ភ្នំពេញ៖ សេចក្តីព្រាងច្បាប់ថវិកាជាតិឆ្នាំ២០២២ បង្ហាញថា តាមការព្យាករ សេដ្ឋកិច្ចកម្ពុជា នៅឆ្នាំ២០២១ នេះ ត្រូវបានប៉ាន់ស្មានថា មានកំណើនក្នុងអត្រា ២,៤% ហើយត្រូវបានព្យាករថា នឹងងើបឡើងវិញ នៅឆ្នាំ២០២២ ក្នុងរង្វង់ ៤,៨%។
ដោយឡែកចំណូលសម្រាប់ប្រជាជនកម្ពុជា ម្នាក់ នៅឆ្នាំ២០២២ នឹងកើនឡើងដល់ ១៨៤១ដុល្លារអាម៉េរិក បើបៀបធៀបនឹង ១៧៣០ដុល្លារអាម៉េរិក ក្នុងឆ្នាំ២០២១។
កំណើនសេដ្ឋកិច្ចកម្ពុជា ក្នុងឆ្នាំ២០២២ ក្នុងរង្វង់ ៤,៨%នេះ ត្រូវបានរំពឹងលើការងើបឡើងវិញនៃវិស័យសេដ្ឋកិច្ចសំខាន់ៗ រួមមាន៖ វិស័យឧស្សាហកម្ម មានកំណើន ៧,៨% ( ៥,៧% ក្នុងឆ្នាំ២០២១ ) វិស័យសេវាកម្ម មានអត្រាកំណើន ៤,១% ( ០,៣% ក្នុងឆ្នាំ២០២១ ) និងវិស័យកសិកម្ម មានអត្រាកំណើន ១,១% ( ១,៤% ក្នុងឆ្នាំ២០២១ )។
នៅក្នុងឆ្នាំ២០២២ អត្រាអតិផរណា មធ្យមប្រចាំឆ្នាំ ក៏ត្រូវបានរាជរដ្ឋាភិបាល ប៉ាន់ស្មានថា ស្ថិតក្នុងកម្រិតអាចគ្រប់គ្រងបាន ក្នុងអត្រា ២,៨% អត្រាប្តូរប្រាក់រៀល ធៀបនឹងប្រាក់ដុល្លារអាម៉េរិក ត្រូវបានប៉ាន់ស្មានថា នឹងនៅតែបន្តមានស្ថិរភាពក្នុងរង្វង់ ៤០៦៥រៀល ក្នុង ១ដុល្លារអាម៉េរិក។ រីឯទុនបម្រុងអន្តរជាតិសរុប ត្រូវបានរំពឹងថា នឹងកើនឡើងដល់ ២២ ១២០លានដុល្លារអាម៉េរិក ដែលធានាការនាំចូលបាន ១០,១ខែ។
សេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រង ឆ្នាំ២០២២ ឬហៅថា ច្បាប់ថវិកាជាតិ ឆ្នាំ២០២២ ដែលគណៈរដ្ឋមន្ត្រី ប្រជុំអនុម័តនៅព្រឹកថ្ងៃទី២២ ខែតុលានេះ បានកំណត់ការចំណាយថវិកាថ្នាក់ជាតិ សរុបចំនួន ៣២ ៥៧៦,៩ ប៊ីលានរៀល ស្មើប្រមាណ ៨០១៣លានដុល្លារអាម៉េរិក ត្រូវជា ២៦,២៤% នៃផលិតផលក្នុងស្រុកសរុប (ផ.ស.ស)។ ថវិកាជាតិឆ្នាំ២០២២ កើនឡើង ៦.៨% ធៀបនឹងច្បាប់ថវិកាជាតិ ឆ្នាំ២០២១។
រាជរដ្ឋាភិបាល ប្រកាសថា ថវិកាជាតិ ឆ្នាំ២០២២ អាចប្រសិទ្ធនាមបានថា ជាថវិកាសម្រាប់បន្តការប្រយុទ្ធប្រឆាំង និងការកសាងសមត្ថភាពរស់នៅជាមួយកូវីដ១៩ តាមគន្លងប្រក្រតីថ្មី ដើម្បីបន្តប្រយុទ្ធការពារអាយុជីវិតប្រជាជន រក្សាលំនឹងសង្គម-សេដ្ឋកិច្ច និងជីវភាពរស់នៅរបស់ប្រជាជន ព្រមជាមួយនឹងការតម្រង់ធនធានឆ្ពោះទៅស្តារ និងជំរុញកំណើនសេដ្ឋកិច្ចឡើងវិញ៕
ចែករំលែកព័តមាននេះ