ចម្លើយសារភាពបុរសចិន២នាក់ខុសគ្នា ក្រោយបង្ខាំងមនុស្សជំរិតទារប្រាក់
- បន្ទាយមានជ័យ
ជនសង្ស័យជាជនជាតិចិនចំនួន០២នាក់ បានធ្វើសកម្មភាពបង្ខាំងមនុស្សជំរិតទារប្រាក់ខុសច្បាប់ និងជួញដូរមនុស្ស ហើយត្រូវបាន
ជនសង្ស័យជាជនជាតិចិនចំនួន០២នាក់ បានធ្វើសកម្មភាពបង្ខាំងមនុស្សជំរិតទារប្រាក់ខុសច្បាប់ និងជួញដូរមនុស្ស ហើយត្រូវបាន
ខេត្តបន្ទាយមានជ័យ ៖ ជនសង្ស័យជាជនជាតិចិនចំនួន០២នាក់ បានធ្វើសកម្មភាពបង្ខាំងមនុស្សជំរិតទារប្រាក់ខុសច្បាប់ និងជួញដូរមនុស្ស ហើយត្រូវបានកម្លាំងនគរបាលការិយាល័យ ប្រឆាំងការជួញដូរមនុស្សនិងការពារអនីតិជននៃស្នងការដ្ឋាននគរបាលខេត្ត កសាងសំណុំរឿងបញ្ជូនខ្លួនទៅសាលាដំបូងខេត្តបន្ទាយមានជ័យ នៅរសៀលថ្ងៃទី២០ ខែតុលា ឆ្នាំ២០២១ ដើម្បីចាត់ការតាមនីតិវិធី។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានឲ្យដឹងថា នៅវេលាម៉ោង០៥និង៥០នាទីល្ងាច ថ្ងៃទី១៨ ខែតុលា ឆ្នាំ២០២១ កន្លងទៅ បានទទួលព័ត៌មានពីប្រជាពលរដ្ឋថា មានករណីបង្ខាំងមនុស្សប្រុសចំនួន២នាក់នៅចំណុចអគារមួយកន្លែង ក្នុងបន្ទប់លេខ១១៤ ស្ថិតក្នុងភូមិគីឡូលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
លោកអធិការនគរបាលក្រុងប៉ោយប៉ែត បានឲ្យដឹងបន្តថា បន្ទាប់ពីទទួលព័ត៌មានភ្លាម កម្លាំងនគរបាលក្រុងប៉ោយប៉ែត បានចុះទៅដល់កន្លែងកើតហេតុ ដោយមានការសហការពីម្ចាស់អគារ សមត្ថកិច្ចក៏បានរំដោះជនរងគ្រោះជាបុគ្គលិកចំនួន២នាក់ ដោយ ១- ឈ្មោះឌឿន ឌាត ភេទប្រុស អាយុ៣៣ឆ្នាំ ស្នាក់នៅបណ្តោះអាសន្នក្នុងភូមិគីឡូលេខ៤ សង្កាត់ផ្សារកណ្តាល ក្រុងប៉ោយប៉ែត និង២- ឈ្មោះជឹម ក្តឹប ភេទប្រុសអាយុ៣៣ឆ្នាំ ស្នាក់នៅបណ្តោះអាសន្នក្នុងភូមិគីឡូលេខ៤ សង្កាត់ផ្សារកណ្តាល ក្រុងប៉ោយប៉ែត ក្នុងនោះក៏បានឃាត់ខ្លួនជនសង្ស័យជាមេការម្នាក់មានឈ្មោះ ស៊ីន សៅស៊ុន ភេទប្រុស អាយុ៣៦ឆ្នាំ ជាជនជាតិចិន ស្នាក់នៅភូមិគីឡូលេខ៤ សង្កាត់ផ្សារកណ្តាល ក្រុងប៉ោយប៉ែត ។
លោកអធិការនគរបាលក្រុងប៉ោយប៉ែត បានឲ្យដឹងទៀតថា ក្រោយពីឃាត់ខ្លួនមេការខាងលើនេះ ក៏បាននាំយកមកសួរនាំនៅអធិការដ្ឋាននគរបាលក្រុងប៉ោយប៉ែត ។ បន្ទាប់មកនៅវេលាម៉ោង០៩ព្រឹក ថ្ងៃទី១៩ ខែតុលា កម្លាំងនគរបាលក្រុងបានឈានដល់ឃាត់ខ្លួនជនសង្ស័យម្នាក់ទៀតមានឈ្មោះកៅ ឈុង ភេទប្រុស អាយុ៣៥ឆ្នាំ ជាជនជាតិចិន ស្នាក់នៅភូមិគីឡូលេខ៤ សង្កាត់ផ្សារកណ្តាល ក្រុងប៉ោយប៉ែត ទាំង០២នាក់នេះ គឺជាមេការក្រុមហ៊ុនអនឡាញមួយនៅក្រុងប៉ោយប៉ែត។
