រាជធានីភ្នំពេញ ៖ រយៈពេលប៉ុន្មានថ្ងៃចុងក្រោយនេះតារាកំប្លែងនាង ស្រេង សុខាន់ដា ហៅខ្ញុង កំពុងបង្កនូវភាពភ្ញា.ក់ផ្អើលជាខ្លាំង បន្ទាប់ពីនាងស្រែកយំជាសាធារណៈអះអាងថា នាងកំពុងជំពាក់បំណុលជិត៦០ម៉ឺនដុល្លារ ។
ហើយអ្វីដែលសំខាន់នោះ គឺនាងបានលើកឡើងអំពីការចងការប្រាក់ឯកជន និងការខ្ចីលុយតាមអនឡាញដែលមានចិនចូលមកវិនិយោគក្នុងរយៈពេលប៉ុន្មានឆ្នាំចុងក្រោយនេះនៅកម្ពុជា ដោយការយកអត្រាការប្រាក់ខ្ពស់ ។
ករណីនាងខ្ញុង បើសិនជាគាត់ពិតជាជាប់បំណុល ដោយម្ចាស់បំណុលយកការប្រាក់ហួសការកំណត់របស់ច្បាប់ គឺមិនមែនជារឿងដាច់ដោយឡែកនោះទេ ព្រោះកន្លងមកក៏មានពលរដ្ឋខ្មែរមួយចំនួន ពិសេសអ្នកនៅជនបទក៏ធ្លាប់បានលុងខ្លួនដូចនាងខ្ញុង មិនតិចនោះទេ ពាក់ព័ន្ធនឹងបំណុលឯកជន និងបំណុលតាមអនឡាញនេះ ដោយសារតែលក្ខខណ្ឌខ្ចីងាយស្រួលខ្លាំង តែការប្រាក់ថ្លៃហួសកម្រិតច្បាប់កំណត់ ហើយអ្នកខ្លះខ្ចីយូរៗទៅថ្លៃការច្រើនជាងលុយដើមទៅទៀត ។
ដោយមិនបានពោលចំៗចំពោះនាងខ្ញុងក្តី តែមេធាវីស្រីលេចធ្លោមួយរូបបានលើកឡើងនូវប្រធានបទ «បំណុល និងការប្រាក់» ចំពេលព្រឹត្តិការណ៍ក្តៅៗរបស់តារាកំប្លែងនាងខ្ញុងតែម្តង ហើយក៏ជាសារដាស់តឿនដល់ពលរដ្ឋកុំចេះតែខ្ចីលុយជាមួយលក្ខខណ្ឌងាយៗ ព្រោះនឹងក្លាយជាជនរងគ្រោះវណ្ឌក នឹងបំណុលដោះមិនចេញ ។
លោកស្រី ម៉េង សុភារី សហមេធាវីការពារក្តីឱ្យអ្នកនយោបាយខ្មែរ លោកកឹម សុខា បានលើកឡើងអំពីប្រធានបទ «បំណុល និងការប្រាក់» ដោយលើកឡើងអំពីមាត្រាច្បាប់មួយចំនួនដែលបានចែង ថា កូនបំណុល អាចប្តឹងលុបកិច្ចសន្យាបាន បើសិនជាបំណុលនោះ គឺមានអត្រាការប្រាក់លើសពីច្បាប់កំណត់ ។
លោកស្រីមេធាវី ម៉េង សុធារី បានលើកឡើង កាលពីរាត្រី ថ្ងៃទី២១ ខែតុលា ឆ្នាំ២០២១ នេះថា តាមប្រវត្តិសាស្ត្ររហូតដល់បច្ចុប្បន្ននេះឧបសគ្គនៃការឲ្យខ្ចីប្រាក់ដោយយកការប្រាក់ខ្ពស់កើតឡើងមិនចេះដាច់ ។ ហេតុនេះហើយបានជាប្រទេសជាច្រើនបាន បង្កើតបញ្ញត្តិធ្វើការកម្រិតនូវការអោយខ្ចីប្រាក់ដោយយកការប្រាក់ខ្ពស់ ហើយប្រទេសយើងក៏មានក្រមរដ្ឋប្បវេណីបញ្ញត្តិដូចគ្នាដែរ ។ អត្រាការប្រាក់ដែលត្រូវបានកម្រិត គឺ១៨%ក្នុង១ឆ្នាំ ។
