ខេត្តបាត់ដំបង ៖ កម្មករម្នាក់ដែលធ្វើការនៅកន្លែងសាងសង់ទំនប់ស្ទាក់ទឹកដ៏ធំមួយនៅតាមដងស្ទឹងដូនទ្រី ក្នុងឃុំបាសាក់ ស្រុករុក្ខគិរី ត្រូវបានគេប្រទះឃើញក្លាយជាសា.ក.ស.ពអណ្ដែតទឹក នៅព្រឹកថ្ងៃទី២១ តុលា នេះ ក្រោយពីបាត់ខ្លួនមួយយប់ ក្នុងអំឡុងពេលព្យាយាមហែលឆ្លងទឹកស្ទឹងនេះដែលកំពុងជន់ខ្លាំង ក្បែរកន្លែងការដ្ឋានរបស់ខ្លួន។
របាយការណ៍សមត្ថកិច្ចបានឲ្យដឹងថា ជនរងគ្រោះឈ្មោះ ធី ធិ ភេទប្រុស អាយុ២៤ឆ្នាំ រស់នៅភូមិអូររំចេក ឃុំបាសាក់ ស្រុករុក្ខគិរិ និងជាកម្មករធ្វើការនៅក្នុងក្រុមហ៊ុនមួយ ដែលកំពុងសាងសង់ទំនប់ស្តាក់ទឹកស្ទឹងដូនទ្រី នៅក្នុងឃុំបាសាក់នេះ។ របាយការណ៍បានបញ្ជាក់ទៀតថា ជនរងគ្រោះបានបាត់ខ្លួន អំឡុងពេលកំពុងព្យាយាមហែលឆ្លងទឹកស្ទឹងនេះ កាលពីថ្ងៃទី ២០ តុលា ខណៈដែលទឹកកំពុងហូរខ្លាំង។
ពេលនេះ សមត្ថកិច្ច និងក្រុមការងារ រួមទាំងអ្នកភូមិផង បាននាំគ្នាជួយស្វែងរកជនរងគ្រោះ តែមិនប្រទះឡើយ រហូតព្រឹកថ្ងៃទី២១ តុលា ទើបគេប្រទះឃើញសាកសពកម្មកររូបនេះ អណ្ដែតឡើងនៅខាងក្រោមកន្លែងកើតហេតុ ប្រមាណ៥០០ម៉។ សមត្ថកិច្ចបាននិយាយថា ប៉ុន្មានថ្ងៃកន្លងទៅនេះ ជំនន់ទឹកភ្លៀងនៅក្នុងស្ទឹងដូនទ្រី បានហក់ឡើងខ្លាំងដែលអាចបង្កហានិភ័យខ្លាំងបំផុត ដល់ប្រជាពលរដ្ឋ និង ក្រុមកម្មករសាងសង់ទំនប់ស្ទាក់ទឹកនៅទៅនោះ។ ដូច្នេះទាំងប្រជាពរលដ្ឋ ទាំងកម្មករដែលធ្វើការនៅទីនោះ គួតែមានការប្រុងប្រយ័ត្ន ដើម្បីបញ្ជៀសនូវគ្រោះថ្នាក់នេះ៕
ចែករំលែកព័តមាននេះ