រាជធានីភ្នំពេញ ៖ វិទ្យាស្ថានសន្ទនាមេគង្គ (MDI) និងសាលារៀនអន្តរជាតិហ្សាម៉ាន់ (ZIS) ប្រារព្ធមហោស្រពភាសានិងវប្បធម៌អន្តរជាតិនៅព្រឹកថ្ងៃទី២៦ មីនា ២០១៦ ចាប់ពីម៉ោង៩ និង៣០នាទីព្រឹក ដល់ម៉ោង៦ល្ងាច នៅសាលD មជ្ឈមណ្ឌលសន្និបាត និងពិព័រណ៍កោះពេជ្រ ។ គោលបំណង ក្នុងការប្រារព្ធកម្មវិធីនេះគឺដើម្បីផ្សារភ្ជាប់វប្បធម៌ខ្មែរជាមួយនឹងវប្បធម៌អន្តរជាតិដោយមានសន្តិសហត្ថិភាពបង្ហាញពីតួនាទីយ៉ាងសំខាន់របស់វប្បធម៌ក្នុងការបង្កើតចំណងយ៉ាងរឹងមាំរវាងប្រជាជាតិផ្សេងៗគ្នាឲ្យរស់នៅដោយមានសុខដុមរមនា ព្រមទាំងរៃអង្គាសថវិកាសម្រាប់កម្មវិធីសប្បរសធម៌ជាច្រើន ដូចជាការជុសជុល និងផ្គត់ផ្គង់សម្ភារដល់បណ្ណាល័យនៅសាលារៀនផ្សេងៗ នៅទូទាំងព្រះរាជាណាចក្រកម្ពុជា ។
នៅក្នុងមហោស្រពនោះដែរ ក៏មានវត្តមានពីសំណាក់ ឯកឧត្តម ម៉ាន់ ឈឿន ប្រធានគណកម្មការទី៧ របស់ព្រឹទ្ធសភា ទទួលបន្ទុក ទេសចរណ៍ វប្បធម៌ អប់រំ និងសាសនា, ឯកឧត្តម សំរាំង កំសាន្ត រដ្ឋលេខាធិការ របស់ក្រសួងវប្បធម៌ និងវិចិត្រសិល្បៈ ព្រមទាំងឯកឧត្តមប៉ាក់ សុខុម រដ្ឋលេខាធិការរបស់ក្រសួងទេសចរណ៍ អមដោយលោកអែជដែរ ឃឺឡិច នាយកក្រុមហ៊ុនហ្សាម៉ាន់ និងលោក ហាខាន់ អាតាសឺវ័រ នាយកប្រតិបត្តិរបស់វិទ្យាស្ថានសន្ទនាមេគង្គ ។
មហោស្រពភាសា និងវប្បធម៌អន្តរជាតិ នឹងមានការចូលរួមពីបណ្តាប្រទេសចំនួន៣៨ ដែលនឹងបង្ហាញពីវប្បធម៌ និងសិល្បៈដ៏អស្ចារ្យរបស់ប្រទេសខ្លួននីមួយៗ ព្រមទាំងមានតូបតាំងពិព័រណ៍ផងដែរ ។ បន្ថែមពីនេះទៀត កម្មវិធីនឹងមានការសម្តែង ដោយជនជាតិខ្មែរនិងបរទេសជាច្រើន ។ ម្យ៉ាងវិញទៀត ដោយសារតែកម្មវិធីខាងលើក៏មានបំណង ដើម្បីចូលរួមក្នុងសកម្មភាពសប្បុរសធម៌អ្នកចូលរួមត្រូវជាវសំបុត្រ ដែលមានតម្លៃត្រឹមតែ២ដុល្លារប៉ុណ្ណោះ ។
មហោស្រពភាសា និងវប្បធម៌អន្តរជាតិ គឺជាកម្មវិធីទ្រង់ទ្រាយធំកម្រិតអន្តរជាតិមួយ ក្នុងការផ្តល់ឱកាសដល់សីល្បៈ និងវប្បធម៌ ដើម្បីចូលរួមលើកស្ទួយសន្តិភាព សេចក្តីស្រឡាញ់ និងតម្លៃវប្បធម៌នៅទូទាំងពិភពលោក ។ ហើយនៅក្នុងឆ្នាំនេះ សាលារៀនអន្តរជាតិហ្សាម៉ាន់និងវិទ្យាស្ថានសន្ទនាមេគង្គមានកិត្តិយសធ្វើជាអ្នករៀបចំកម្ម វិធីដែលមានអត្ថន័យនិងសោភ័ណភាពនេះ ។
ចែករំលែកព័តមាននេះ