តទឹកហូរធ្លាក់លើផ្លូវជាតិ ។
លោក សាន់ យូ អភិបាលរងខេត្តកំពង់ឆ្នាំង បានមានប្រសាសន៍ថា តាមបណ្តោយផ្លូវជាតិលេខ៥ ត្រង់បង្គោលគីឡូមែត្រលេខ៤៦ ចំណុចផ្លូវចូលរោងចក្រ «ខេនស្ព័ត៍ស៊ូ» មានទីតាំងស្ថិតក្នុងភូមិចំការស្វាយ ឃុំសេដ្ឋី ស្រុកសាមគ្គីមានជ័យ គឺខាងរោងចក្របានធ្វើផ្លូវចូលរោងចក្រ ដោយដាក់លូតូចពេកមិនតាម ស្តង់ដា ទើបបណ្តាលឱ្យស្ទះមុខទឹក ក៏ធ្វើឱ្យជន់លិចផ្លូវចូល ហើយបន្តលិចលើផ្លូវជាតិលេខ៥ និងធ្វើឱ្យស្ទះចរាចរណ៍ទៀតផង ។
លោកបន្តថា ហើយនៅថ្ងៃនេះ ដោយសារជាថ្ងៃអាទិត្យ ក៏ឆ្លៀតពេលកម្មករឈប់សម្រាក ទើបអាជ្ញាធរខេត្ត និងមន្ត្រីជំនាញ បានសម្រេចកាយផ្ដាច់ផ្លូវចូលមុខរោងចក្រ ដើម្បីបើកមុខទឹកឱ្យធំ ដើម្បីឱ្យទឹកហូរចុះក្រោមទាន់ពេលវេលា ។ បន្ទាប់មក នឹងដាក់ស្ពានបេឡេជំនួសជាបណ្តោះអាសន្នវិញ ដើម្បីសម្រួលដំណើរការឱ្យរថយន្តដឹកកម្មករចេញ-ចូលរោងចក្របាន ហើយការងារនេះនឹងធ្វើរយៈពេលតែមួយថ្ងៃឱ្យហើយ ដើម្បីថ្ងៃចន្ទ កម្មករនឹងអាចធ្វើដំណើរចូលរោងចក្រជាបណ្តោះអាសន្តវិញ ។ ចំណែកខាងរោងចក្រក៏បានសន្យាសាងសង់ស្ពាន ឬលូលើផ្លូវចូលរោងចក្រឱ្យធំ ដើម្បីមិនឱ្យស្ទះទឹកដូចឆ្នាំនេះឡើយ ។
លោកអភិបាលរងខេត្តកំពង់ឆ្នាំង ក៏បានបញ្ជាក់កាលពីថ្ងៃទី២៣ ខែតុលា ម្សិលមិញនេះថា លោក និង ក្រុមការងាររបស់មន្ទីរសាធារណការ និងដឹកជញ្ជូនខេត្ត ព្រមទាំងក្រុមការងារសាងសង់ផ្លូវជាតិលេខ ៥ របស់ជប៉ុន បានព្យាមយាមដឹកកំទេចថ្មមកចាក់ក្រាលលើផ្លូវជាតិលេខ៥ ត្រង់ចន្លោះគីឡូម៉ែត្រលេខ៣៩ និងលេខ៤០ រួចយកគ្រឿងចក្រជាន់បង្ហាប់ ដើម្បីសម្រួលចរាចរណ៍ឱ្យបងប្អូនប្រជាពលរដ្ឋជាបណ្តោះអាសន្នដែរ ដែលការងារនេះ យើងសម្រេចធ្វើបានប្រវែង៥៩០ម៉ែត្រ ដែលអាចឱ្យបងប្អូនប្រជាពលរដ្ឋធ្វើដំណើរបានស្រួល ហើយពួកគាត់ពិតជាសប្បាយរីករាយនូវចំណាត់ការរបស់អាជ្ញាធរខេត្ត និងមន្ត្រីជំនាញ ។
ក្រៅពីការជួសជុលកំណាត់ផ្លូវជាបណ្តោះអាសន្នរបស់មន្ត្រីជំនាញ ក៏នៅមានក្រុម សសយក និង មន្ត្រីនរបាល បានសហការគ្នាជួយសម្រួលការធ្វើដំណើររបស់បងប្អូនប្រជាពលរដ្ឋ ត្រង់ផ្លូវលិចទឹកផងដែរ៕
ចែករំលែកព័តមាននេះ