តារាកំប្លែងមានឈ្មោះម៉ក់ សុគន្ឋដានិច្ច ហៅប្រិមប្រិយ ដែលខំកសាងស្នាដៃនៅក្នុងវិស័យសិល្បៈ រហូតមានភាពល្បីល្បាញ ត្រូវបានប្រភពទម្លាយអោយដឹងថា នាងសម្រេចចិត្តដកថយ ពីសង្វៀនសិល្បៈលែងនឹកនា ក្រោយសម្លឹងឃើញ
រាជធានីភ្នំពេញ ៖ តារាកំប្លែងមានឈ្មោះម៉ក់ សុគន្ឋដានិច្ច ហៅប្រិមប្រិយ ដែលខំកសាងស្នាដៃនៅក្នុងវិស័យសិល្បៈ រហូតមានភាពល្បីល្បាញ ត្រូវបានប្រភពទម្លាយអោយដឹងថា នាងសម្រេចចិត្តដកថយ ពីសង្វៀនសិល្បៈលែងនឹកនា ក្រោយសម្លឹងឃើញសភាពថ្មីដែលនាងជឿជាក់។
ប្រិមប្រិយ កំពុងតែឡើងចុះភ្នំពេញ-សៀមរាប និងភាគច្រើន គឺស្នាក់នៅអាស្រ័យខេត្តសៀមរាបជាញឹកញាប់ ជាងនៅភ្នំពេញ។ អ្វីដែលគេភ្ញាក់ផ្អើល ព្រោះតែនាងបែរជាដក់ចិត្តងប់ងល់រឿងបម្រើបក្សនយោបាយមួយ។
ចាប់តាំងពីថមថយទីផ្សារសម្តែងកំប្លែងអស់ជាច្រើនស្ថានីយទូរទស្សន៍មក ឃើញថា តារាកំប្លែង ប្រិមប្រិយ បែរជាស្ងប់ស្ងាត់លែងឃើញបង្ហាញមុខអស់ជាច្រើនខែ ខុសពីសមាជិកក្រុម ដែលនៅតែឆ្លៀតពេលធ្វើនេះធ្វើនោះតាមកញ្ចក់ទូរទស្សន៍។
នាចុងក្រោយនេះ ស្រាប់តែទទួលដំណឹងថា ប្រិមប្រិយ បានបោះបង់សិល្បៈចោលទាំងស្រុងហើយ ដោយមិនគួរនាងចិត្តដាច់ធ្វើយ៉ាងនេះ ព្រោះវិស័យសិល្បៈនេះ នាងតស៊ូរងភាពពុះពារណាស់មុននឹងល្បីឈ្មោះ។
បើតាមតារារួមសម្តែងប្រចាំក្រុមនាយកុយម្នាក់ បាននិយាយប្រាប់ថា ប្រិមប្រិយដូចត្រូវមន្តអាគមគេ ។ នៅសុខៗ បែរជារត់ទៅបម្រើការងារនៅបក្សមួយដែលគេស្គាល់ អោយតែបង្ហើបឈ្មោះ តែសុំលាក់សិន។ ចរិករបស់ប្រិមប្រិយ ស្អប់អ្នកនិយាយលើសៗ និងអួតក្អេងក្អាងប្រើពាក្យប្លែកៗ ។ ចុងក្រោយបែរជាស្លុងចូល ហើយនិយាយអូសមកវិញ ក៏មិនមកតាម ព្រោះនឹកឃើញថា ស៊ូលំបាកជាមួយគ្នាយូរហើយនៅក្នុងសិល្បៈ។
មិនទាន់ដឹងថា ពេលណានាងប្តូរជំហរមករកសភាពដើមដូចមុនទេ។ ប្រិមប្រិយ គឹជាកូនអ្នកលេងល្ខោនលោកគ្រូ ម៉ក់ និងជាមេម៉ាយកូន១ (កូនស្រី)។ នាងជាដៃគូសម្តែងជាមួយនាយកុយ នាយហុងដា នាយក្រិនជាដើម។ វាសនារបស់នាងគេខំសរសើរ ព្រោះបានជួបគូដណ្តឹងនៅអាមេរិក ជាអ្នកសិល្បៈដែរ នឹងបានមកភ្ជាប់ពាក្យនៅស្រុកខ្មែរ។
ចុងក្រោយក៏ផ្តាច់ពាក្យវិញ ធ្វើអោយគេស្រងាកចិត្ត ព្រោះគេរំពឹងថា នាងនឹងមានវាសនាល្អ បានសោយសុខដល់ទឹកដីអាមេរិក ដូចតារាស្រីខ្លះ។ សម្រេចចុះឡើង នាងទៅជាបែបនេះ និងមិនអាចនិយាយបែបណាបាន ព្រោះជាសិទ្ឋិដែលនាងរើស។ កាលពីប៉ុន្មានខែមុន ប្រិមប្រិយ បានបង្ហាញមុខជាពិធីការិនី ក្នុងកម្មវិធី «ស្បៃរាត្រី» របស់ទូរទស្សន៍ជាតិ ចាប់ដៃគូជាមួយ ចាបចៀន។ ក្រោយមកស្រាប់តែបាត់មុខ រហូតមកទល់ពេលនេះតែម្តង។
ចែករំលែកព័តមាននេះ