លោកស្រីបានដាក់សំណួរយ៉ាងដូច្នេះថា តើត្រូវធ្វើដូចម្តេចនៅពេលម្ចាស់បំណុល និងកូន បំណុល ចុះកិច្ចសន្យាខ្ចីប្រាក់ក្នុងអត្រាការប្រាក់ខ្ពស់លើសពីច្បាប់កំណត់? ក្នុងករណីនេះ លោកស្រីបានបញ្ជាក់ថា «ប្រសិនបើភាគីបានព្រមព្រៀងអត្រាការប្រាក់ប្រាក់លើសពីអត្រាការប្រាក់ដែលមានកម្រិតក្នុងច្បាប់ ចំនួនដែលលើសនោះ ត្រូវទុកជាមោឃៈ ដូច្នេះកូនបំណុល មានករណីកិច្ចសងតែចំពោះ ការប្រាក់តាមច្បាប់តែប៉ុណ្ណោះ ។
ក្នុងករណីដែលកូនបំណុល បានសងការប្រាក់ដែលលើសពីការប្រាក់តាមច្បាប់ ចាត់ទុកថាចំនួនដែលលើសនោះ ជាការកាត់បំណុលទៅលើប្រាក់ដើម» ។ លោកស្រីមេធាវី បានបន្ថែមទៀតថា « ក្នុងករណីកាត់បំណុលទៅលើប្រាក់ដើម ចំពោះចំនួនដែលលើសហើយនៅសល់ទៀត ម្ចាស់បំណុលត្រូវសងទៅអោយកូនបំណុល ដោយភ្ជាប់ជាមួយប្រាក់សំណង នៃការខូចខាត ដែលគណនាតាមអត្រាការប្រាក់កំណត់ដោយច្បាប់ ដោយគិតចាប់ពីថ្ងៃដែល បានបង្កើតអោយមានការសេសសល់នៃការសងរហូតដល់ថ្ងៃ ដែលបានសងនោះ» ។
ជាមួយគ្នានោះដែរ លោកស្រីក៏បានលើកឡើងថា កូនបំណុលអាចប្តឹងទៅតុលាការសុំសងការប្រាក់ទៅតាមតាមច្បាប់ និងមាន សិទ្ធិសុំឲ្យគណនាការប្រាក់ដែលបង់លើសចូលជាប្រាក់ដើមបាន ។ (មាត្រា៥៨៥ នៃក្រមរដ្ឋប្បវេណី និងប្រកាសលេខ១២៨ កយប្រក/១១ របស់ទីស្តី ការក្រសួងយុត្តិធម៌) ។
លោកស្រីមេធាវី ម៉េង សុភារី បានលើកឡើងបន្តថា សិទ្ធិរបស់កូនបំណុលក្នុងការលុបចោលកិច្ចសន្យា កូនបំណុលអាចប្តឹងសុំឲ្យលុបចោលកិច្ចសន្យាបាន ប្រសិនបើមានភស្តុតាងបង្ហាញថា ៖ -កិច្ចសន្យាត្រូវបានធ្វើឡើងដោយអំពើឆ្លៀតឳកាស ដោយមានគោលបំណងកេង យកចំ ណេញហួសហេតុ ក្នុងពេលដែលកូនបំណុលកំពុងជួបប្រទះការលំបាកខាងផ្នែកសេដ្ឋកិច្ច ឬភាពឆោតល្ងង់ ឬខ្វះការពិសោធន៍ ។ -កិច្ចសន្យាដែលធ្វើឡើងដោយការភ័ន្តច្រឡំ ឬដោយការឆបោក ឬដោយការគម្រាមកំហែង។ -កិច្ចសន្យាដែលធ្វើឡើងដោយការរំលោភទៅលើស្ថានភាព នៅពេលធ្វើកិច្ចសន្យាភា គីម្ខាងបាន ប្រើឋានៈខ្លួនដែលមានអទិភាពជាងកូនបំណុលខាងផ្នែកសេដ្ឋកិច្ច ឬផ្នែកសង្គម ឬបានប្រើស្ថាន ភាពផ្សេងទៀតដែលកូនបំណុលមិនអាចប្រឆាំងតបតបាន ។ (មាត្រា៣៤៥ ដល់៣៥៣ នៃក្រមរដ្ឋប្បវេណី)។
លោកស្រីមេធាវីក៏បានលើកឡើងថាទោះប្បីយ៉ាងណា ការបង្កើតបំណុល ត្រូវបង្កើតដោយ ការពិចារណាដោយបញ្ញាដោយមានផែនការច្បាស់លាល់ ដោយការយកបំណុលទៅប្រើដោយស្របច្បាប់ ដោយមានមូលដ្ឋានសំណង ជៀសវាងធ្លាក់ក្នុងវិបត្តិដ៏ជ្រៅពិបាកដកខ្លួន ឬដកខ្លួនមិនរួច ៕
ចែករំលែកព័តមាននេះ