ភ្នំពេញ៖ បន្ទាប់ពីការវាយតម្លៃលើដំណើរការបង្រៀន និងរៀនតាមបណ្តុំសម្រាប់គ្រឹះស្ថានសិក្សាសាធារណៈ និងឯកជន ក្នុងភូមិសាស្ត្រ ដែលមានហានិភ័យទាប ក្រសួងអប់រំ យុវជន និងកីឡា បានសង្កេតឃើញ ៤ចំណុចសំខាន់ៗ។
តាមសេចក្តីប្រកាស ចំណុចទាំងនោះ រួមមាន៖
១-គ្រឹះស្ថានសិក្សា ប្រមាណ ៣០ភាគរយ បានចាប់ដំណើរការតាមគ្រប់រូបភាព ស្របតាមសេចក្តីណែនាំ
២-ការចូលរួមតាមគ្រប់រូបភាពពីសំណាក់អ្នកពាក់ព័ន្ធទាំងអស់ ដើម្បីធានាដំណើរការអប់រំប្រកបដោយសុវត្ថិភាព និងប្រុងប្រយ័ត្ន
៣-ការបើកដំណើរការគ្រឹះស្ថានសិក្សា បានផ្តល់លទ្ធភាពឲ្យយើងអាចធ្វើតេស្ត និងរកឃើញអ្នកវិជ្ជមានកូវីដ១៩ ទាំងលើបុគ្គលិកអប់រំ និងសិស្សានុសិស្សមួយចំនួនតូច ហើយបានចាត់ចែងព្យាបាលទាន់ពេលវេលា និងទប់ស្កាត់ កាត់ផ្តាច់ការឆ្លងរាលដាលបានល្អប្រសើរ
៤-ករណីវិជ្ជមានកូវីដ១៩ លើគ្រូបង្រៀន និងសិស្សានុសិស្ស ក្នុងរយៈពេល ៧ថ្ងៃ មុនបុណ្យភ្ជុំបិណ្ឌ និងរយៈពេល ៧ថ្ងៃ ក្រោយថ្ងៃភ្ជុំបិណ្ឌ មានចំនួនតិចតួច និងអាចគ្រប់គ្រងបាន។
ម្យ៉ាងវិញទៀត ក្រសួងអប់រំ ក៏បានប្រកាសថា មាតាបិតា អ្នកអាណាព្យាបាល គ្រូបង្រៀន និងសិស្សានុសិស្ស និស្សិត បានចាក់វ៉ាក់សាំងការពារកូវីដ១៩ ក្នុងអត្រាខ្ពស់។ ដូច្នេះក្រសួងអប់រំ ក៏បានសម្រេចថា ចាប់ពីថ្ងៃទី១ ខែវិច្ឆិកា ឆ្នាំ២០២១ ក្រសួងនឹងពង្រីកវិសាលភាព នៃការបង្រៀន និងរៀន សម្រាប់គ្រឹះស្ថានសិក្សាសាធារណៈ និងឯកជន នៅគ្រប់កម្រិត ក្នុងភូមិសាស្ត្រទូទាំងរាជធានីខេត្តទាំងអស់។ ពោលគឺសាលារៀន នឹងបើកដំណើរការឡើងវិញ ចាប់ពីថ្នាក់បឋមសិក្សា រហូតដល់ឧត្តមសិក្សា រួមទាំងសាលាបណ្តុះបណ្តាលវិជ្ជាជីវៈ និងសាលាបណ្តុះបណ្តាលគ្រូទាំងអស់។
សូមរម្លឹកថា សាលារៀនថ្នាក់អនុវិទ្យាល័យ និងថ្នាក់វិទ្យាល័យ បានបើកដំណើរការឡើងវិញ កាលពីអំឡុងខែកញ្ញា ឆ្នាំ២០២១ ក្រោយពីគ្រូ និងសិស្ស បានចាក់វ៉ាក់សាំងរួចរាល់។ ក្នុងពេលបើកសាលារៀនដំបូងៗ ក៏មានគ្រូ និងសិស្ស រកឃើញឆ្លងកូវីដ១៩ ដែរ។ តែមិនច្រើន រហូតដល់ត្រូវបិទសាលារៀននោះទេ។
ក្រោយភ្ជុំបិណ្ឌ នាដើមខែតុលានេះ ក៏គ្រូបង្រៀនមួយចំនួន ធ្វើតេស្តរកឃើញឆ្លងកូវីដ១៩ ដែរ។ តែមិនមានច្រើន ហើយដំណើរការរៀន និងបង្រៀននៅថ្នាក់រៀន តាមគន្លងថ្មី រួមទាំងការបង្រៀន និងរៀនតាមអនឡាញ ក៏នៅតែបន្ត។
រហូតដល់ពេលនេះ សិស្សានុសិស្សនៅកម្រិតបឋមសិក្សា ចាប់ពីអាយុ ៦ឆ្នាំ រហូតដល់ក្រោម ១២ឆ្នាំ ក៏បានចាក់វ៉ាក់សាំង ស្ទើរតែ ១០០% ក្នុងចំណោមជិត ២លាននាក់។ ចំណែកកុមារ និងយុវវ័យ អាយុពី ១២ឆ្នាំ ដល់ក្រោម ១៨ឆ្នាំ នៅថ្នាក់អនុវិទ្យាល័យ និងវិទ្យាល័យ ក៏បានចាក់វ៉ាក់សាំងស្ទើរតែទាំងអស់ផងដែរ។ អ្នកមានអាយុ ១៨ឆ្នាំឡើង ក៏បានចាក់វ៉ាក់សាំងកូវីដ១៩ បានសឹងតែ ១០០% ហើយគ្រូបង្រៀនទាំងអស់ បានចាក់វ៉ាក់សាំង រហូតដល់ ៣ដូសរួចរាល់៕
ចែករំលែកព័តមាននេះ