- ភ្នំពេញ
ភ្នំពេញ៖ ពិធីបុណ្យកឋិនទាន នៅឆ្នាំនេះ នឹងប្រព្រឹត្តទៅ ចាប់ពីថ្ងៃសុក្រ ទី២២ ខែតុលា ដល់ថ្ងៃទី១៩ ខែវិច្ឆិកា ឆ្នាំ២០២១។…
ភ្នំពេញ៖ ពិធីបុណ្យកឋិនទាន នៅឆ្នាំនេះ នឹងប្រព្រឹត្តទៅ ចាប់ពីថ្ងៃសុក្រ ទី២២ ខែតុលា ដល់ថ្ងៃទី១៩ ខែវិច្ឆិកា ឆ្នាំ២០២១។…
ភ្នំពេញ៖ ពិធីបុណ្យកឋិនទាន នៅឆ្នាំនេះ នឹងប្រព្រឹត្តទៅ ចាប់ពីថ្ងៃសុក្រ ទី២២ ខែតុលា ដល់ថ្ងៃទី១៩ ខែវិច្ឆិកា ឆ្នាំ២០២១។ បុណ្យកឋិនទាន នៅឆ្នាំនេះ ត្រូវបានក្រសួងធម្មការ និងសាសនា ប្រកាសឲ្យប្រារព្ធជាធម្មតា តែតាមគន្លងថ្មី ដើម្បីទប់ស្កាត់ និងការពារនូវការឆ្លងរាលដាលជំងឺកូវីដ១៩។ ក្នុងនោះ ក្រសួង ក៏បានហាមឃាត់ មិនឲ្យផ្សព្វផ្សាយកម្មវិធីបុណ្យកឋិន និងមិនឲ្យដង្ហែតាមដងផ្លូវ ឬជុំវិញព្រះវិហារ ឡើយ។ ដូច្នេះ វានឹងមានភាពសោះកក្រោះ ហើយមិនសូវមានមនុស្សចូលរួមឡើយ ដូចអ្វីដែលគេបានឃើញកាលពីពេលភ្ជុំបិណ្ឌ។
តាមសេចក្តីណែនាំ ការរៀបចំបុណ្យកឋិនទាន នៅឆ្នាំនេះ ត្រូវដំណើរការស្របតាមទំនៀមទម្លាប់ប្រពៃណីព្រះពុទ្ធសាសនា និងចូលរួមបដិបត្តិតាមសេចក្ដីណែនាំនានារបស់រាជរដ្ឋាភិបាល ក្រសួងសុខាភិបាល និងអាជ្ញាធរដែនដី តាមសភាពជាក់ស្តែងនៃទីកន្លែងនីមួយៗ។ ក្នុងនោះ ក្រសួងធម្មការ និងសាសនា ក៏បានណែនាំឲ្យអនុវត្តនូវវិធានការចាំបាច់នានា សំដៅកាត់ផ្តាច់ និងទប់ស្កាត់ការឆ្លងរីករាលដាលនៃជំងឺកូវីដ-១៩ នៅទូទាំងប្រទេស ជាពិសេសមេរោគបំប្លែងខ្លួនថ្មី ប្រភេទដែលតា (Delta) ដែលមានកម្រិតនៃការឆ្លងរាលដាលឆាប់រហ័ស។
បុណ្យកឋិន នៅឆ្នាំនេះ អាជ្ញាធរសមត្ថកិច្ច ក៏ត្រូវយកចិត្តទុកដាក់បង្កលក្ខណ:ឱ្យបានល្អប្រសើរ ប្រគេនព្រះសង្ឃ ជូនពុទ្ធបរិស័ទ ប្រារព្ធពិធីបុណ្យ កឋិនទានស្របតាមប្រពៃណីព្រះពុទ្ធសាសនា ដោយត្រូវអនុវត្តឱ្យបានយ៉ាងម៉ឺងម៉ាត់នូវវិធានការការពារនានារបស់ក្រសួងសុខាភិបាល វិធានការរដ្ឋបាល និងជាពិសេសត្រូវប្រកាន់ខ្ជាប់ជានិច្ចនូវវិធានការ “៣ការពារ ៣កុំ”។
