ខេត្តបន្ទាយមានជ័យ ៖ ជនសង្ស័យជាជនជាតិវៀតណាម២នាក់ ត្រូវឃាត់ខ្លួនជាមួយអាវុធវែង-ខ្លីប្រើហ្គាសចំនួន២២ដើម ដោយនាំចូលពីទឹកដីថៃបង្កប់តាមវ៉ាលិស កាលពីវេលាម៉ោង០៦ និង៣០នាទីល្ងាចថ្ងៃទី២៥ មីនា ២០១៦ បន្ទាប់ពីកម្លាំងការិយាល័យគយ និងរដ្ឋាករច្រកទ្វារអន្តរជាតិប៉ោយប៉ែត សហការជាមួយអាវុធហត្ថក្រុងធ្វើការឆែកឆេររកឃើញនៅមាត់ច្រកទ្វារ ។
ប្រភពឱ្យដឹងថា ជនសង្ស័យទាំង២នាក់ ១-ឈ្មោះNGUYENHONG PHUC ភេទប្រុស អាយុ៣៧ឆ្នាំ និង២-ឈ្មោះBUI VAN MANH អាយុ២៦ឆ្នាំ ពួកគេមកពីប្រទេសវៀតណាម ។ ចំណែកអាវុធប្រើហ្គាសខាងលើ ប្រភេទខ្លីចំនួន១៦ដើម និងវែង៦ដើម ក្នុងនោះមាន ៧៨គ្រាប់ផងដែរ ។
អនុប្រធានការិយាល័យគយរដ្ឋាករច្រកទ្វារអន្តរជាតិប៉ោយប៉ែត ទទួលបន្ទុកទីលានត្រួតពិនិត្យទំនិញ លោកអ៊ី ឃីម បានប្រាប់កោះសន្តិភាពតាមទូរស័ព្ទថា ដំបូងកម្លាំងរបស់លោក ដែលប្រចាំការនៅមាត់ច្រកទ្វារអន្តរជាតិប៉ោយប៉ែត ឃើញវ៉ាលិសរបស់បុរសទាំង២ខាងលើគួរឱ្យសង្ស័យ ហើយហៅយកទៅសួរនាំ និងសុំឆែកឆេរនៅទីលានត្រួតពិនិត្យទំនិញ ដោយសហការជាមួយអាវុធហត្ថក្រុងទើបដឹងថា ជាជនជាតិវៀតណាម ហើយពេលឆែកឆេរ ក៏រកឃើញអាវុធខ្លី-វែង និងគ្រាប់ប្រើហ្គាសទាំងនេះតែម្តង ។
លោកប្រាប់តាមទូរស័ព្ទទៀតថា ជនសង្ស័យនិងវត្ថុតាង ក្រោយពីធ្វើកំណត់ហេតុរួច បានបញ្ជូនទៅទីបញ្ជាការអាវុធហត្ថខេត្ត ដើម្បីចាត់ការតាមនីតិវិធី ។ គួរបញ្ជាក់ថា អាវុធប្រើហ្គាស់នេះ ត្រូវសមត្ថកិច្ឱ្យដឹងថា បើបាញ់ឆ្ងាយមិនបង្កគ្រោះថ្នាក់ទេ ប៉ុន្តែបើជិត ឬគៀក គឺអាចបង្កគ្រោះថ្នាក់បាន រីឯជំនាញថា គ្មានច្បាប់ណាអនុញ្ញាតឱ្យនាំចូលនោះទេ ។
ចែករំលែកព័តមាននេះ