រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានប្រកាសនៅថ្ងៃសុក្រទី២២ ខែតុលានេះថា ចាប់ពីពេលនេះតទៅ កម្ពុជានឹងមិនមានការបិទសាលារៀន ផ្សារ រោងចក្រ និងកន្លែងផ្សេងទៀតនោះទេ ទោះបីមានករណីឆ្លងជំងឺកូវីដ-១៩ក្តីបើការឆ្លងក្នុងរូបភាពតិចតួចត្រឹម៣ ឬ៤ នាក់នោះ ។
ថ្លែងក្នុងកិច្ចប្រជុំពេញអង្គគណៈរដ្ឋមន្ត្រី នៅថ្ងៃសុក្រនេះ សម្តេចតេជោបានមានប្រសាសន៍បញ្ជាក់ថា កន្លងមករកឃើញកម្មកររោងចក្រ ៣ឬ៤នាក់ ស្រាប់តែបិទរោងចក្រទាំងមូល ឬក៏ត្រឹមរកឃើញអាជីវករនៅតាមបណ្តាផ្សារ ត្រឹមចំនួនតិចតួចក៏ឈានដល់ការបិទទីតាំងផ្សារដែលធ្វើឱ្យប៉ះពាល់ដល់ការងារប្រកបរបរលក់ដូរផងដែរ ។
ដូច្នេះក្នុងករណីរកឃើញវិជ្ជមានទ្រង់ទ្រាយតូច គឺត្រឹមយកអ្នកវិជ្ជមានទៅព្យាបាលនៅមន្ទីរពេទ្យទៅជាការស្រេចកុំបិទរោងចក្រ សាលារៀន ឬទីផ្សារ ឬក្រុមហ៊ុនជាដើម ។ សម្តេចបានបញ្ជាក់ថា « ក្នុងករណីមានការឆ្លងក្នុងសាលារៀន ផ្សារ រោងចក្រ និងកន្លែងផ្សេងៗត្រូវយកអ្នកជំងឺដែលឆ្លងទៅព្យាបាលនៅមន្ទីរពេទ្យ»។
សម្តេចតេជោ បានលើកឡើងទៀតថា ឯកឧត្តម ហង់ ជួនណារុន បានប្រកាសហើយថា ចាប់ពីខែវិច្ឆិកាតទៅ គឺសាលាបើកជាទូទៅតែម្ដង បើយើងមិនបើកជាទូទៅទេ ហើយការស្លា.ប់ដោយសារសេដ្ឋកិច្ច គឺប្រហែលជាស្លា.ប់ពិបាកជាងស្លា.ប់ដោយកូវីដ-១៩ ទៅទៀត»។
សម្ដេចតេជោ បានបន្ដថា នាពេលបច្ចុប្បន្នអ្នកឆ្លងជំងឺកូវីដ-១៩ នៅកម្ពុជាមានការថយចុះ ប៉ុន្ដែប្រជាពលរដ្ឋគ្រប់រូបត្រូវបន្ដចូលរួមអនុវត្តវិធានការសុខាភិបាលបន្ថែមទៀត ។ សម្តេចតេជោ បានបញ្ជាក់ថា ចាប់ពីពេលនេះទៅនៅពេលមានការឆ្លងជំងឺកូវីដ-១៩ មិនមានការបិទសាលារៀន ផ្សារ រោងចក្រ នឹងកន្លែងផ្សេងៗទៀតទេ ទោះបីមានការឆ្លងក្នុងសាលារៀន ផ្សារ រោងចក្រ និងកន្លែងផ្សេងៗ៕
ចែករំលែកព័តមាននេះ