បុណ្យកឋិនជាពិធីបុណ្យមួយចាប់ផ្ដើមធ្វើបន្ទាប់ពីបុណ្យចេញវស្សា បុណ្យកឋិនតែងត្រូវបានដង្ហែចូលគ្រប់ទីអារាមទាំងអស់ ពុំមានទំនេរវត្ដណាមួយត្រូវបានខកខានឡើយ ដូច្នេះគេតែងតែឃើញក្បួនកឋិនទានតែងបានដង្ហែទៅកាន់ទីអារាមផ្សេងៗចាប់ពីថ្ងៃ១រោច ខែអស្សុជដល់ថ្ងៃទី១៥កើត ខែកត្តិក ហើយបើទីអារាមណាមួយមិនមានកឋិនហែចូលទេ ទីអារាមនោះក៏ត្រូវតែរៀបចំជាកឋិនជើងវត្តដែរ ។ បណ្តាឆ្នាំកន្លងមក ពិធីហែអង្គកឋិនទៅកាន់ទីអារាមនីមួយៗ គេរៀបចំធ្វើឡើងយ៉ាងអធិកអធម សប្បាយរីករាយយ៉ាងក្រៃលែង ។ ប៉ុន្តែគួរឱ្យអនិច្ចាឆ្នាំ២០២១នេះដោយសារតែបញ្ហាជំងឺកូវីដឆ្លងរាលដាលឥតឈប់ឈរ ទើបក្រសួងធម្មការនិងសាសនាមិនអនុញ្ញាតឱ្យមានការដង្ហែកឋិនដោយមានការជួបជុំមនុស្សម្នាច្រើនឡើយ ។
សូមឈ្វេងយល់អំពីខ្លឹមសារនៃកឋិនដូចតទៅ កឋិនគឺជាសំពត់ដែលទាយកនាំទៅប្រគេនដល់ភិក្ខុសង្ឃក្នុងរដូវកឋិនកាលគឺតាំងពីថ្ងៃ១រោច ខែអស្សុជដល់ថ្ងៃទី១៥កើត ខែកត្តិក ដែលហៅថា បុណ្យកឋិនទានគឺបុណ្យប្រគេនសំពត់នេះឯង ។
បានសេចក្តីថា អ្នកធ្វើកឋិន មានសំពត់ត្រឹមតែអាចធ្វើស្បង់មួយ ក៏អាចធ្វើកឋិនបានដែរ ព្រោះលោកទទួលក្រាលកឋិន ក្នុងចំណោមត្រៃចីវរ (ស្បង់១ ចីវរ១ សង្ឃាដី១) គឺក្រាលបានតែ ១មុខប៉ុណ្ណោះ បើក្រាលដល់ទៅពីរមុខ មិនឡើងជាកឋិនឡើយ លោកហៅថា ខូចកឋិន ឬកឋិនត្ថារវិបត្តិ ។
ប៉ុន្តែការដែលអ្នកមានសទ្ធាមានទ្រព្យស្តុកស្តម្ភ អាចនាំសម្ភារច្រើនៗដូចជា ចីវរ១ត្រៃ ២ឬ៣ត្រៃ ឬក៏លើសទៅទៀតមានទាំងសេនាសនបច្ច័យ គិលានបច្ច័យ បិណ្ឌបាតបច្ច័យ ឲ្យកាន់តែសម្បូរបែបទៅទៀត ក៏រឹតតែប្រសើរវិសេស គឺបានផលានិសង្សដល់អ្នកធ្វើកឋិន កាន់តែប្រពៃលើសលប់ ។
ឯផ្នែក ភិក្ខុសង្ឃអ្នកទទួល បើក្រាលបានត្រឹមត្រូវ ក៏ទទួលបានអានិសង្ស៥យ៉ាង ទោះបីកឋិននោះតូចតាច តិចតួចស្តួចស្ដើង ឬធំដុំសម្បូរបែបយ៉ាងណាក៏ដោយ ភិក្ខុអ្នកក្រាលគ្រងនៅតែទទួលអានិសង្សបាន៥យ៉ាងដដែលក្នុងរវាង៥ខែរាប់អំពីវេលាដែលភិក្ខុបានក្រាលគ្រងនិងអនុមោទនាកឋិនទៅ ។
ចំណែកទាយកទាយិកា អ្នកធ្វើកឋិនក៏ត្រូវទទួលបានអានិសង្សដ៏ច្រើនលើសលប់ បានសុខចម្រើនទាំងក្នុងលោកនេះបន្តដល់បរលោក ។
ប៉ុន្តែសម្រាប់កឋិននៅកម្ពុជានាសម័យនេះលំបាកណាស់ កុំថាឡើយអ្នកក្រីក្រ សូម្បីតែអ្នកមានល្មមៗក៏មិនអាចធ្វើបានដែរ លុះណាតែអ្នកមានស្តុកស្តម្ភ ឬមានគ្នាច្រើនទើបអាចធ្វើកឋិនកើត ព្រោះកឋិនទាននៅកម្ពុជាពុំមែនមានតែស្បង់១ ឬចីវរ១ ឬសង្ឃាដី១ប៉ុណ្ណោះទេ គឺត្រូវមានបរិក្ខារដ៏ច្រើនផ្សេងៗទៀត ជាពិសេសបច្ច័យសង្កត់ត្រៃសម្រាប់កសាងវត្តអារាមនិងសមិទ្ធិសាធារណៈនានាមានសាលារៀន មន្ទីរពេទ្យជាដើមទើបអាចឈ្មោះថាជាកឋិននៅកម្ពុជានាសម័យទំនើបបាន ៕ សាន សារិន
ចែករំលែកព័តមាននេះ