លោកអធិការបានបញ្ជាក់ថា តាមបំភ្លឺរបស់ជនរងគ្រោះទាំង០២នាក់បាននិយាយថា នៅថ្ងៃទី០៩ ខែតុលាឆ្នាំ២០២១ ពួកគេបានសម្ភាសន៍ធ្វើការនៅក្រុមហ៊ុនអនឡាញនៅភ្នំពេញ ហើយជាប់ចំនួន០៦នាក់។ នៅយប់ថ្ងៃដដែល ពួកគេទាំង០៦នាក់បានចេញពីភ្នំពេញមកប៉ោយប៉ែត ដោយជិះរថយន្ត០១គ្រឿងដែលអ្នកបើកបរគឺជាជនជាតិខ្មែរ ហើយអ្នកជិះក្នុងរថយន្តនោះមានម្នាក់គឺជាជនជាតិចិន និងម្នាក់ទៀតគឺជាជនជាតិបង់ក្លាដែស លុះពេលមកដល់ប៉ោយប៉ែតនៅវេលាម៉ោង០៣ទៀបភ្លឺ ដោយស្នាក់នៅអគារអនឡាញ។
ជនរងគ្រោះបំភ្លឺទៀតថា លុះព្រឹកឡើង ពួកគេធ្វើការសម្ភាសន៍ម្តងទៀត គឺជាប់តែ០២នាក់ទេ (ម្នាក់ឈ្មោះឌឿន ឌាត និងម្នាក់ទៀតឈ្មោះជឹម ក្តឹប) ។ ហើយនៅថ្ងៃទី១៧ និងថ្ងៃទី១៨ ខែតុលា ពួកចិននោះបានដាក់ខ្នោះខ្លួនទាំង០២នាក់ និងគំរាមឲ្យយកប្រាក់ឲ្យពួកគេវិញ ដោយប្រាប់ថា អ្នកនាំមកនោះ បានយកពួកគេទាំង០២នាក់មកលក់ បើមិនបានប្រាក់ទេ គេបង្ខាំងទុកក្នុងបន្ទប់នេះ៦ខែ ។
ជនរងគ្រោះបញ្ជាក់ថា ជាមួយគ្នានោះ ពួកគេសុំទាមទារជំងឺចិត្តមកខ្លួនវិញចំនួន៣ម៉ឺនដុល្លារ និងសុំឲ្យសមត្ថកិច្ចចាត់ការតាមនីតិវិធី។
លោកស្រី ឧត្តមសេនីយ៍ត្រី ឌី សុជាតិ ស្នងការរង ទទួលផែនការងារប្រឆាំងការជួញដូរមនុស្ស និងការពារអនីតិជន បានឲ្យដឹងថា តាមចម្លើយសារភាពរបស់ឈ្មោះស៊ី សៅស៊ុន មេការគ្រប់គ្រងអនឡាញ បាននិយាយថា ខ្លួនបានស្គាល់អ្នកធ្វើការដូចគ្នាឲ្យជួយរកជនជាតិថៃ០៦នាក់មកធ្វើការ ពេលនោះសម្ភាសន៍ជាប់២នាក់ដែលអាចធ្វើការបាន ។ ដោយគិតថា អ្នកទាំង០២នាក់នោះជាជនជាតិថៃ ក៏បានឲ្យគាត់ទៅរៀនឲ្យចេះធ្វើការនៅក្នុងបុរីស៊ានហូរ លុះពេលទៅដល់កន្លែងរៀន គេប្រាប់ថា មិនមែនជាជនជាតិថៃ គឺជាជនជាតិខ្មែរក៏បញ្ជូនគាត់មកវិញ ដោយយល់ថាខ្លួនចាញ់បោកអ្នកដែលខ្លួនស្គាល់ក៏ចាប់ជនរងគ្រោះទាំង០២នាក់ដាក់ខ្នោះដៃ រួចថតបង្ហោះឲ្យអ្នកនាំមកនោះឃើញ និងសងលុយខ្លួនវិញ ដោយក្នុងម្នាក់ចំនួន១,០០០ដុល្លារ និងសោហ៊ុយដឹកជញ្ជូនចំនួន២៥០ដុល្លារ សរុបចំនួន២,៥០០ដុល្លារ ។
ចំណែកឈ្មោះកៅ សុង វិញ ក៏បានសារភាពដែរថា ខ្លួនគេធ្វើការងារជាអ្នកគ្រប់គ្រងផ្នែកមើលការខូចខាតដូចជាទឹកភ្លើង និងសម្ភារៈផ្សេងៗក្នុងអគារ។ ចំពោះការដាក់ខ្នោះជនជាតិខ្មែរទាំង០២នាក់នោះ ខ្លួនមិនបានពាក់ព័ន្ធឡើយ គឺឈ្មោះ ស៊ី សៅស៊ុន ជាអ្នកធ្វើទាំងអស់ ៕
ចែករំលែកព័តមាននេះ