យ៉ាងណាក៏ដោយ ដោយសារតែបញ្ហាកូវីដ មិនទាន់ស្ងប់ ដូច្នេះបុណ្យកឋិន នៅឆ្នាំនេះ ក៏ត្រូវបានក្រសួងធម្មការ និងសាសនា ហាមឃាត់ផ្សព្វផ្សាយកម្មវិធីបុណ្យ ហើយមិនឲ្យហែកឋិនតាមដងផ្លូវ ឬហែជុំវិញព្រះវិហារ ដូចទម្លាប់រៀងរាល់ឆ្នាំនោះទេ ដោយគ្រាន់តែវេរប្រគេនត្រៃចីវរ ជាកិច្ចសម្រេចបុណ្យ។ វិធានការទាំងនេះ ដើម្បីការពារ និងទប់ស្កាត់កូវីដ១៩។
នៅគ្រប់វត្តទូទាំងប្រទេស នៅឆ្នាំនេះ ក៏នៅតែទទួល និងធ្វើពិធីបុណ្យកឋិនទាន ជាធម្មតា តែត្រូវគោរពតាមគោលការណ៍ណែនាំរបស់ក្រសួងធម្មការ និងសាសនាខាងលើនេះ ពិសេសមិនមានការដង្ហែ ឬផ្សព្វផ្សាយបុណ្យឡើយ គឺពុទ្ធបរិស័ទ ឬបងប្អូនប្រជាពលរដ្ឋ អាចធ្វើពិធីបុណ្យកឋិនទាន នៅផ្ទះ ទៅតាមវិធានរបស់ក្រសួងសុខាភិបាល រួចម្ចាស់ដើមបុណ្យ ដែលមានចំនួនមនុស្សតិចតួច នាំយកត្រៃ និងលៀង ព្រមទាំងទេយ្យទាន ទៅវេរប្រគេនដល់ព្រះសង្ឃ ក្នុងវត្តតែម្តង។
អំឡុងពេលបុណ្យភ្ជុំបិណ្ឌ ថ្មីនេះ គឺជាបទពិសោធន៍ នៅក្នុងការប្រារព្ធពិធីបុណ្យតាមវត្ត ទូទាំងប្រទេស។ ក្នុងនោះ ២ថ្ងៃដំបូងនៃថ្ងៃដាក់បិណ្ឌ គឺនៅថ្ងៃទី២២កញ្ញា និងថ្ងៃទី២៣កញ្ញា បានរកឃើញតាមវត្តមួយចំនួន ឆ្លងកូវីដ១៩។ ហេតុការណ៍នោះ នាំឲ្យរាជរដ្ឋាភិបាល បង្ខំចិត្ត ត្រូវប្រកាសផ្អាក មិនរៀបចំពិធីជួបជុំតាមវត្ត ដើម្បីប្រារព្ធពិធីបុណ្យកាន់បិណ្ឌ និងភ្ជុំបិណ្ឌនោះទេ។
ក្រោយហេតុការណ៍នោះ នៅតាមវត្តក៏ស្ងប់ស្ងាត់ មិនមានឆ្លងរាលដាលកូវីដទេ បើទោះបីជាតាមវត្តមួយចំនួន បិទមិនជិត ហើយមានអ្នកទៅវត្ត ប្រគេនចង្ហាន់ និងទេយ្យវត្ថុ ក្នុងគន្លងថ្មី ដើម្បីការពារកូវីដ។ តែតាមវត្តខ្លះ ពិសេសនៅតាមបណ្តាខេត្ត នៅថ្ងៃភ្ជុំបិណ្ឌ មានមនុស្សប្រជ្រៀតគ្នាច្រើនដែរ។ ជាងនេះទៅទៀត នៅពេលឈប់សម្រាកបុណ្យភ្ជុំបិណ្ឌ កាលពីដើមខែតុលានេះ ក៏មានអ្នកធ្វើដំណើរច្រើន ទាំងទៅស្រុកកំណើត និងទៅដើរលេងតាមរមណីយដ្ឋាននានា។ ប៉ុន្តែក្រោយភ្ជុំបិណ្ឌ ចូលដល់ចុងសប្តាហ៍ទី២នេះ ទៅហើយ មិនទាន់មានផ្ទុះការឆ្លងរាលដាលកូវីដ១៩ ទ្រង់ទ្រាយធំនោះទេ ខណៈដែលចំនួនអ្នកឆ្លងកូវីដ១៩ និងចំនួនអ្នកស្លាប់ដោយកូវីដ១៩ ក៏បន្តថយចុះរៀងរាល់ថ្ងៃ មកនៅត្រឹមឆ្លងជាង ១០០នាក់ និងស្លាប់ជាង ១០នាក់តិចតួចប៉ុណ្ណោះ ក្នុង ១ថ្ងៃៗ។
យ៉ាងណាក៏ដោយ ព្រឹត្តិការណ៍ពេលភ្ជុំបិណ្ឌ និងការថយចុះនៃចំនួនអ្នកឆ្លង និងស្លាប់ដោយសារកូវីដ១៩ នាពេលនេះ ក៏មិនមែនមានន័យថា ត្រូវធ្វើបុណ្យកឋិន ដោយលែងគិតពីកូវីដនោះទេ។ ចូរកុំភ្លេចថា មកដល់ថ្ងៃនេះ ចំនួនអ្នកឆ្លង នៅតែមាន ហើយក្នុងនោះ តាមវត្ត និងតាមវិហារសាសនានានា ក៏នៅតែមានព្រះសង្ឃ និងអ្នកស្នាក់នៅវត្ត ឬវិហារសាសនាជាច្រើន ឆ្លងកូវីដ១៩ នៅឡើយ។
តាមរបាយការណ៍ដែលគេផ្សព្វផ្សាយ នៅថ្ងៃទី២១តុលា ឆ្នាំ២០២១ ដោយអះអាងថា ជារបាយការណ៍របស់ក្រសួងធម្មការ និងសាសនា បង្ហាញថា សាសនិក ដែលបានឆ្លង ជាសះស្បើយ និងមរណភាពដោយសារជំងឺកូវីដ-១៩ គឺនៅថ្ងៃទី២០ ខែតុលា ឆ្នាំ២០២១ សរុបតាមផ្នែកសាសនានីមួយៗ បានរកឃើញសាសនិកឆ្លងថ្មី ចំនួន ៨អង្គ ជាសះស្បើយចំនួន ២អង្គ និងមរណភាពចំនួន ២អង្គ។ បើគិតត្រឹមថ្ងៃទី២០ ខែតុលា ឆ្នាំ២០២១ នៅព្រះពុទ្ធសាសនា មានព្រះសង្ឃឆ្លងកូវីដ សរុប ១២១៥អង្គ ជាសះស្បើយសរុប ១០៦៨អង្គ និងអនិច្ចធម្មសរុប ១១អង្គ។ រីឯឥស្លាមសាសនា មានមេដឹកនាំឆ្លងសរុប ៣១៥នាក់ ជាសះស្បើយសរុប ៣០៥នាក់ និងមរណភាពសរុប ០៦នាក់។ គ្រិស្ទសាសនា មានមេដឹកនាំឆ្លងសរុប ១១៨នាក់ ជាសះស្បើយសរុប ១១៥នាក់ និងមរណភាពសរុប ម្នាក់។ រីឯសាសនាមហាយាន គឺមេដឹកនាំឆ្លងសរុប ៣៨ នាក់ និងជាសះស្បើយទាំង ៣៨ នាក់៕
ចែករំលែកព័តមាននេះ